Read Kissi Condii lisai 73 Bible Online

Condii lisai 73 - Kissi bible

Condii lisai 73

¹Condii Asaf-e. A toɲa, Hala co vana kɛndɛ le Israɛlla, o co vana kɛndɛ le vanaa dendu kɔltan-nda kpow.

²Nduyɛ, ndóò lo cobe mì yáà siɛla, ndóò lo nin ɲɛ-pɔmbɔ nuaa mì yáà del.

³Kani i va vanaa kuundiannda paŋalaa, le tùú ya va dɛnɛ kɛndɛ vanaa kɔlvesɛyaa kan cɔu-vo.

⁴Vanaa kan, háá piɔ́mndo, dɛnɛ palaa komalnin nda le. À ningila, à connun kɛndia.

⁵Sanga tul nda coo maa vanndacieaa tɔ̀a le, Bɛpɛla co vanndacieaa tɔ̀a coo-o co nda nda coo le.

⁶Lelan nda landun yongaa o labolo ni maa yɔɔva, má vownun yɔŋ vɔɔndo maa volɔɔla cuɛinan.

⁷À co a ningilaa ningili a celullo, a hiw hɔlla helɔɔ a dɛnnda nda co tuunɔnndo o kɔl-tan.

⁸À co vannda mamɔɔ, à co sɔɔn kɔlvesɛiyon dimio, à co sɔɛi vannda coo a yongaa le nda saangiaa.

⁹À co halataalaa sondoo heelɔnndo, diɛɛmui ndɛi co kelaa yeowlan o lɛŋnden coo.

¹⁰Lelan vannda co mulinndo o nda lo nuaa ni, má va sɔɔn ndan kolɔɔ maa mamɛn.

¹¹Vanaa kan co dimio aa: «Hala co ɲɛ-ɲɛ sina le se! Yɛɛ Ó-Hiow-Ɲɔɔn-Kpow-vo sinà yɛ?»

¹²Ɲɛ vanaa kɔlvesɛiya co tosaa-o co hoo ni: À co bolofaa ndaa cɔɔloo vangalaa a kɔlkɛsiaa bɛɛn-bɛɛn.

¹³Mɛɛ fondoo fúú ya sangan kɔl nuu mandaa o diandaa ni, mí pulu balan le cɔmndo maa i nɔ ba o yɔŋ vɔɔn nin te.

¹⁴I co lɔɔ sɔlaa lɔ́ɔ́-lɔ́ɔ̀, i co saangiaa sɔlaa idii oo idii.

¹⁵Te yáà dimi pɛ sɔɔn vɔɔnndon maa nda, mɛɛ cuavaa nɔmnda yáà yii nin dúmbú ni.

¹⁶Le hee, mí keela kɔllo le sɔɔn mun bilaa biyɔɔ, kɛ mí ca maa dɛnɛ kala bɛndoo pila co kon ni.

¹⁷Kɛ yáà luɛyɔɔ o Cɛi-Diandaa nɔmndo nin, mí sina ɲɛ kelun le vanaa kan siɔdii laci-o.

¹⁸A toɲa, a simi nda o nɛila vana siɛla coo lan coo, má yàà nda o tambei nin.

¹⁹Ɛ̀ɛ̀ nduyɛ, má cè mɛɛ nda tambu o lepilɔɔ yɛ, siòòŋii bɛnduei cii nda kpow.

²⁰Maalii, nɔm a cɛn dɔ́ɔ́ pɛ, nda lo mɛɛ vana pɔɛɛnun lɔma sɔlaan nuaa yɛ.

²¹Tuma kɔl nuu va o tambɛiyo taw a sɔɛi he, mì diallon kpede n yomi ya mengelen-ndo,

²²mí siŋnun diɔm sondo vesɛiyo, i ve ɲɛ-ɲɛ bila biyɔɔ le, mí siŋnun maa visi nɔm o hɔl.

²³Ya yɛ, i co vɔ nɔm ikɛi lɔ́ɔ́-lɔ́ɔ̀, má bii ya ba kɛndɔɔ.

²⁴A co ya nɛiyo a silalan mɛɛ n yeema yɛ. Handɔɔ o kon coo, a lueinin ya o biilu nɔmndo nin.

²⁵Nɛ̀ɛ̀ celen ya nɔ yɛ o halataala le o nɔm kɔɔli? O nɔm kɔɔli, i yeema ɲɛ-ɲɛ celen o lɛŋnden coo le.

²⁶Dialun nun a kɔl nuu co yɔkpaa, kɛ nɔm Hala vanin pow kpova nuu a kɛ́ nuu le fɛɛn a fɛɛn ni.

²⁷Vanaa co nɔm Hala faaŋianndo-a co yoomu ndaa ciiyo, vanaa co kɛɔ le lou o lediom coo a nɔm-nda co tambei.

²⁸Kɛ ya ya, dɛnɛ kɛndɛ nuu, ndu co lou nɔm Hala o ibuŋ ni. Nɔm Maalii, nɔm co Mɛlɛka-o ya tiindan ni, i cɔmnin vannda dɛnnda nɔmndan kpow.