Read Kissi Condii lisai 50 Bible Online

Condii lisai 50 - Kissi bible

Condii lisai 50

¹Condei. Condii fula o condun Asaf-on nin-nde. «Hala-Hiow-Ɲɔɔn-Kpow-vo soo. O veelu vanaa co o lɛŋnden coo-a, cɔnɔnndo nɛɛ paalen le can-nda, kɔlan háá nɛɛ le del-la.

²Hala fula ceen o kobi kɛndɛ-kɛndɔɔ Siɔn nin, ɲɛ-tengaa balu ndu pindo.

³Màá Hala naa hun! Màá o mei le! Yinnden le co ndu sandei laci vulɛi-vulɛi, hoeyii fùkù-fùkùei balu ndu sɔ́.

⁴Hala yoongu halataalaa coocoo a lɛŋnden, le yaman vanaa ndɔa kiolɔɔ.

⁵O dimi aa: ‹La cuungial-la vanaa lo o lediom coo a ya-a, á soli sálàá má yii kpemaa a ya-a pɛɛn.›

⁶Halataalaa co cɔmndo maa Hala sandu, kani ndu Hala pila co vana kialaa n'yamaa ni.

⁷Hala co dimio aa: ‹Yungu nuu, la yaŋnun, mì soo. Niaa Israɛlla, i tɛndanin seilen a niaa o kɔɔ, ya co Hala ni, Hala niaa pɛɛn.

⁸O co le sálàla niaalan te ya co niaa kɔɔsallo le, sálàla loamaala niaalan la co ya o hɔl lɔ́ɔ́-lɔ́ɔ̀.

⁹I kuenin mì kɔ cua naw tova o niaa lo cɛinin te, te kon te mì kɔ cua cuinaa niaa nɔ o hèéla niaalan nin-nda.

¹⁰Kani visia co o bundɔɔ nin-nda kpow, ya nɔ ni, haa o pembon coo nda co vaalan o vaalan nin.

¹¹I sina yovaa co o pembon coo-a kpede, ɲɛ-ɲɛ co kelaa yondoo nin, ya nɔ ni.

¹²Te yiaan máà va ya pɛ nɛiyo, i ve niaa bɛɛ ɲɛ-ɲɛ dimul te, kani ceendo a ɲɛm co lenin-ndon kpow, ya nɔ ni.

¹³Vɛ̀ɛ̀ visin navaa tovaa ya dianin ni? Bàà kooma cuinaa toovia ya kolnin ni?

¹⁴O co fisa mì la solul-la sálàla malaa balikalan, ya Hala niaa pɛɛn, mì la peelu ciɛ́ɔn niaa cua o ya lo-on, ya Hala-Hiow-Ɲɔɔn-Kpow-vo.

¹⁵O kon, paale niaa vanin o buulanndo nin-nden, la piɛi ya. I baŋanin niaa, mì la biilu ya.›

¹⁶Kɛ nuaa Hala dimul vanaa kɔlvesɛiya ni aa: ‹Le yɛɛ niaa co yɛ tɔŋnda nilan dimio a lebol, mì la va sɔɛi o ciɛ́ɔn niaa cua o ya lo-on coo?

¹⁷Niaa yɛ, la yeema sila tueyɔɔ le, la co sɔɔn nun kɛɔ few-few.

¹⁸Te la ce pɛ vuiyo, la sim ndu kɔɔli. Niaa vanaa suundaa co kelaa ni.

¹⁹Sɔɔn vɔɔŋun caanda kínɛí niaa co dimio ni, sɔɔn huiyaa n'vanndon kposon co vɛlɛ niaa o lasondo ni.

²⁰La cal pɛ, la cal puapilɛa niaa congòó, la tɛɛmbuu vanaa niaa fula kala pilɔɔ-a diolan.

²¹Dɛnnda niaa va tosaa mì va meinɔnndo lan la co lan ni. La co yiyanndo maa mɛɛ niaa co yɛ ya co ni. Kɛ i bii niaa tɛ̀ɛ̀, i co dɛnnda lan soli niaa o hɔl vakpa.

²²Lelan, niaa vanaa co ya Hala pɔɛɛnɔnndo-a, la bii sɔɛi he bila, yɔŋii ya tɛɛmbuu niaa, vana-vana baŋanin niaa le.

²³Vana-vana solul-la pɛ sálà malaa balikaa, mɛɛ ndu biilu ya. Vana-vana caa pɛ kelaa, i cɔmnin ndu maa ya co vana ciindiaa ndɔɔ ni.›»