Read Kissi Condii lisai 40 Bible Online

Condii lisai 40 - Kissi bible

Condii lisai 40

¹Condii David-e, í fula o condun simlacinɔ vanaa n'condua nin-nde.

²I tiindan Mɛlɛka a kɔl nuu kpow, o mulul-la hɔlla mó tuɛi cɛɛŋɔnnda nilan diom.

³O soli ya o soon nɔ lamɛɛlu loo nin, mó soli ya o looli pɔ́lɔ́nndo nin[8]. O heelu ya o pow kpovaa coo, mó simi pelun nun yili.

⁴O vow ya condii sɛnɛiye o sondo, condei le Hala naa lisaa. Vanaa bɔɔ-bɔɔ canin dɛnɛ kon, mì siòònde bii nda, mà laalan Mɛlɛka.

⁵Dɛnɛ kɛndɔɔ co le vana co Mɛlɛka tiindanndo-o, o sɔɔnguu vanaa yongaa a vanaa lacòòvaa ikɛi loo.

⁶Mɛlɛka, Hala nuu! Dɛnnda kaamaalan a tuula n tuu le naa lan la co labɔɔ. Ɲɛ-ɲɛ sulan a nɔm te. Yáà yeema mì yáà cɔm vannda lan, mì yáà mingi lan dimi, kɛ la co sɛ́lɛ́, vana nɔla lan dimio kpow le.

⁷Ɲɛ nɛŋì nɔm kɔllo-o, o co sálàla n'cɔlu le, o co sálàla kpeyan te. O co sálàla loamaa n ɲuna le, o co vɛlɛ sálàá le hakio sɔlaa malɔɔ le. A kumbi ya nilan mí bii ndi bila.

⁸O kon mí dimi aa: «Má cè ya! Ya pila i hin o nɔm ndo. I saalun ɲɛ ya bɛnda le tosaa-o o sɛvaa o sɛbɛ simbulaa nin.»

⁹Hala nuu, i yeema mì tosa hɛnan nɔmndo, mì mandan tɔŋ nɔmndo o kɔl kpíŋ.

¹⁰Mɛlɛka, i co Yoongu kɛndɛ dɛnɛ sandaa nɔmndo sɛ́lɛ́ bɛndoo tiiyallo, i co sondo mei le. Nɔm pila sina ken.

¹¹I vin dɛnɛ sandaa nɔmndo ya o kɔl te. I cɔmnin vannda mɛɛ n lo o lediom coo yɛ a mɛɛ n ciindiaa vana yɛ. I vinnin sɛ́lɛ́ bɛndoo vanakɛndɛyɛi nɔmnde a sakpoyɛi nɔmnde le.

¹²Nɔm Mɛlɛka, a tuŋ ya ɲíí nɔmnde le. Vanakɛndɛyɛi nɔmnde a sakpoyɛi nɔmnde vanin ya mandaa lɔ́ɔ́-lɔ́ɔ̀.

¹³Kani dɛnnda palaala balu ya lan la cuu cɔm te. Tɛɛmbuula nilan la muungu ya pila o lebol, i nɔla lɛ mì va lan cɔu le. La hiow yiiŋii co ya o lebolle vaa sɛ́lɛ́. Yoomuan ma cuu ya o n'dial.

¹⁴Mɛlɛka, baŋa ya yandi. Hun cɔ́-cɔ́, ma mala ya.

¹⁵Màá siɛmbulan la bii vanaa co ya kɔɔli le ya diyɔɔ-a kpow, mà tambu labɛɛ! Màá vanaa yeema mì dɛnɛ palaa tol-la coo-a kpow a muungu a siɛmbulan!

¹⁶Màá siɛmbulan la tiiya nda kpɔ́dɔ̀, vanaa co ya mamɔɔ aa: «Ɛ̀ɛ̀ hɛ́ɛ́»-a pɛɛn!

¹⁷Kɛ màá vanaa co nɔm nuwviaa-a kpow a náŋ kɔl, mà dɔwnun ɲaale o nɔm nin! Màá vanaa yeema cindaa nɔm o ba-a va dimio lɔ́ɔ́-lɔ́ɔ̀ aa: «Mɛlɛka co o bɔɔ»!

¹⁸Ya ya, vana bala fondoo a vana co o mɔnɛi nin-ndo ya co ni. Kɛ Maalii co ya yiyan coo. Hala nuu, nɔm co vana malaa a vana baŋaa le ya ni. Lelan sɔɔngu ya macɛlu cɔ́-cɔ́!