Read Kissi Condii lisai 91 Bible Online

Condii lisai 91 - Kissi bible

Condii lisai 91

¹Vana kila pɛ caltan o vunduma Ó-Hiow-Ɲɔɔn-Kpow-vo-an bɛngu, mɛɛ ndu sɔlanin pɛngio o vunduma Vana-Kpaayaa-Kpow bɛngu.

²I co Mɛlɛka dimullo aa: «Nɔm co nɛɛ nia viannannda a kpaki nuu ni. Hala nuu, nɔm ya tiindan ni.»

³Kani Mɛlɛka cɛwnin nɔm o yala vana biyaa n'yowvo, o baŋanin nɔm vɛlɛ a nàà halimaa.

⁴O kuumbuunin nɔm a kumbannda ndɔlan, mà vennun o bɔɔla ndɔlan bɛngu. Toɲa ndɔɔ vanin kɔ̀ɔ̀ cɔwvo a kpakio le nɔm ni.

⁵Siòòŋii biinin nɔm le dɛnnda voenanndan icɔl te, te kon te le kɔɔn hiaw ipala-on,

⁶te kon te vɛlɛ le nàà n'kɔnya kela o ɲumndan nin-ndo a le nààla taŋ vana ipala déŋ-ndan.

⁷Vannda va bɛɛ nɔm delio ikɛi vaalan taw, mì vannda vaalan tɔ́ va nɔm delio o ba kɛndɔɔ coo, ɲɛ-ɲɛ komalnin nɔm te.

⁸Hɔlla kínɛí n kumbunin ni, mà ce mɛɛ vanaa yɔŋ vɔɔnda vanin tambei yɛ.

⁹Taa siinguu pɛ Mɛlɛka calta nɔmndan, mà siinguu Ó-Hiow-Ɲɔɔn-Kpow-vo nɛɛ viannan-nda le nɔm,

¹⁰mɛɛ dɛnɛ palaa kɛ́-kɛ̀ komalnin nɔm te, sanga oo sanga sɔɔnguunin o cɛi-kola-toandaa nɔmndo ikɛi le.

¹¹Kani o dimulnin mɛlɛkaa mà kanda nɔm o nɛila nɔmndan kpow coo.

¹²A biinin nɔm baa yɔŋii n boŋ o powvo.

¹³A keinin yàlàá a hɔ̀ɔ̀lɔ́ɔ̀ coo, mà nɛw yàlà cuaa a tambálakáà a labɛngu.

¹⁴Mɛlɛka dimi aa: «Le tùú n kaola ya-o, i mandanin nɔm, kani a sinà diola nilan.

¹⁵Taa piɛi pɛ ya, i mululnin nɔm. O sangaa nin bɛɛ, i vanin nɔm ikɛi. I baŋanin nɔm mì ke nɔm bɛɛlen.

¹⁶I bɛndinin yoomu nɔmndo, mì cɔm nɔm cinda nuu.»