Read Kissi Condii lisai 96 Bible Online

Condii lisai 96 - Kissi bible

Condii lisai 96

¹Niaa vanaa co o lɛŋnden coo-a kpow, la solul Mɛlɛka condun sɛnɛiyon, la solul ndu mun.

²La solul Mɛlɛka condon, la lisa diola ndɔlan, la va vannda cinda ndɔɔ cɔmndo lepalaa-lepala.

³La cɔm bɔɔbɔɔyɛi ndɔɛi vannda kpow tɛɛn, mì la cɔm dɛnnda kɛndɛla ndɔlan o lɛŋnden kpow coo.

⁴Kani Mɛlɛka co o bɔɔ, le ndu biiloo bɛnda ni. O halaa kpow tɛɛn, ndu vana bɛnda ma vo ni.

⁵Piɔmnda halaa vanaa-mangalaa-isɔɔa kpede co ni, kɛ Mɛlɛka cɔw halataalaa ni.

⁶Pangeloo a naŋɔɔ co ndu diondɔɔ o hɔl, kpaayaa a bɔɔbɔɔyɛi co o Cɛi-Diandaa ndɔɔ nin.

⁷Niaa vanaa co o lɛŋnden coo-a, la cɔm bɔɔbɔɔyɛi ndɔɛi a kpaaya ndɔɔ.

⁸La hun mì la cɔm bɔɔbɔɔyɛi ndɔɛi. La hun a ɲɛm-kéan, mì la luɛi o ndu lo bɛɛ.

⁹Te o fula pɛ mò cɔmnun niaa, la baŋ ndu vulan o labɛngunin. Niaa vanaa co o lɛŋnden coo-a kpow, la ɲiiya ndu o hɔl.

¹⁰La dimul vannda kpow aa: «Mɛlɛka co masaa ni. Lɛŋnden le sim ɲɛkɛndɛi, le co biŋin te. O kialunin vannda iyama o sandei nin.»

¹¹Màá halataalaa dɔwnun ɲaale mì lɛŋnden le naŋ kɔl! Màá mɛmma ihɛllan a ɲɛm co lenin-ndon kpede n soli diomndan!

¹²Màá yondoo a ɲɛm co lenin-ndon kpede yonda a ɲaaloo, mì yɔmii co o bundɔɔ nin-nde kpede yonda yonda kɔlkɛndɔɔ

¹³Mɛlɛka o hɔl! Kani o co hunɔɔ, o co hunɔɔ le lɛŋnden yamɛi kiolɔɔ. O kialunin lɛŋnden iyama o sandei nin, mò kelu vannda iyama mɛɛ toɲa ndɔɔ co yɛ.