Read Kissi Condii lisai 69 Bible Online

Condii lisai 69 - Kissi bible

Condii lisai 69

¹Condii David-e, í fula o condun simlacinɔ vanaa n'condua nin-nde. A ɲɛm-caan iyoon o soli condei he ni:

²Éé Hala, ciindiaa ya! Mɛnndan ma tiiya ya o bololan dí.

³I co mɔɔvaa o loolio yingilaa nin, fonda kɛsiaa n'pelu le simndan bɛɛ co le. I co mɔɔvaa o mɛmma yingilan nin, tindian ma co kɔnndan a ya.

⁴I co sangaa yondaa le malaa sɔlaa, diomndo kandan ya kpiŋ, i co sangaa hɔlla keeliaa le Hala nuu nuwviaa.

⁵Vanaa nɔ nɛyɔn nuu fondo fúú-a co sɛ́lɛ́, a hiow yiiŋii co ya o lebol-le vaa sɛ́lɛ́. Yaamɔaa co ya kɔɔli fondo fúú-a co sɛ́lɛ́, nduyɛ, a nɔ kpaayaa, a tiwba mà tɛɛmbuu ya. Ɲɛ ya cue loo, ndu nda baŋ ya salaa ni.

⁶Kɛ nɔm Hala, a sina diɔmii nii, biondɔnnda nilan la vinnun nɔm te.

⁷Maalii, Mɛlɛka-Nɔ-Kpaayaa-Kpow-vo, màá siɛmbulan la bíì vanaa tiindan nɔm-nda le dɛnɛ nuu le! Nɔm Hala Israɛlla, màá siɛmbulan la toal vanaa co nɔm nuwviaa-a le dɛnɛ nuu le!

⁸Kani le nɔm ya co yeowlan biuvɔnndo ni, le nɔm siɛmbulan la kuumbun ya o hɔl ni.

⁹I siŋnun miallo puapilɛa nia tɛɛn, i siŋnun vana celenndo vanaa naa n fula kala pilɔɔ o ipulu-a tɛɛn.

¹⁰Hala, kaola ya nɔ le Cɛi nɔmndo-o co ya lomɔɔ maa leyin. Yeowla vannda co nɔm-ndan yeowla lan koni nda co ya ni.

¹¹I co caŋndo, i co sumndo biyɔɔ, le ken nda co ya bɛɛlan tɛɛmbuuo ni.

¹²I vownun volɔɔla biisilan, mí nda va ya cuunduuo o condon nin.

¹³Vanaa co icali o diola luɛyaala kobio-a co ya congùlan, vanaa kolaa mamɔiya co condon a ya o lasondo.

¹⁴Kɛ ya ya, nɔm Mɛlɛka ya co piɛiyo ni. Éé Hala, mɛɛ kɛndɛi nɔmnde co ibɔɔ yɛ, cɔ ya ɲia a telen bɛnda-o! Mulul-la a vanakɛndɛyɛi nɔmnde, ma ciindiaa ya.

¹⁵Cɛ̀l mì mɔɔva o pɔ́lɔ́nndo ho nin te, soli ya. Cɛw ya vanaa nɔ nɛyɔnndo a ya-a o ba, ma soli ya o limii yingilɛi he nin.

¹⁶Cɛ̀l mì tindian man ma hiow a ya le, cɛ̀l mì pɔ́lɔ́nndo ho mel-la le, mal-la mì soondo ho kindan ya coo le!

¹⁷Mulul-la, Mɛlɛka! Kani toɲa vanakɛndɛyɛi nɔmnde naŋ ni. Mɛɛ kaola nɔmndo co o bɔɔ yɛ, mulul-la hɔlla.

¹⁸Vin ya hɔlaa nɔmnda le, ya vana nɔm baalaa. Keleŋa ya mulul, kani sangaa co ya coo.

¹⁹Sɔɔnguu ya ikɛi, mà ciindiaa ya, hiɔlu ya yaamɔaa niaa o ba.

²⁰Nɔm, a sina mɛɛ vannda co ya yeowlan yɛ, a sina mɛɛ nda co ya siɛmbulan tuisio a ya bɛɛlan tɛɛmbuuo yɛ. Yaamɔaa nia kpow a co nɔm o hɔl.

²¹Yeowla lan la co ya kɔllo bulio, i del a nàá le le ken. I co cumndo le ɲiiye sɔlaa tuinɔnndo, kɛ i co vana sɔla le. I co lehɔl o nɛi le vanaa ɲɔɔlaa sɔlaa, kɛ i co vana saalɔn te.

²²À vow bɔ̀tàá o ɲɛdiaa nuu nin, kolɔɔ biyɔɔ ya, má ke ya mɔima vaalɛiyan.

²³Màá kafola ndala ɲɛdiaalan la siŋnun yaŋɔɔlen le nda pila, a le vanaa nda veelu le dio kon-nda!

²⁴Màá a ca lɛ válán te! Màá a suma! Soli nda bùúon o lakɔɔ mà va a tundan lɔ́ɔ́-lɔ́ɔ̀!

²⁵Tuisi kɔl nɔm tuw bɛndoo nda coo. Màá kɔlfulaa nɔmndo kpuva nda!

²⁶Màá calta ndalan la tambu! Màá vana-vana cal lɛ o cɛila-kolala-toandaala ndalan bɛngu le!

²⁷Kani vanaa nɔm cii nin lɔɔ-a, nda co vɛlɛ cɔɔloo vanaa kan soŋɔɔ. Vanaa nɔm cii nin yɔŋul-la, nda co vɛlɛ keiyo tombolaa a sanga vanaa kan o lasondo.

²⁸Hala, cɔm haki nda kon o hakila ndala tɔ̀lan coo. Tuinun nda iɲii le few.

²⁹Ɲumi diola ndalan o sɛbɛ cindaa nin, cɔ̀m nda o kunda vanaa sandaa coo le.

³⁰Ya yɛ, dɛnɛ palaa a sangaa co ya coo, kɛ nɔm Hala, mala nɔmndo kandanin ya.

³¹I sangalanin diola Hala lan o condon nin, i cɔmnin bɔɔbɔɔyɛi ndɔɛi o ndu balikaa mello nin.

³²Sangala kon hiow Mɛlɛka hɛnanndo a ndu sálàla n'nawlan solullo, kon hiow ndu hɛnan a ndu naw tova nɔ leelan a buukulan-ndo sálàá solullo.

³³Vanaa bala fondoa canin dɛnɛ kɛndɛ kon, mà dɔwnun ɲaale. Màá la viow yoomu, niaa co Mɛlɛka nuwviaa-a!

³⁴Kani Mɛlɛka tuɛi vanaa bala fondoa diom, o co vanaa ndɔa co o biyɔɔ nin-nda pɔɛyɔn te.

³⁵Niaa ɲɛm co o halataala-on, niaa ɲɛm co o lɛŋnden coo-on, a niaa ɲɛm co o mɛmma ihɛllan nin-ndon, la sangala Mɛlɛka!

³⁶Kani Hala ciindiaanin Siɔn, mò mingi kobila co lo o tàndá Yuda-o nin-ndan tangul. Vanaa ndɔa calnin vɛlɛ lenin mà mingin lɛŋnde co len kɛ́ ndaa len o ba.

³⁷Poaa vanaa baalaa Hala-a sɔlanin lɛŋnde len kɛ́ɔ, vanaa kaola diola Hala lan-nda calnin lenin.