Read Kissi Condii lisai 66 Bible Online

Condii lisai 66 - Kissi bible

Condii lisai 66

¹Condei, í fula o condun simlacinɔ vanaa n'condua nin-nde. Niaa vanaa co o lɛŋnden coo-a kpow, la sangala Hala.

²La lisa diola ndɔla tɔ́ɔ́ bɛndulan o condon nin, la biilu ndu o condon nin.

³La dimul Hala aa: «Dɛnnda nɔmndan la co bɔɔ dɛnnda kaamaala bɛndu! Le kpaaya nɔm bɛndoo, yaamɔaa nɔmnda co nɔm lisaa[19]

⁴Màá vanaa co o lɛŋnden coo-a kpow a baŋ vulan nɔm o labɛngunin, mà lisa nɔm! Mbɔ̀, màá a lisa diola nɔmndan!»

⁵La hun mì la ce dɛnnda Mɛlɛka lan. Dɛnnda o co tosaa le anndacieea lan la co dɛnnda kpulunkumala bɛndu!

⁶O veeliàà mɛmma ihɛllan, mì vannda taŋ a n'pelu[20]. Lelan naa n dɔawnun ɲaale o ndu nin ni.

⁷O co masalen tosaa a kpaayaa lɔ́ɔ́-lɔ́ɔ̀. O co vanaa-mangalaa-isɔɔa mɛɛndanndo ciŋ. Màá yaamɔɔa simul ndu le dɛ!

⁸Niaa vanaa súúla yɛ́-yɛ́a, la mel Hala naa balika. La lisa ndu coocoo kpélén.

⁹O co naa lueiyo o yoomu kpeekpeiyo nin, o co naa malɔɔ siɛɛliaa mì n del te.

¹⁰Éé Hala! A yaasiaa naa kɔltan, má kei naa o ciliŋii tuwve nin mɛɛ vana kei voliei lenin le ndi dindio nuaa yɛ.

¹¹Nɔm óò bii naa o yalaa nin, nɔm óò handu volɔɔla lusulan naa o lavonga.

¹²Nɔm óò cɛl ni mì vannda va naa huuloo coo o soa. Náà n kei o yinnden nin a o mɛnndan nin, kɛ má soli naa lenin, má ke naa fonda kɛndɛ-kɛndɔɔ.

¹³I kɔanin a sálàla loamaalan o nɔm ndo cɛinin, mì peelu ciɛ́ɔn ya cua-on,

¹⁴n cɔcɔn nun a sondo nuu cua telen ya va o mɔnɛi nin-ndo-on.

¹⁵I solulnin nɔm sálàla loamaalan a cɔlua macuɛiya, i solulnin nɔm sálàlan a saa kóndóa, mì lum nɔm cuɛima cun kɛndɛan. I solulnin nɔm sálàlan a nawva a á cuinaa toovia.

¹⁶Niaa vanaa nɔ siòòŋii Hala-e-a kpow, la hun mì la yaŋnun, mì dimul niaa ɲɛ ndu Hala tosal-la-o.

¹⁷I solul ndu diomndo a sondo nuu, mí diɛɛmule nilen le lisa ndu.

¹⁸Te yáà tuunun pɛ dɛnɛ vɔɔndo o kɔl, Maalii ndóò yeŋnunnin ya le.

¹⁹Kɛ Hala tuei ya diom, mó muli piɛile nilen ɲɛkɛndɛi.

²⁰Balikaa co le Hala! Kani o kɛɛ piɛile nilen te, o faŋa vanakɛndɛyɛi ndɔɛi ya coo le.