Read Kissi Condii lisai 62 Bible Online

Condii lisai 62 - Kissi bible

Condii lisai 62

¹Condii David-e, í fula o condun simlacinɔ vanaa n'condua nin-nde, Yedutun pɛɛn.

²Hala ikɛi damaa ya calnùn nila ɲulu ni, ndu Hala o ba cinda nuu cɛn tum ni.

³Ndu kínɛí co pow kpovaa, cindaa, a kpaki nuu ni, i boŋnin lɔ́ɔ́-lɔ́ɔ̀ le.

⁴Háá lɔ́ɔ́ kuɛɛ niaa lo yɛnin vanndo delɔɔ coo, mì la lo ndu kpuuviaa le ndu diyɔɔ mɛɛ cìì cɛiye komba nuaa yɛ, te kon te mɛɛ kungaa komba nuaa yɛ?

⁵Vannda yeema mà faŋa ndu o fonda o co-o. Còòlan la hɛnan nda ni. A co duaalan dɔvɔɔ a lasondo, kɛ a co dangalan dɔvɔɔ o kɔl nin.

⁶A toɲa, ó Hala lo kínɛí kɔl nuu sɔla pɛngio ni, kani o ndu nin tiindan nuu cɛn tum ni.

⁷Ndu kínɛí co pow kpova nuu ni, cinda nuu a kpaki nuu, Lelan i boŋnin te.

⁸Cinda nuu a bɛɛle nilen le co Hala o ba. Ndu co pow kpovaa a nɛɛ nia viannannda ni.

⁹Niaa vanndacieea sei! La vá Hala tiindanndo lɔ́ɔ́-lɔ́ɔ̀, la kɛsí ndu kɔltan coo, kani ndu co nɛɛ viannannda le naa ni.

¹⁰Ɲaa yoomaa daama vanndacieea co ni, sɔɔn lacòòvan kínɛí n co nda o lasondo ni. Te vana heelu nda pɛ o kiloo coo, nda kpow, lusul ndaa tiiya maa lusul ihoeiyo le.

¹¹La tííndàn delɔɔ coo le, la handu kɔltan o vannda ɲɔɔn puuwvo o laba coo le. Bolofaa niaa va bɛɛ handɔnndo lecoo, la handu kɔltan lecoo le.

¹²Ɲɛ Hala dimi mì tuɛi ndu lɔ́ɔ́-lɔ́ɔ̀-o co ni aa: «Hala nɔ kpaayaa ni.»

¹³Nɔm Maalii nɔ vɛlɛ kaolaa ni, kani a mingulnin vana-vana mɛɛ dɛnnda ndɔlan la co yɛ.