Read Kissi Talelan 11 Bible Online

Talelan 11 - Kissi bible

Talelan 11

¹Ɲɛla tuvaala n'ɲɛla nda yɛlɛmiaa lan la nɛinun bɔɔ Mɛlɛka, kɛ o nàŋ kɔl a ɲɛla tuvaala nda sakpolan.

²Yongaa luɛi pɛ vanndo, vannda pɛɛsa ndu, vanaa tuisiannda nɔ kɔlkaloo ni.

³Simndan sandei sim vanaa sandaa laci ni, kɛ laasian vanaa sendu le-a tuisi dɛnɛ palaa nda coo ni.

⁴Bolofaa nɛŋi ɲɛ-ɲɛ o paale kɔltuwle Hala len coo le, kela sandaa baŋa vana o piɔ́mndo hɔl-ndɔ ni.

⁵Dɛnɛ sandaa yaa vanaa sandaa o nɛi sandaa coo ni. Vana yɔŋ vɔɔndo yɛ, yɔŋ vɔɔn ndɔɔ laasiàà ndu ni.

⁶Dɛnɛ sandaa vanaa sandaa tosa-o kándà yoomula ndalan ni. Kɛ yeemɛi ndɛi nda pila-e bii vanaa lakafaa o yaŋɔɔlen ni.

⁷Vana dɛnɛ vɔɔndo vi pɛ, tiindan ndɔɔ tambu, taama-taama tiindan ndóò nɔ o bolofaa ndɔɔ coo-o.

⁸Vana sandaa buulan te, kɛ vana kɔlvesɛiyo ndu, o buulanndo nin calta ndɔlan la co ni.

⁹Vana dɛnɛ vɔɔndo cɛn pɛ o dii caanda a sondo, kɛ mi vanaa sandaa sɔlà baŋaa le sinapɛngu ndɔ.

¹⁰Vana sandaa sɔla pɛ dɛnɛ kɛndɔɔ, vanaa co o kobio nin-nda kpow a dɔwnun ɲaale. Kɛ te vana vɔɔndo vi pɛ, vannda viow kponyoo.

¹¹Vanaa sandaa cuu dɛnɛ kɛndɔɔ o kobio nin ni, kɛ tɛɛmbuuo vanaa yɔŋ vɔɔnda tɛɛmbuu kobio a lasondo ni.

¹²Vana congu caanda-o pe lebol te, kɛ vana kɔlkaloo ndu, meinɔnndo o meinun ni.

¹³Vana sɔɔn pɔmbɔɔ bii sondo ndɔɔ le. Kɛ vana lo o lediom coo-o ndu, sɔɔn kpow mo mandan o kɔl.

¹⁴Te simlacilen le cee tosan te, lɛŋnden le dɔwnun yɛɛvɛ. Vanaa silaa va pɛ sɛ́lɛ́, a tiw dɛnɛ ba.

¹⁵Vana lɔɔnun pɛ ibuŋ le vana kueela pilalan la co-o, ndu tuisin sangaa coo. Vana loonun ibuŋ te, ndu calnun nila ɲulu.

¹⁶Vanalanɔ naŋ hɔlla-o sɔla candɔɔ ni. Vanapɔnɔ kindianndo sɔla bolofaa ni.

¹⁷Vanakɛndɛyɛi tosaa naŋ le vana co ndi tosaa-o, kɛ dɛnɛ palaa vana kɔlvesɛiyo tuisin ndu pila coo ni.

¹⁸Vana kɔlvesɛiyo co tɔnɔ fondoo nuwviaa, kɛ vana co dɛnɛ sandaa tosaa-o nɔ sala ndɔɔ.

¹⁹Vana kelu pɛ le vaa vana sandaa, ndu vanin yoomu, kɛ vana holnun pɛ dɛnɛ vɔɔndo tosaa, ndu sɔlanin piɔ́mndo.

²⁰Vanaa kɔlkalu vɔɔnda nɛinun bɔɔ Mɛlɛka, kɛ o hinì kɔl a vanaa sandu o kela ndaa nin-nda.

²¹Lekɛ́ndɛi ken co ni, Vana tosaa dɛnɛ vɔɔndo helunnin dɛnɛ palaa le, kɛ vanaa sandaa sɔlanin baŋaa a polama ndan kpow.

²²Vanalanɔ naŋ hɔlla kɛ o bii ɲɛ-ɲɛ bila loo co kpeŋ mɛɛ vana vow pewvo kelɛi isianiei o milin nuaa yɛ.

²³Yeemɛi vana sandaa co dɛnɛ kɛndɔɔ kínɛí ni. Kɛ tiindan vanaa kɔlvesɛiya co kɔltuwvo ni.

²⁴Mì vanaa pum yɔngu taw, mì ɲɛ nda sɔlaa kui vɛlɛ. Mì vanaa pum nda manda le nda pila ma hiow ba, kɛ mà cennun bala fondo.

²⁵Vana tosal vannda kɛndɛi-yo vanin o piaa lɔ́ɔ́-lɔ́ɔ̀ a ɲɛm kɛndɔn, vana ke caanda ma kol-lo sɔlanin le kolɔɔ.

²⁶Vana kɛɛ pɛ le malun ndɔn pisio, vannda dɔw ndu danga. Kɛ vana pisi pɛ malun ndɔn, vannda dɔw ndu duaa.

²⁷Vana holnun pɛ dɛnɛ kɛndɔɔ tosaa, o hɛnan vannda. Kɛ vana tuisi pɛ caanda dɛnɛ palaa coo, dɛnɛ palaa kpuva vana kon.

²⁸Vana tiindan pɛ bolofaa ndɔɔ, ndu del, kɛ vanaa sandaa naŋnin maa yɔm puiyaa.

²⁹Vana luei pɛ dɛnɛ laasiɛiyo o ndu lo cɛinin, ndu loo hoeiye kɛ́ɔ. Vana pe lebol too siŋnunnin cɛ vana kɔlkaloo.

³⁰Dɛnnda vana sandaa la co maa yɔm yɔngu cindaa-o. Vana nɔ pɛ kɔlkaloo, o sɔla vannda.

³¹Vana sandaa sɔlà sala bɛnda le ndu-o o ceendo coo nanu, vanaa yɔŋ vɔɔnda a vanaa lahakia bɛɛ a co sanga co le nda-o sɔla.