Read Kissi Condii lisai 71 Bible Online

Condii lisai 71 - Kissi bible

Condii lisai 71

¹Mɛlɛka, o nɔm ndo nɛɛ nia viannannda co ni, cɛ̀l mì siɛmbulan la bii ya le.

²Baŋa ya o sandii nɔmnde nin, tosa mì hɛlun mì kɔ vionnun. Yaŋ ya nilan ma ciindiaa ya.

³Siŋnun pow kpovaa le ya, o ya viannun nin-ndo, nɛɛ ya nɔla hunɔɔ vionnɔnndo lɔ́ɔ́-lɔ́ɔ̀-a, haliko mì sɔla cindaa. Kani nɔm co pow kpova nuu a kpaki nuu ni.

⁴Hala nuu, tosa mì hɛlun vanaa kɔlvesɛiya, mì poondan vanaa lakafaa a vanaa yɔŋ vɔɔnda o ba.

⁵Kani nɔm ya tiindan ni, nɔm Maalii Hala nuu, kabi o felengiyɛi nii nin, nɔm ya tiindan ni.

⁶Ndáà violɔɔ ya dɔ́ɔ́, mí tiindan nɔm. Nɔm soli ya kala nuu o dembe ni. I vanin nɔm lisaa lɔ́ɔ́-lɔ́ɔ̀.

⁷I siŋnun dɛnɛ kɔndɔfillo le vanaa bɔɔ-bɔɔ, kɛ nɔm co nɛɛ nia viannaŋaa kpeekpeiya ni.

⁸Màá sondo nuu piɔ a candula nɔmndan! Màá i va biilu nɔmndo cɔmndo lepalaa-lepala!

⁹Màl-la telen ya co hoo yuuvaa-o le, yamnun ya tuma yooman ma co hoo cuvɔɔ ya o n'dial-lo le.

¹⁰Kani yaamɔaa nia co kɔngɔlanndo, vanaa co ya mɛngɛlaa-a co cɛlanndo.

¹¹A co dimio aa: «Hala cii ndu yomnɔn, la kuel ndu mì la bii ndu, vana-vana venin le ndu baŋa le.»

¹²Lelan, kɔa ya levil te, Hala nuu. Hala nuu, yandi hun cɔ́-cɔ́ ma mala ya.

¹³Màá siɛmbulan la bii vanaa co ya ciŋilanndo-a! Màá a tambu labɛɛ mà laasian, vanaa yeema le ya dɛnɛ palaa tuisio coo-a!

¹⁴Ya ya, i vanin nɔm tiindanndo tuŋ, i vanin hiovɔɔ laci a nɔm sangalaa.

¹⁵Sondo nuu vanin sandii nɔmnde cɔmndo, i vanin cɔmndo maa Hala ciindiaa vana-o n co ni. Kani dɛnnda kɛndɛla n tosa lan la cuu cɔm te.

¹⁶Éé Maalii, Mɛlɛka nuu, i hunnin mì cɔm dɛnnda kpaayala nɔmndan. I cɔmnin sandii nɔmnde, sandii nɔmnde kínɛí.

¹⁷Òó Hala, nɔm pɛɛku ya kabi o felengiyɛi nii nin ni. Nduyɛ, háá hau, i co vannda dimullo a dɛnnda kaamaala nɔmndan o kɔɔ.

¹⁸Lelan, tuma ya yuuva nin hoo, mí yulunnde vul-la-o, mal-la le, Hala nuu! Haliko mi cɔm langbaa felengia ha sisa a cuaambɔa vialunnin nda kɔɔli-a kpaaya nɔm bɛndoo.

¹⁹Òó Hala! Sandii nɔmnde tiiya háá o halataala, kani a tosa dɛnnda bɛndulan. Ɔ́ɔ̀ vana siiman a nɔm-ndo, Hala?

²⁰A tɔɔndan bɛɛ ya a dɛnnda imɔnɔlan a á dɛnnda palaalan nuaa taw, kɛ a mingin yoomoo ya o milin, a solinin ya o lɛŋnden bɛngu, o sɛiyo nin pɛɛn.

²¹A tosanin mì vannda cɔɔlu ya bɛɛlen ke, a ɲɔɔlunin ya vɛlɛ ɲɔɔlu sɛnɛi.

²²Ya vɛlɛ bɛɛ, i lisanin nɔm a bangaa le tùú n lo o lediom coo-o. Hala nuu, i lisanin nɔm a bondomaa, nɔm O-Diandaa Israɛlla.

²³Telen ya vanin nɔm condon solullo-o, cɔcɔn nun yondanin a ɲaaloo le baŋa n baŋa yoomu nuu-o.

²⁴Diɛɛmule nilen le vanin dimio telen oo telen maa a sandu, kani siɛmbulan la tol vanaa yeema le dɛnɛ palaa tuisio coo-a, mà tambu labɛ̀ɛ̀ pisika!