Read Kissi Condii lisai 88 Bible Online

Condii lisai 88 - Kissi bible

Condii lisai 88

¹Condii poaa Kore-a le simlacinɔ vanaa n'condua. A mɔnɛi nda soli condei he ni. Mí Eman Ɛsrahiinɔ condu aa:

²Éé Mɛlɛka! Hala vana ciindiaa nuu, niinoo a lɔan, i co nɔm cɛɛŋɔnndo o lani.

³Màá tuei piɛile nilen! Yaŋ nilan o cɛɛŋɔnnda nilan.

⁴Kani sangalan la pɛ ya o kɔl ca, yoomu nuu co kɔnndan ciee-piɔ́m.

⁵I co vanaa co kɔlan o sɛiyo nin-nda tɛɛn, i co macoaa maa vana nɔ mayoomu loo.

⁶Fonda nuu co vanvílɛ́iya tɛɛn maa vanaa connun nin ihini o sɛiyo nin-nda. A cii nda pɔɛɛnɔn, a co lɛ bɛɛ nda yiyan coo le, kani sɛiyanndo luɛi niaa tɛɛn.

⁷A cii ya malɔɔ o soon yingilaa nin, o ɲumma kpingbi-an nin.

⁸Kɔltuw nɔmndo tol-la coo, a cii ya hiilɛi nɔmnde kpow tuisi coo.

⁹A cii ya soli caaŋa nia tɛɛn, má siinguu ya ɲɛ fondoo nda o hɔl. I co o kindaa, i tiwba fulaa le.

¹⁰Sangaa kɛsi ya pundaa o hɔl. Éé Mɛlɛka! I co nɔm tɛɛlɔnndo lɔ́ɔ́-lɔ́ɔ̀, i co nɔm baa tɛɛlul-lo.

¹¹Vɛ̀ɛ̀ vanaa vi-a n tosalnin dɛnnda kaamaalan ni? Vɛ̀ɛ̀ vanvílɛ́iya can ndɛnin pá mà sangala nɔm?

¹²Ɔ́ɔ̀ vana cɔmnin kaola nɔmndo o sɛiyo nin, mò cɔm mɛɛ n lo o lediom coo-e ciee-piɔ́m-ndo?

¹³Vɛ̀ɛ̀ dɛnnda kaamaala nɔmndan la co pá sinanndo o ɲumma kpingbian nin? Vɛ̀ɛ̀ vannda co yiyanndo a dɛnnda sandaala nɔmndan o kɔɔ o lɛŋnde vana nɔ mako le len nin?

¹⁴Kɛ ya yɛ Mɛlɛka, i co nɔm cɛɛŋɔnndo o lani le ya malaa, idii púŋ, i tiiyal nɔm piɛile nilen.

¹⁵Kpòkóó Mɛlɛka! Le kɔlɔ yɛɛ n co yɛ ya kɛɔ, ma va ya hɔlla vinɔɔ?

¹⁶I lo felengi, mí dɛnɛ palaa a sanga piɔ́mndo toal-la coo, siòònde co ya a nɔm taw, i laasian.

¹⁷Kɔltuw nɔmndo co ya tolɔɔ coo, hiilɛi nɔmnde cii ya tɛɛmbuu.

¹⁸Niinoo kpɛŋ, n co ya balɔɔ maa mɛmma hunaa, n cii ya miolɔɔ culukɔ.

¹⁹A cii vanaa naa n va kelaa latulu-a a caaŋaa nia faŋa ya ikɛi, ɲumndan ma siŋnun caan ni kɛndɛ-kɛndɔɔ.