Read Kissi Condii lisai 65 Bible Online

Condii lisai 65 - Kissi bible

Condii lisai 65

¹Condii David-e, í fula o condun simlacinɔ vanaa n'condua nin-nde.

²Biiloo co le nɔm Hala co Siɔn-ndo. N peelunin ciɛ́ɔn naa n cua o nɔm ndo-on,

³kani a cii piɛile naalen muli. Vannda kpow a co hunɔ̀ɔ́ o nɔm ndo.

⁴Tɛɛmbuula nilan la lusul bɔɔ, kɛ nɔm, a malnin naa haki.

⁵Dɛnɛ kɛndɔɔ co le vanaa n hɛli má sɔɔngun ikɛi le calle o nɔm ndo cɛinin-nda. N pumnin dɛnɛ kɛndɛ co o nɔm ndo cɛinin-ndo, ó co o Cɛi-Diandaa nɔmndo nin-ndo pɛɛn.

⁶Nɔm Vana ciindiaa naa, a mulul naa a dɛnnda kaamaalan, a á sandii nɔmnde. Vanaa co o lɛŋnden mɛɛlulan-nda, a vanaa co o lɛŋii co o mɛnndan tɛɛn-nde-a kpow a co nɔm tiindanndo.

⁷Nɔm simi pembon yili a yoomuma nɔmndan ni, kani vana kpaaya bɛndoo n co ni.

⁸Nɔm kpaa mɛmma yongban-yongbanndan ni, nɔm koni kpaa tindima mɛmma ihɛllan ni. Nɔm ɲumi vɔkɔ-vɔkɔ vannda súúlan kpow ni.

⁹Siòònde bii vanaa co o lɛŋnde mɛɛlulan-nda le dɛnnda kaamaala nɔmndan. Vanaa co ba paalen le can-ndo-a a vanaa co ba paalen le del-lo-a a co yondaa a kɔlkɛndɔɔ.

¹⁰Nɔm Hala, a co lɛŋnden bɛɛndiaa, a co len pɔɔliaa taw, mí bolofaa va kuiyo ɲɛkɛndɛi. Pee pɔmbɔ Hala-o co o piaa cá a mɛnndan. Baloo n co bɛɛndiaa lende le vanndacieea ni.

¹¹A co kpolonndan pɔɔliaa má va puulu n'kpungbaa pesio, a co piɔɔ tuisio lɛŋnden coo, mí tɔlɔɔlan la va vulɔɔ ɲɛkɛndɛi.

¹²A siow vɔsio a ɲɛm kɛndɛn nɔmndon, ɲɛ-sɔlaa co talaa nɔm kɔɔli o nɛila nɔmndan coo.

¹³Billo co puiyo o lɛŋnde veselɛilen nin, yoondiaala kɔlkɛndɛlan la balu pembon maa leyáw.

¹⁴Cɔlua pɔmbɔa pɛ o bil puiyaa nin, maalon co n'piaa o bóltan nin. Yondoo kpow co nɔm Hala sangalaa o condon nin.