Read Kissi Condii lisai 58 Bible Online

Condii lisai 58 - Kissi bible

Condii lisai 58

¹Condii David-e, í fula o condun simlacinɔ vanaa n'condua nin-nde. A ɲɛ-caa nɔ diolan aa: «Tɛ́ɛ́mbùù le»-o o soli ndi ni.

²Vɛ̀ɛ̀ a toɲa, o meiyo nin niaa kialunin yaman ni? Vɛ̀ɛ̀ o sandei nin niaa co yaman kiolɔɔ vanndacieea tɛɛn nuaa ni?

³Kafalan niaa co tosaa ni. Mɛɛ hɛnan niaa co yɛ niaa co tosaa ni. Dɛnnda kɔlvesɛilan niaa co tiwvo o lɛŋnden coo ni.

⁴Vanaa kɔlvesɛiya lo vɔ o demboo nin mà laasian. À fula dɔɔ pɛ kalaa ndaa o ipulu à mal nɛiyo, à kandu sɔɔn lacòòvan dimio.

⁵Maa lólò kɛw lólò ndaa co ni, maa lólò hɔ̀ɔ̀lɔ́ baŋul nilan-ndo, lólò ndaa co ni.

⁶Hɔ̀ɔ̀lɔ́ tui vana kpɔ́lɔ̀ɔ́ diom too, hali vana kpɔ́lɔ̀ hiow vanaa kpɔ́lɔ̀a-o.

⁷Éé Hala! Yimi nda ciŋndon o lasondo. Pesi yàlàá ha yaalelan, Mɛlɛka!

⁸Màá a hiow mɛɛ mɛnndan ma hiaw nuaa yɛ! Màá kɔɔn nda co vuuo-on bumbula![15]

⁹Màá a tenga mɛɛ mɛngɔɔ kɔa a tengaa nuaa yɛ! Màá a ca paalen te, mɛɛ cɛlɛkpɛ nda viiku-o cì paalen nuaa le yɛ!

¹⁰Lɔ́ɔ́ pá mì yɔmii n'yɔɛi niɛi siŋnun bɔɔ, yɔmii ken va ikiyɛi, ì va ivesɛi, màá hoeyii fùkù-fùkùei basu vanaa vɔɔŋaa kan![16]

¹¹Vana sandaa dɔawnunnin ɲaale, kani o canin Hala vanaa kɔlvesɛiya màá mingullo, o kon mò kela o kooma ndan nin.

¹²Vannda diminin o kon aa: «A toɲa, vɔ̀ngɔ̀ɔ́ co le vana sandaa. Hala pum co, o co yaman kiolɔɔ o lɛŋnden coo-o.»