Read Kissi Condii lisai 64 Bible Online

Condii lisai 64 - Kissi bible

Condii lisai 64

¹Condii David-e, í fula o condun simlacinɔ vanaa n'condua nin-nde.

²Éé Hala, tuei cɛɛŋɔnnda nilan. Siòònde co ya a yaamɔaa nia, kanda ya.

³Vion ya mì faŋan vanaa yɔŋ vɔɔnda ha ikɛi, a vɔkɔ-vɔkɔ vanaa co haa dɛnnda vɔɔnndan tosaa-a-o.

⁴À cii diɛɛmui ndɛi cɛɛŋa maa mɔɔn cɔw, a co sɔɔn vɔɔnndon dimio maa kɔɔn nɛyaa-nɛyaa.

⁵A co vana tɛɛmbuu isɔɔ loo vuuo nɛɛ nda co a viannannda-a, a voolu ndu ma vuu ndu, buulan co nda bɛɛ le.

⁶A co yoomuan lueyanndo a tuula vɔɔnndan, a co baltan dɔvɔɔ o yaŋɔɔla nda hɛɛnduu lan coo aa: «Ɔ́ɔ̀ vana canin lan-ndo?»

⁷A co sɔɔn lakafan tuuvo mà va dimio aa: «Tuu kɛndɛ-kɛndɔɔ naa n tuu nuaa ni.» A toɲa, yiyan vanacieo yingila, o kendu mì vana bii ndu bila.

⁸Kɛ Hala vuu nda a bállo, mó lɔaa nda o lepilɔɔ.

⁹A cii biinɔn a sɔɔn ndan nda pilan, vanaa co nda cɔu-va kpow co nda mamɔɔ mà va bolle hiiluuo.

¹⁰Siòònde biinin vannda kpow, mà dimi dɛnnda Hala tosa lan. A biinin kɔlɔ o tosa dɛnnda lan-ndo bila.

¹¹Vanaa sandaa dɔawnunnin ɲaale o Mɛlɛka nin, mà vennun o ndu nin. Vanaa dendu kɔltan-nda kpow a lisanin ndu Mɛlɛka.