Read Kissi Condii lisai 36 Bible Online

Condii lisai 36 - Kissi bible

Condii lisai 36

¹Condii David vana balaa Mɛlɛka-o-e, í fula o condun simlacinɔ vanaa n'condua nin-nde.

²Le vana kɔlvesɛiyo, sɔɔn tɛɛmbua tɔŋndon co ndu o kɔl tuŋ. Siòòŋii Hala-e co ndu o hɔl te.

³Kuundianndo hiow ndu bɔɔ ba! O sinà tɛɛmbuu ndɔɔ le, o mel ndu le.

⁴Sɔɔn lacòòvan a sɔɔn huiyaa n'vanndon kínɛí n fula ndu o sondo ni. Dɛnɛ kɛndɔɔ tosaa solul lɛ ndu kpeku oo kpeku le.

⁵O kpele ndɔɔ coo o tuu tuula vɔɔnndan icɔl ni, o cɛl le faŋanndo o nɛila vɔɔnndan coo le. O mel yɔŋ vɔɔndo le.

⁶Mɛlɛka, vanakɛndɛyɛi nɔmnde co o halataala, Kaola nɔmndo tiiya coocoo di.

⁷Maa pembun vilɛi-vilɛiyon sandii nɔmnde co ni. Yaman nɔmndon yingila maa soon yingilaa. Mɛlɛka, nɔm co vanndacieea a visia ciindiaa ni.

⁸Kɛndɛi nɔmnde co bɔɔ isɔvɛ, Hala! Vanndacieea co vionnɔnndo nɔm o ba bɛngu, o vunduma kumbannda nɔmndan bɛngu.

⁹A co nda pimio a ɲɛm fàngà-fángàn co o nɔm ndo cɛinin-ndon, a co nda koesio a pee nɔm ɲɛm kɛndɔɔ.

¹⁰Kani nɔm o ba pee cindaa co ni, ɲɛ-tengaa nɔmndo co tosaa ni mì n va ɲɛ-tengaa cɔu.

¹¹Hiow laci a vanaa sinà nɔm-nda vanakɛndɛyɛi nɔmnde tosallo, a á vanaa sandu kɔltan-nda dɛnɛ sandaa nɔmndo tosallo.

¹²Màá pelun vana yongaa n tiiya o ya lo le! Màá bala vanaa kɔlvesɛiya la toaw ya le!

¹³Má cè vanaa yɔŋ vɔɔnda ihini lɛ́ɛ́siɛn, a deli, a co nɔla cɔnɔnndo le.