Read Kissi Condii lisai 84 Bible Online

Condii lisai 84 - Kissi bible

Condii lisai 84

¹Condii fula o condun simlacinɔ vanaa n'condua nin-nde. A banga Kat-o nda soli condei he ni. O condun kunda poaa Kore-a nin i fula ni:

²Éé Mɛlɛka-Nɔ-Kpaayaa-Kpow-vo, i kaola bɔɔ cɛi nɔmndo!

³I co cumndo a yeemɛi taw le luɛyɔɔ o nɔm Mɛlɛka lo bɛɛ. Kɔl nuu a dialun nun kpow n co yondaa a ɲaaloo Hala yoomaa o lani.

⁴Éé Mɛlɛka-Nɔ-Kpaayaa-Kpow-vo, nɔm masa nuu, Hala nuu! Nɛ́ɛ̀nɛɔ co nɛɛ calaa sɔlaa, lɛɛfɛnndo bɛɛ sɔlà vɛɛnnden le cuavaa ndɔa kɛsio lenin o fondala-loamaa-lasálàla nɔmndan ikɛi.

⁵Dɛnɛ kɛndɔɔ co le vanaa co o nɔm ndo cɛinin-nda, a co nɔm biiloo lɔ́ɔ́-lɔ́ɔ̀.

⁶Dɛnɛ kɛndɔɔ co le vanaa co yoomuma ndan cuaa o nɔm nin-nda, á co yiyanndo le helɔɔ o nɔm ndo-a.

⁷Mɛɛ nda va hiovɔɔ o bóllo Baka[36] nin, mí nɔm Hala siinguu ból kon soonnda mamɛnndan, mí piɔɔ tasoo toal, mó tiw dalalan ndon kpow.

⁸Vanaa kan co va kɔlan a yoomuan sɔlaa háá mà kɔ fula Hala o hɔl Siɔn.

⁹Tuei piɛile nilen Mɛlɛka, Hala-Nɔ-Kpaayaa-Kpow-vo! Éé Hala Yakɔb-o, yaŋ ya nilan!

¹⁰Éé nɔm Hala co naa kandaa-o, tofa masaa, mà sɛɛna vana n hɛli-o ɲɛkɛndɛi.

¹¹Paalen ten pilɛ tosaa o cɛi nɔmndo nin co fisa a palɛi vàá pilɛ tosaa nɛɛ celen. Éé Hala, o co fisa mì va vana mandaa cɛi nɔmndo a calle o cɛila-kolala-toandaala vanaa yɔŋ vɔɔnda ha nin.

¹²Kani paalen a kɔ̀ɔ̀ cɔwvo Hala co ni, o co naa kɛndɛi tosal-lo mo va naa bɛɛlen keo. O kɛɛ le vanaa co kelaa o nɛila ndɔlan coo-a dɛnɛ kɛndɔɔ tosal-lo le.

¹³Éé Mɛlɛka-Nɔ-Kpaayaa-Kpow-vo, duaa co le vanaa co nɔm tiindanndo-a!