Read Kissi Condii lisai 78 Bible Online

Condii lisai 78 - Kissi bible

Condii lisai 78

¹Condii Asaf-e. Vanaa nia, la yaŋnun pɛɛku ya co niaa-o, la yaŋ nilan o sɔɔn co fulaa ya o sondo-on!

²I co sondoo kumbio le sɔɛi o talelan nin, mì cɔm niaa dɛnnda viannannda masindɛlan.

³Dɛnnda naa n tuei, mí n sina lan, dɛnnda fuɲaa naa dimul naa a lan o kɔɔ lan.

⁴N vinnin cuavaa naa dɛnnda lan te, n cɔmnin vɛlɛ lambila co hunɔɔ violɔn-ndan dɛnnda kalalan: dɛnnda kaamaala Mɛlɛka tosa lan, kpaaya ndɔɔ a ɲɛm kɛndɛn o toosiaa-on pɛɛn.

⁵O yɔngu Yakɔb nda vanaa ndɔa silalan, mó hendu Israɛlla tɔŋndan. Mó dimul fuɲaa naa mamaa le cuavaa ndaa sɔɔn mun pɛɛkoo.

⁶O kon mì lambila hunnin nda kɔɔli lan, a cuavaa vialunnin nda kɔɔli-a sina dɛnnda lan, mì nda bɛɛ a hun cɔm cuavaa nda vialunin-nda sɔɔn mun,

⁷haliko ma laalan Hala, ma bii tɔŋnda ndɔlan, yɔŋii nda pɔɛɛnun dɛnnda kaamaala o tosa lan.

⁸O kon nda ve lɛnin maa lambila fuɲaa ndaa mamaa le, a kɛɛ kan sɔɛi Hala-e biyɔɔ, má kindi nilan-nda pɛɛn, vanaa mangala kan yiyanndan a Hala, má kɛɛ le lou o lediom coo-a.

⁹Vanaa fula o polale Efraim-nden nin-nda ndáà nɔ kɔɔn o laba o paale cɔwlen, kɛ a kon kpede, má sɔɔndian.

¹⁰A bii kpema Hala ndóò yiilu nda-o le, má kɛɛ le kelaa o tɔŋ ndɔɔ coo.

¹¹Má pɔɛɛnun dɛnnda bɛndula ndɔlan, a dɛnnda kɛndɛla o cɔm nda lan.

¹²Hala tosa dɛnnda kɔndɔfiltan fuɲa ndaa mamaa o hɔl, o lɛŋnde Esipte len nin, o tàndàá Soan nin.

¹³Mó tɛnda mɛmma ihɛllan, má taŋ, mó simi man maa cìì cɛi[29].

¹⁴A tindile ikumnden o va nda simndan laci ipala ni, icɔl-lɛ, a tindile leyinnden.

¹⁵Mó tɛnda powta kpovalan o lɛŋnde veselɛilen nin, mí mɛnndan ma fula taw, mó ke nda man le kolɔɔ.

¹⁶Mó soli peela pɔmbɔlan o powvo, mí mɛnndan ma kɔa volo-volo maa mɛmma pee.

¹⁷Kɛ má hiaw laci a hakilan tosaa a Hala, má simul Ó-Hiow-Ɲɔɔn-Kpow-vo o lɛŋnde veselɛilen nin.

¹⁸Má tiŋ Hala o kɔlta ndalan nin, má ɲuna ndu le ɲɛdiaa dioo háá mà pim.

¹⁹Má soaa sɔɔn vɔɔnndon a Hala, má ɲuna aa: «Vɛ̀ɛ̀ Hala nɔla pá mò ke naa baloo o lɛŋnde veselɛilen nden nin?»

²⁰Nduyɛ, mɛɛ Hala tɛnda pow kpovaa, mí mɛnndan ma fula, mí peelan la piɔl. Má dimi aa: «I co toɲa, kɛ vɛ̀ɛ̀ o nɔla yɛnin naa vanaa ndɔa baloo dɔvɔɔ, mò ke naa vision?»

²¹Mɛlɛka tueyɔɔ sɔɔn nda va mun dimio-on, mó tuulu kɔl a yungu Yakɔb-o, mó fula kɔl a Israɛlla.

²²Kani ndáà laalan ndu Hala le, ndáà laalan te maa o va nda baŋa.

²³O kon kɔɔli, mí Hala dimul yumbuyumboo, mó kumbi diolan o halataalaa.

²⁴Mó tuisi manne nda coo le nda baloo dɔvɔɔ, mó ke nda ɲɛdiaa fula o halataala-o.

²⁵Mí vana-vana dia balo mɛlɛkaa, mí Hala yɔngu nda baloo taw-taw.

²⁶Mó soli hoeiye a ba paalen le can-ndo fulaa o halataala, mó cuu vɛlɛ hoeiye fulaa a ba too a kpaaya ndɔɔ.

²⁷Mó cucu vision nda coo taw maa cundu, mó hulu yowva nda coo bili-bili[30] maa sióónndon o mɛmma ihɛllan kɔngɔ.

²⁸Mó tuisi nda o dɔ́ɔ́ngɔ́ ndaa tɛɛn, o cɛila-kolala-toandaala ndalan balɔɔ.

²⁹Mí fuɲaa naa mamaa dia, má pum, mó ke nda o ndáà yeema-o.

³⁰Kɛ ndáà cii-yɔ hiluan solin te, visin mun va vɔ nda o lasondo,

³¹mí kɔltuw Hala-o toal nda coo, mí Hala diw vanaa mayoomua nda tɛɛn, mó cɛɛluu langbaa felengia Israɛlla.

³²Kɛ a kon kpede, a va hiovɔɔ laci a hakilan tosaa, a laalan dɛnnda kaamaala Hala tosa lan-ndan te.

³³O kon, mí Hala cii nda o lepilɔɔ, má siow vɔsila ndalan o kɔl yulan-yulanndo nin.

³⁴Te Hala ndóò cɛn pɛ le nda diwvo, ndáà muungu ndu o ibuŋ, ndáà nuwviaa ndu le nda malaa.

³⁵O kon ndáà yiyan maa Hala co Pow kpova ndaa ni, maa Ó-Hiow-Ɲɔɔn-Kpow-vo co vana baŋaa ndaa ni.

³⁶Kɛ a va ndu huiyo a lasondo, a va ndu sɔɔn lacòòvan dimullo.

³⁷Ndáà kɛsi ndu kɔltan coo ɲɛkɛndɛi le, a ve lo o lediom coo a kpema ndɔɔ le.

³⁸Kɛ ndu Hala, le tùú o nɔ ɲííye taw-vo, mó va nda hakilan malɔɔ, mó kɛɛ le nda ciiyo diwvo. Lɔ́ɔ́ lepum, o ɲulul kɔl, o ve kɔl ndɔ tuwvo tindi le.

³⁹Kani o va yiyanndo maa vanndacieea daama nda va ni, ɲaa yoomaa vu, a muungu lɛ le-a.

⁴⁰Telennda bɔɔ-bɔɔ, a va Hala simullo o lɛŋnde veselɛilen nin, má va ndu tiŋɔɔ o fondala vesɛilan.

⁴¹A va Hala ciŋilanndo tuŋ, a va O-Diandaa Israɛlla kɔllo tɛɛmbuuo.

⁴²A yiyan a ɲɛ o tosal nda a ba ndɔ kpaayaa-o le, a yiyan a paale o baŋa nda yaamɔaa ndaa o ba len te.

⁴³Má pɔɛɛnun sɔɔn kɔndɔfilin o tosa Esipte-on, a dɛnnda kaamaala o tosa o tàndá Soan-ndo nin-ndan.

⁴⁴Mí Hala siinguu mɛmma va o peelan nin-ndan koovan, Esiptea nɔla man kolɔɔ le.

⁴⁵Mó solul nda sunbungaa, mí sunbungaa kan kisikisi nda, mó solul nda vɛlɛ ŋɔɔŋɔɔnda, mí ŋɔɔŋɔŋaa kan tɛɛmbuu ɲɔɔn kpow.

⁴⁶Mó mal tɔlɔɔla ndalan kamballa o ba, mó mal vɛlɛ kɔmnde vali nda tosa-o sóónɔa o ba.

⁴⁷Mí loeon delian tɛɛmbuu nakɔla n'rɛsɛnnda ndalan, mí loeon tɛɛmbuu buumbui ndɛi yondolan nin.

⁴⁸Mó soli vɛlɛ piɔɔ loeon deliaa, mí loeon mun tɛɛmbuu cɔlua ndaa, mí taŋndan ma tɛɛmbuu cɔlua ndaa kundaa.

⁴⁹O mɛɛlulan, mí Hala tuisi niko Esiptea dɛnndan ndan coo: kɔltuw bɛndoo, kɔlfulaa, yolɛi a kɔl yulan-yulanndo. Mó tuisi mɛlɛkaa hun a dɛnɛ palaa-a taw nda coo.

⁵⁰Mó tuisi kɔl ndɔ tuwvo nda coo mɛɛ o hɛnan yɛ. O kpakpala Esiptea kan a piɔ́mndo le, kɛ mó tuisi nàà halimaa nda coo.

⁵¹Mí Hala diw poaa tasea ndaa kpow Esipte, a yɔŋnun hɔ́aa tasea o yungula Ham-ndan nin-nda pɛɛn.

⁵²O kon kɔɔli, mó yaa yungu ndɔɔ maa cɔlua kunda, mó sim nda laci o lɛŋnde veselɛilen nin maa saa kunda.

⁵³Mó yaa nda nila ɲulu, siòòŋii bii nda le, mí mɛmma ihɛllan ma mial yaamɔaa ndaa coo.

⁵⁴Mó yaa nda o lɛŋnde ndɔle diandaalen nin, mó kɔa a nda o pembii o sɔla a kpaaya ba ndɔɔ-e.

⁵⁵Mó toaw vanaa-mangalaa-isɔaa va icali nda laci o lɛŋnde len ni-nda, mó piɔw lɛŋnde Kanaan-nden, mí vana-vana sɔla yondola ndɔ, mó kɛsi polama Israɛlla o la nda lo.

⁵⁶Kɛ má tiŋ Hala-Hiow-Ɲɔɔn-Kpow-vo, má simul ndu a tɛɛndanndo, a bii tɔŋnda ndɔlan te.

⁵⁷Má muungu kelala vɔɔnndan maa fuɲaa ndaa mamaa, a lo o lediom coo a Hala le, má laasian maa kpaasiaa yoole kiolɛi.

⁵⁸Má tɛɛmbuu Hala kɔllo a sooluula ndalan, mó tuulu kɔl taw a piɔmaa ndaa.

⁵⁹Hala cɔu sɔɔn mun, mó tambu kɔllo, mó kɛɛ Israɛlla few-few.

⁶⁰Mó faŋan o cɛi o va nin Silo-o nin, cɛi-kola-toandaa o va nin yungu ndɔɔ tɛɛn-ndo.

⁶¹Mó mal kesu kpema ndɔɔ yaamɔɔa o ba, kesu kpema va tɔɔmasele kpaaya ndɔɔ a tɔɔmasele biilu ndɔɔ-o pɛɛn.

⁶²Hala tuuloo kɔllo a vanaa co kɛ́ ndɔɔ-a, mó mal nda vuo o mɔɛi cɔwve bɛngu.

⁶³Mí yinnden le loam langbaa felengia, vana-vana condu lɛ le felengia laandua le[31].

⁶⁴Mí vanaa-solia-lasálàá sɔla piɔ́mndo o cɔwvo, vanlaandua piaandaa ndaa vi-a nɔla nda caŋ te.

⁶⁵O kon kɔɔli, mí Maalii tiandu mɛɛ vana tiandu o lɔan nuaa yɛ, mó yinga mɛɛ mɔiyan ma kiolu vana cɔwvo o hɔl mò yinga le cɔwvo nuaa yɛ.

⁶⁶Mó soaŋ yaamɔaa ndɔa o mundu kɔɔli, mó tuisi nda siɛmbula fɛɛn-fɛɛnndan.

⁶⁷Kɛ nduyɛ, mó kɛɛ poaa Yosɛf-a, mó kɛɛ le polale Efraim-nden hɛlio.

⁶⁸Mó hɛli polale Yuda len, mó kaola pembei Siɔn.

⁶⁹Mó cɔaw Fonda ndɔɔ Diandaa lon, mó cɔaw ndu o kálà-kálà maa halataalaa, mó toosiaa ndu mɛɛ o toosiaa lɛŋnden le lɔ́ɔ́-lɔ́ɔ̀ yɛ.

⁷⁰Mí Hala hɛli vɛlɛ vana ndɔ baalaa David, mó kɔa ndu nuwviaa o hèéla saa nin,

⁷¹mó soli ndu o cɔlua kundaa tɛɛn, mó siinguu ndu vana mandaa yungu Yakɔb-o, Israɛlla, vanaa co kɛ́ ndɔɔ-a pɛɛn.

⁷²Mí David sim vanaa kan laci a kɔl ndɔɔ kpede, mó kɔa a nda a kɔlkaloo.