Read Kissi Condii lisai 44 Bible Online

Condii lisai 44 - Kissi bible

Condii lisai 44

¹Condii poaa Kore-a, í fula o condun simlacinɔ vanaa n'condua nin-nde.

²Òó Hala! Naa pila n tuei, fuɲaa naa dimul naa dɛnnda n tosa o palɛi ndɛi lan.

³A tow vanaa-mangalaa-isɔɔa o lɛŋnden coo le fuɲaa naa mamaa mingio o fonda ndaa. A diw vanaa-mangalaa-isɔɔa, le vanaa nɔmnda kuiyo vɛ́ɛ́lɛ̀-vɛ̀ɛ̀lɛ̀.

⁴O co a mɔɔn cɔvun ndan te nda sɔla lɛŋnden te, o co vɛlɛ kpaaya ndaa le ciindiaa nda le. Kɛ ba nɔm kɛndɔɔ, kpaaya nɔmndo, ɲɛ-tengaa fula nɔm o hɔl-lo a kaola n kaola nda-o tosa kon ni.

⁵Òó Hala! Nɔm co Masa nuu ni. Cɛl mì pulun Yakɔb-on nɔla yaamɔɔa o cɔwlan.

⁶Nɔm tosa ni mì n tow yaamɔaa naa, nɔm tosa ni mì n nɛw nda a labɛngu.

⁷O co kpaasiaa nuu le ya tiindan te, o co mɔɛi nii cɔwve le yɔngù ya nɔlaa le,

⁸nɔm ciindiaa naa yaamɔaa naa o ba ni, ma tuisi vanaa nɔ nɛyɔnndo a naa-a siɛmbulan.

⁹N vanin nɔm Mɛlɛka sangalaa lɔ́ɔ́-lɔ́ɔ̀, n vanin diola nɔmndan lisaa le fɛɛn a fɛɛn.

¹⁰Kɛ nɔm yɛ, a cii naa malɔɔ, siɛmbulan la tol naa mɔ́ɔ́yɔ̀ɔ̀. A co lɛ lakɔ niaa vanaa naa cɔwva latulu le.

¹¹A co tosaa mí yaamɔaa naa va naa tovɔɔ, mí vanaa nɔ nɛyɔnndo a naa-a va ɲɔɔn hiɔlɔɔ naa o ba.

¹²A co naa malɔɔ nda o ba maa cɔlua nda co yɔɔ nɛɛ diyaa n'cɔlua-a. Má cè mɛɛ naa n sɛŋin vanaa-mangalaa-isɔɔa tɛɛn yɛ!

¹³A co naa vanaa nɔmnda vɔngullo, hali ɲɛ-pɔmbɔ a co tɔnɔ sɔla a nda le.

¹⁴A mal naa vanaa naa n cɛɛlan-nda o sondo má va naa bɛɛlan tɛɛmbuuo, vanaa balu naa-a co naa tɛɛndanndo ma va naa mamɔɔ.

¹⁵Vanaa-mangalaa-isɔɔa co talelan dimio a naa o kɔɔ, a co naa mamɔɔ ma va bolle hiiloo.

¹⁶Siɛmbulala nilan la co ya o hɔl lepalaa-lepala, la co ya tolɔɔ mɔ́ɔ́yɔ̀ɔ̀,

¹⁷le tùú ya co yaamɔɔ co ya màá mingullo-o tueyɔɔ ya mamɔɔ a ya yeowla bɛɛtambɛilan-ndo.

¹⁸Dɛnndan ndan kpow la co naa komal-lo ni, kɛ naa yɛ, n pɔɛɛnun nɔm te, n tɛɛmbuu kpema nɔmndo le.

¹⁹N muungu a makɔɔ le, n mel vɛlɛ nɛila nɔmndan te.

²⁰Kɛ nɔm yɛ, a co naa saangiaa o lɛŋnde tivolla nin, a co vunduma piɔ́mndan tuisio naa coo.

²¹Te náà n pɔɛɛnun pɛ diola Hala naa, te náà n sooluu pɛ hala celenndo,

²²Nɔm Hala, vɛ̀ɛ̀ a va sɔɛi ken sina le? Kani a sina sɔɔn n'viannanndon o kɔltan nin.

²³Nduyɛ, le nɔm nda co naa diwvo lepalaa-lepala ni, le nɔm nda co naa cɔu ni maa saa nda co yɔɔ o fonda diyaa n'cɔloo-a.

²⁴Cɔn Maalii! Le yɛɛ n co yɛ lɔan? Tiondu! Kɛɛ naa le fɛɛn a fɛɛn te.

²⁵Le yɛɛ nɛ n co yɛ naa hɔlla faŋallo? Le yɛɛ n co yɛ sanga co naa coo-o a mɔnɛi naa n co nin-nde pɔɛɛnɔnndo?

²⁶Má cè mɛɛ naa n co siaandiaa o cundoo nin yɛ! Dembela naalan la baalan a puuloo.

²⁷Lelan, cɔn ma mala naa. Baŋa naa le vanakɛndɛyɛi nɔmnde.