Read Kissi Condii lisai 42 Bible Online

Condii lisai 42 - Kissi bible

Condii lisai 42

¹Condii poaa Kore-a, í fula o condun simlacinɔ vanaa n'condua nin-nde.

²Òó Hala! Mɛɛ kial kolɔɔ bii-o yeema mɛmma pee pɔmbɔan nuaa yɛ, lende koni ya co nɔm yeemaa ni.

³Yeemɛi Hala nuu i co ya, Hala yoomaa pɛɛn. Lɔ́ɔ́ kuɛɛ ya kɔa yɛnin mì kɔ fula ndu o hɔl?

⁴Idii a icɔl, i co mɛmɛan pumndo. Vannda co ya ɲuuniaa tuŋ aa: «Kuɛɛ nɛ Hala nɔmndo co yɛ?»

⁵I va pɛ kɔllo keelaa, sɔɔn ya yiyanndon co mun ni: n va kɔlan naa vannda taw, í va nda simndan laci le kɔlan o Cɛi-Hala-o nin. N va yondaa a ɲaaloo mí va balikaa malɔɔ naa sɛ́lɛ́ bɛndu va kon kafoo tosaa-o.

⁶Kɔl nuu, le yɛɛ nɛ n co yɛ fulaa? Le kɔlɔ yɛɛ n co yɛ ŋɔɔcianndo ya nin? Tiindan Hala, kani i sangalanin ndu vɛlɛ le cinda nuu.

⁷Éé Hala nuu! Kɔllo co ya fulaa nin, lelan ya co yiyanndo a nɔm o kɔɔ o tàndá Yurdɛn-ndo nin ni, o pembon Hɛrmɔn coo, o pembei Mitsear ikɛi.

⁸Peela pɔmbɔlan la co ŋolɔɔ, tindian ma co veelanndo iyongban-yongbannde, kon kpow co ya tolɔɔ coo ni.

⁹Màá Mɛlɛka cɔm ya vanakɛndɛyɛi ndɔɛi ipala deŋ! O kon, i lɔlnin ndu sangalaa pii o condei nin. Piɛilen le co len le Hala nɔ yoomu nuu o ba-o ni.

¹⁰I yeema mì ɲuna Hala, o co Pow kpova nuu-o aa: «Le yɛɛ nɛ n pɔɛɛnun yɛ ya? Le kɔlɔ yɛɛ nɛ yaamɔɔa co yɛ ya palaa mí va kelaa o mɔnɛi he nin?»

¹¹Paalan la yomiyomi ya o n'dial, kani niinoo kpɛŋ yaamɔaa nia co ya yeowlan aa: «Kuɛɛ Hala nɔmndo co yɛ?»

¹²Kɔl nuu, le yɛɛ nɛ n co yɛ fulaa? Le kɔlɔ yɛɛ n co yɛ ŋɔɔcianndo ya nin? Tiindan Hala, kani i sangalanin ndu vɛlɛ le cinda nuu.