Read Kissi Condii lisai 56 Bible Online

Condii lisai 56 - Kissi bible

Condii lisai 56

¹Condii David-e, í fula o condun simlacinɔ vanaa n'condua nin-nde. A ɲɛ-caa nɔ diolan aa «Poonpoon co caŋndo levil o yɔmii terebɛntiei nin-ndo»-o o soli ndi ni. Telen Filistia bii ndu Kad-o:

²Éé Hala, tuinun ya iɲíí, kani vannda co ya ciŋilanndo. Niinoo kpɛŋ, a co ya cɔlɔbaa, a co ya tisaa coo.

³Yaamɔaa nia co ya hinullo lepalaa-lepala. À co sɛlɛ, vanaa co hunɔɔ ya delɔɔ coo a ya ŋɔɔciaa-a.

⁴Kɛ paale siòònde bii ya ko, i tiindàn nɔm.

⁵I candu Hala le sɔɛi o dimi-e, ndu ya tiindan ni, siòòŋii co ya le. Yɛɛ vanndacieea nɔla yɛnin tosaa a ya?

⁶À co balɔɔ a ya o lasondo lɔ́ɔ́-lɔ́ɔ̀[14]. Tuula vɔɔnndan kínɛí nda nɔ o lakɔl a ya ni.

⁷A co ya dúmbóó yiiyo, a co mɛngɛlaa, a co cumullo o nɛila nilan coo, kani a yeema mà dii ya.

⁸Éé Hala, vɛ̀ɛ̀ ma mal nda hiɔlɔnndo a yɔŋ vɔɔn nda co hoo tosaa-o? Tuisi kɔltuw nɔmndo vanaa kan coo.

⁹Nɔm Hala, a co cɔmndo mɛɛ ya sɔndan bɛmbɔɔ kpɛ́ɛ́ yɛ. Haw mɛmɛma nian o bɔlɔ yáw-cuin nɔmndo nin. Vɛ̀ɛ̀ a cii man sɛva o sɛbɔɔ nin te?

¹⁰Te i koŋul pɛ nɔm o lani, yaamɔaa nia ɲaanun. I sinà maa nɔm Hala, a co le ya.

¹¹I candu Hala le sɔɛi o dimi-e. A toɲa, le sɔɛi o dimi ken-nde ya candu ndu Mɛlɛka ni.

¹²Ndu Hala ya tiindan ni, siòòŋii co ya le. Yɛɛ vanndacieea nɔla yɛnin tosaa a ya?

¹³Éé Hala! Fɔ mì peelu ciɛ́ɔn ya cua a nɔm-ndon. I solinin sálàla malaa balikalan o nɔm-ndo.

¹⁴Kani a baŋa ya piɔ́mndo o ba. A cɛl-la mì siɛla mì vi le. A tosa kon haliko mi va kelaa nɔm o hɔl, o ɲɛ-tengaa vanaa yoomaa nin.