Read Kissi Condii lisai 38 Bible Online

Condii lisai 38 - Kissi bible

Condii lisai 38

¹Condii David-e, le loonɔnndo a Hala o kɔɔ.

²Éé Mɛlɛka! Soaŋ ya o kɔltuw nɔmndo nin te, saangiaa ya o kɔlfulaa nɔmndo nin te.

³Kani kɔɔn nɔmndon cuukuu ya, ba nɔmndo fukpa ya.

⁴Le kɔl n tuulu a ya-o, ɲɛ-ɲɛ co lɛ o kɛndɛ ya o n'dial te. Le haki nuu, ɲɛ-ɲɛ co lɛ ya o bɛndaa o paalan nin te.

⁵Tɛɛmbuula nilan la hiow bolle nilen helɔɔ, la co ya kindilaa mɛɛ volɔɔ lusulaa kindila vana nuaa yɛ.

⁶Pavii nii tumulu, i co cunndo kuí-kuí! Kani i tosa dɛnɛ idiɔmndo.

⁷I bɛpɛla a sangaa mì yɔkpa yɔkpaa pila, niinoo kpɛŋ i co o mɔnɛi nin.

⁸Kɔɔ co ya nɛiyo maa lomnɔn, ɲɛ-ɲɛ co o kɛndɛ ya o n'dial te.

⁹I nɔ lɛ leyoomu le, i yɔkpa. I co somisominndo o kɔl nin.

¹⁰Éé Maalii, a co yeemɛi nii kpow cɔu, yoomula fùù-fùùla ya co lan kpow, o kɛ́-kɛ̀ co nɔm o viannan te.

¹¹Kɔllo co ya fulaa vum-vum, yoomuan ma co ya cuvɔɔ, hɔlta nilan la co lɛ cɔ valan te.

¹²Caaŋaa nia a vanaa naa n dema kelaa-a co ya kpeeŋianndo le pavii nii, vanayan nun co lɛ ya sɔɔnguu ikɛi le.

¹³Vanaa yeema mà dii ya-a co ya yaŋɔɔlan hendullo, vanaa yeema dɛnɛ palaa nuu-a co sɔɔn le ya tɛɛmbuuo, niinoo kpɛŋ a co ya sɔɔn lacòòvan hɛnduuo coo.

¹⁴Kɛ ya, i co tosaa maa vana nila baŋulɛi, maa i co ɲɛ-ɲɛ tueyɔɔ le. I co tosaa maa bobonɔ, i co sondoo kumbi le.

¹⁵I siŋnun maa vana tui loo, o tiwba mò muli isɔɔ-sɔɔ loo.

¹⁶Éé Mɛlɛka! Nɔm ya cal tiindan ni. Nɔm yɔngunin mulio ni, Maalii Hala nuu.

¹⁷Kani mí dimi aa: «Màá vannda ha dɔawnun ɲaale a dɛnɛ nuu o kɔɔ le! Te i siɛla pɛ, màá a heelun ya coo le!»

¹⁸I co le ŋɔɔcan, kani sangaa co vɔ ya coo tuŋ.

¹⁹I co tɛɛmbuula nilan sɔlɔlanndo, i co buulanndo taw le haki ya tosa-o.

²⁰Yaamɔaa nia nɔ yoomuan, a nɔ kpaayaa. Vanaa nɔ nɛyɔn nuu fondo fúú-a co taw.

²¹Vanaa co ya màá dɛnɛ kɛndɔɔ mingullo a dɛnɛ vɔɔndo-a co ya ciŋilanndo le dɛnɛ kɛndɛ ya co tosaa-o-a.

²²Éé Mɛlɛka! Mal-la le! Kɔa ya levil te, Hala nuu!

²³Maalii, vana ciindiaa nuu, hun cɔ́-cɔ́ mà mala ya.