Read Kissi Condii lisai 92 Bible Online

Condii lisai 92 - Kissi bible

Condii lisai 92

¹Condii vana soli o paale pɛngiaalen coo-e.

²Éé Mɛlɛka! O naŋ bɔɔ mì vana mel nɔm balika, mì vana soli condon le diola nɔmndan sangalaa, nɔm Hala-Hiow-Ɲɔɔn-Kpow-vo.

³O naŋ mì vana cɔm vannda kɛndɛi nɔmnde idii púŋ, mì vana cɔm vɛlɛ nda kaola nɔmndo icɔl

⁴o diom banga nɔ yoei tɔ́-o a o diom bondomaa bɛngu.

⁵Éé Mɛlɛka! Dɛnnda n tosa lan la co ya kɔllo nɛŋio, i co condon solio a ɲaaloo le baala n tosa a laba-o.

⁶Aa Mɛlɛka! Mbɔ̀ dɛnnda nɔmndan la co labɔɔ, yiyannda nɔmndan la yingila.

⁷Diɔmndo co ɲɛ-ɲɛ bila biyɔɔ le, vana nɔ kɔlkalu loo co ɲɛ-ɲɛ sina le.

⁸Vanaa yɔŋ vɔɔnda kui bɛɛ mɛɛ billo vul nuaa yɛ, mì vanaa co dɛnnda vɔɔnndan tosaa-a va kuiyo maa n'peenge, a tambunin le fɛɛn a fɛɛn.

⁹Kɛ nɔm Mɛlɛka, Mɛlɛka fɛɛn-fɛɛndo n co ni.

¹⁰Maakɛndɛi Mɛlɛka, yaamɔɔa nɔmnda vunin, mì vanaa yɔŋ vɔɔnda piɔl.

¹¹A luei ya yoomuan maa cìí, cuɛima kɛndɛ-kɛndɛan ma cucun ya lekɔɔ.

¹²I co yaamɔɔa cɔu tambei, i co vanaa yɔŋ vɔɔnda tueyɔɔ cɛɛŋɔnndo.

¹³Vanaa sandaa co yandɔɔ maa mavaw, a co bandei maa sɛɛdrei Liban.

¹⁴Le tùú nda co a tɔalaa o Cɛi-Hala-o nin-ndo, a kuinin o Hala naa lo bɛɛ.

¹⁵A vanin kɔmnden o yuuvɛi ndɛi nin, a naŋnin mà pui ɲɛkɛndɛi.

¹⁶Kon cɔ̀m sandii Mɛlɛka-e ni, ndu co pow kpova nuu ni. Dɛnɛ vɔɔn kɛ́-kɛ̀ co o ndu nin te.