Read Kissi Condii lisai 35 Bible Online

Condii lisai 35 - Kissi bible

Condii lisai 35

¹Condii David-e. Mɛlɛka, ciŋilan vanaa co ya ciŋilanndo-a, cɔlɔba vanaa co ya cɔlɔbaa-a.

²Cua kɔ̀ɔ̀ cɔw pɔmbɔɔ a kɔ̀ɔ̀ cɔw bɛndoo ma cɛn, mà mala ya.

³Heelu bállo a cuei sondola tiɔnde, ma kuel vanaa co ya hinullo-a. Dimul yoomu nuu aa: «Ya co vana ciindiaa nɔm-ndo ni.»

⁴Màá siɛmbulan la bii vanaa co ya kɔɔli le ya diyɔɔ-a, mà laasian! Màá vanaa co ya dúmbóó muungu a makɔɔ, mì siɛmbulan la tol nda!

⁵Màá mɛlɛkanɔ Hala-o tow nda, mà siŋnun maa bilte hoeiye cua len!

⁶Màá mɛlɛkanɔ Hala-o tow nda mì nɛi ndaa siŋnun nɛi maɲumndo a nɛi vana siɛɛliaa coo-o!

⁷Kani i tɛɛmbuu isɔɔ le mí nda kɛsul-la yaŋɔɔlen o soondo coo, i tosa ɲɛ-ɲɛ le má tuw ya soondo le yoomu nuu ciiyo.

⁸Màá dɛnɛ palaa voolu nda! Màá nda pila haw o yaŋɔɔle nda handu len! Màá a deli o soon nda tow-vo nin mà tambu!

⁹Ya ya, i dɔawnunnin ɲaale o Mɛlɛka nin, mì naŋ kɔl le ciindiaa o ciindiaa ya-o.

¹⁰Paala nilan kpow la diminin aa: «Mɛlɛka, nɛ̀ɛ́-nɛ̀ nɔla yɛ vana nɔ mayoomu loo baŋaa vana hiow ndu kpaayaa-o o ba? Nɛ̀ɛ́ nɔla yɛ vana bala fondoo a vana ikɔɔ baŋaa vana co nda ɲɔɔn poondiaa o ba-a o ba?»

¹¹Seyaa lacòòvaa co cɔnɔnndo, a co ya sɔɔn ya sina loon ɲuuniaa.

¹²I co nda kɛndɛi tosal-lo, mì nda va ya dɛnɛ vɔɔndo mingullo, i lo ya pilɛ kpé.

¹³Ya yɛ, telen nda va a nààlan-ndo, ɲííye va ya biyɔɔ, mí volɔɔla imɔnɔlan vownɔnndo le nda, mí va sumndo biyɔɔ a ya pila tuŋnɔnndo. I ve sanga piɛilen le nda le.

¹⁴Mí va tosaa mɛɛ vana tosa le caan nɔm, te kon te le puapilɛ nɔmndo nuaa yɛ, mí saiyan volɔɔla imɔnɔlan, vanáà ce pɛ aa kala velu ya-o vi ni.

¹⁵Kɛ dɛnɛ palaa tol pɛ ya coo, nda yiinan a dɔwnun ɲaale. A co yiinanndo le ya ciŋilanndo, a le ya lɔɔ, kɛ ya i co bɛɛ ndi sina le. A co ya sɔmndo a sondo tuŋ.

¹⁶Nda vanaa sina Hala le-a latulu, vanaa kei vannda mamɔɔ-a, a co ciŋndon sɔmndo a ya o sondo.

¹⁷Éé Maalii! Háá lɔ́ɔ́ kuɛɛ n lo yɛnin dɛnɛ kon tofaa? Kanda yoomu nuu le hiilɛi nda nɔ a ya-e, baŋa ya o yɛmbɛn yàlàá ha bɛngu.

¹⁸I candunin nɔm o sɛ́lɛ́ bɛndoo tɛɛn, i lisanin nɔm vanaa bɔɔ-bɔɔ tɛɛn.

¹⁹Màá yaamɔaa nia ciŋilan ya o fondo fúúo coo-a dɔawnun ɲaale a dɛnɛ nuu o kɔɔ le! Màá vanaa nɔ nɛyɔn nuu fondo fúú-a tofa ya ŋɛlɛn mà yeow ya le!

²⁰Kani a co sɔɔn kɔlɲulu dimi le, kɛ vanaa connun nila ɲulu o lɛŋnden coo-a nda co sɔɔn fondon hɛɛnduuo coo ni.

²¹A co sondolan kumbio mà va ya dimullo aa: «Ɛ̀ɛ̀ hɛ́ɛ̀! Ɛ̀ɛ̀ hɛ́ɛ̀! Naa pilaa n ce ndu ciŋ.»

²²Mɛlɛka, nɔm pila co ken cɔu, lelan meì a ndi le dɛ, Maalii! Kɔa ya levil tei!

²³Hala nuu tiondu, cɔn ma cɔm sandii nii! Maalii nuu, cɔn ma soo le ya!

²⁴Mɛlɛka, nɔm co Hala nuu-o, kiolu yamɛi nii mɛɛ dɛnɛ sandaa nɔmndo co yɛ. Màá a dɔawnun ɲaale a dɛnɛ nuu o kɔɔ le!

²⁵Cɛ̀l mì yaamɔaa nia dimi aa: «Àá, mbɔ̀ hee náà n yeema ni» le. Màá a dimi le aa «Ɛ̀ɛ̀ hɛ́ɛ̀! N mel ndu!»

²⁶Màá siɛmbulan la tol nda kpow mà tambu labɛɛ! Vanaa co kan a ɲaaloo le dɛnɛ palaa nuu-a pɛɛn. Màá siɛmbulan la bii vanaa co ya ciŋilanndo-a, mà laasian!

²⁷Kɛ vanaa ɲɔɔ co hɛnanndo le dɛnɛ sandaa-a, màá a yonda a kɔlkɛndɔɔ mà dɔwnun ɲaale! Màà a va dimio lɔ́ɔ́-lɔ́ɔ̀ aa: «Mɛlɛka co o bɔɔ, o yeema mì vana baala ndɔɔ sɔla kɔlɲuloo-o!»

²⁸Ya yɛ, diɛɛmule nilen le soaanin a sandii nɔmnde o kɔɔ, le vanin nɔm lisaa lɔ́ɔ́-lɔ́ɔ̀.