Read Kissi Condii lisai 46 Bible Online

Condii lisai 46 - Kissi bible

Condii lisai 46

¹Condii poaa Kore-a, í fula o condun simlacinɔ vanaa n'condua nin-nde. A ɲɛ-caa vana soli ndi ni.

²Hala co nɛɛ viannaŋaa naa a kpaki naa ni, vana co naa malaa lɔ́ɔ́-lɔ́ɔ̀ o buulanndan nin-ndo.

³Lelan, siòòŋii co naa a ɲɛ-ɲɛ le. Hali lɛŋnden le va bɛɛ ɲiiyaa, mì pembon va koombiaa o mɛmma ihɛllan tɛɛn,

⁴mì mɛnndan ma va iyongban-yongbannde, mì hiiyo va fulaa, mì ma hel háá mì pembon ɲiiya, siòòŋii bíì naa le.

⁵Pee bɛndoo pum co, o tɛyun ndɔn co kobi Hala-o kɔllo nɛŋio-o, fonda diandaa-diandaa Hala-Hiow-Ɲɔɔn-Kpow-vo-o.

⁶Hala co o kobi kon kɔllo, o delnin te, idii púŋ, o pena ndu mala.

⁷Vanaa-mangalaa-isɔɔa co vɔngaa, masɛi co hiilɔnndo, kɛ Mɛlɛka co diomndo solio, mì lɛŋnden le va puusianndo.

⁸Mɛlɛka-Nɔ-Kpaayaa-Kpow-vo co naa ikɛi, Hala Yakɔb-o co fonda mayoomoo le naa ni.

⁹La hun mì la tofa dɛnnda Mɛlɛka tosa lan, dɛnɛ tambɛi o tuisi o lɛŋnden coo-o pɛɛn.

¹⁰Ndu cii cɔwlan ni háá o lɛŋnden mɛɛlulan, mò tɛɛmbuu kpaasiaa, mò yimiyimi kɔɔn, mò lom ɲɛla ɲaanannda soa nan-ndan.

¹¹Mɛlɛka co yondaa aa: «La sim mì la sina maa ya co Hala ni, ya co masalen tosaa vanaa-mangalaa-isɔɔa coo ni, ya o labɛngunin lɛŋnden le co ni.»

¹²Mɛlɛka-Nɔ-Kpaayaa-Kpow-vo co naa ikɛi, Hala Yakɔb-o co fonda mayoomoo le naa ni.