Read Kissi Condii lisai 63 Bible Online

Condii lisai 63 - Kissi bible

Condii lisai 63

¹Condii David soli-e, telen o va Yuda o lɛŋnde veselɛilen nin-ndo.

²Éé Hala, nɔm Hala nuu, i co nɔm nuwviaa. Kɔl nuu co nɔm yeemaa mɛɛ kolɔɔ vesa vana nuaa yɛ. Dialun nun co nɔm sangaa kɔɔli o lɛŋnde veselɛile kálà-kálà len nin nɛɛ mɛmma co le-a.

³I viow nɔm tofaa o Fonda-Diandaa nin, mí ca kpaaya nɔmndo a vanabɛnduyɛi nɔmnde.

⁴Kani kaola nɔmndo co fisa a yoomoo. Sondo nuu vanin nɔm sangalaa.

⁵Háá mì vi, i vanin nɔm balikaa mello, i vanin balan heeloo coo mì va nɔm piɛiyo.

⁶Kɔl nuu pumnin dɛnɛ kɛndɔɔ mɛɛ vana pum balo kɛndɔɔ nuaa yɛ. I yondanin a ɲaaloo mì solul nɔm condon.

⁷I hini pɛ o kpele nuu coo, i yiyan nɔm coo, icɔl pii, i co kɔllo keelaa nɔm coo.

⁸Kani nɔm co vana co ya malaa-o ni. I co yondaa a ɲaaloo o vunduma kumbannda nɔmndan bɛngu.

⁹I yɔngun nɔm a kɔl nuu kpede, nduyɛ kpaaya nɔmndo co ya malaa.

¹⁰Vanaa co ya kɔɔli le ya diyɔɔ-a tambunin, a toalnin o lɛŋnden bɛngu dí.

¹¹Màá a diw nda a mɔɛi cɔwve, mà siŋnun balo tiivolla!

¹²Kɛ masaa dɔawnunnin ɲaale o Hala nin, mì vanaa co ciɛ́ɔn cuaa o diola Hala lan-nda dɔwnun ɲaale, kani vanaa lacòòvaa meinin kpili.