Read Kissi Talelan 13 Bible Online

Talelan 13 - Kissi bible

Talelan 13

¹Po kɔlkaloo yaŋ nilan o silala fuɲa ndɔ lan ni, kɛ po yongaa cɛl mì vana dimul ndu sɔvun ndɔn te.

²Vana tiwba mi vana de sɔɛi sondoi tɔnɔ, kɛ ɲɛ pimi vanaa tosaa dɛnnda vɔɔnda-o co yɔŋ vɔɔndo ni.

³Vana mandan a sondo ndɔɔ-o, ndu ciindiaa yoomu ndɔɔ ni. Kɛ vana dimi sɔɔn mɛ̀ɛ́-mɛ̀ɛ́ ka-o, ndu tɛɛmbun ni.

⁴Vana siɛlɛiyo nɔ yeeman, kɛ n peelun te. Vanaa fula diallon-nda, ɲɛ-ɲɛ ko connun nda o ba.

⁵Vana sandaa pɛɛsà còòlan, kɛ vana kɔlvesɛiyo ndu, dɛnnda kɔltambɛilan a dɛnnda lasiɛmbulan o tosa ni.

⁶Sandei kándà vana co kelaa o nɛi laasian too coo-o ni. Kɔlvesɛiyo tɛɛmbuu vana lahakio ni.

⁷Vanndo pum mò cɔm maa o nɔ bolofaa, nduyɛ ɲɛ-ɲɛ ò nɔ le. Vanndo pum yɛ, mò cɔm maa o nɔ ɲɛ-ɲɛ le, kɛ mò nɔ ɲɛ-sɔlaa taw.

⁸Ɲɛ co ɲɛ baŋaa yoomu vanacieo-vo co bolofaa ndɔɔ ni. Kɛ vana bala fondoo ndu vana kɔngɔlàn ndu le.

⁹Hɔlla tenga vana sandaa ni maa ɲɛ-tengaa, kɛ vana kɔlvesɛiyo ndu, maa tɛngɛ co le ɲumndo-o o co ni.

¹⁰Yongaa hun a sɛɛngianndan ni, kɛ le vanaa bii silaa-a kɔlkaloo co ni.

¹¹Bolofaa vana sɔla kúlù-kùlù-o nɛi cuvɔɔ le. Kɛ bolofaa vana cuungiàà pɛ o pɔm-pɔmbɔ-o kui ni.

¹²Vanndo hiw pɛ ɲɔɔ pum viovɔɔ cumndo, o tambu kɔllo. Kɛ maa yɔm cindaa yeemɛi peelun-nde co ni.

¹³Vana tui sila loo, bɔnɔla cuu ndu kuee le. Kɛ vana bii pɛ tɔŋndan, ndu sɔla vɔ́ngɔ̀lan ni.

¹⁴Soon mɛmma cindaa pɛɛku vana kɔlkaloo co ni. O mala vana le biondɔnnda yaa vana piɔ́m-ndan kpakpalaa.

¹⁵Vana kendu pɛ kɔl a hɛnan vannda. Kɛ nɛi vanaa laasiannda yee vana nɛɛ-nɛɛ le.

¹⁶Vana kɔlkaloo yiyan fɔlɔn malan o tosa ɲɛ o yeema le tosaa-o. Kɛ diɔm sondo vesɛiyo ndu, diɔmii ndɔɛi o pɛngɛla ni.

¹⁷Kiilanɔ vɔɔndo hun a dɛnɛ palaa ni, kɛ kiilanɔ toɲaa, ndu toosiaa o toosiaa dɛnndan ni.

¹⁸Vana kɛɛ pɛ le silaa tueyɔɔ, ndu siŋnun vana bala fondoo, o nɛinun vannda. Kɛ vana cɛl pɛ ma dimul ndu sɔvun ndɔn, o sɔla bɛɛlen.

¹⁹O co dɛnɛ yeelɛi le yeemɛi peeloo, lelan diɔmaa sondo vesɛiya kɛɛ le balan solio o dɛnɛ vɔɔndo nin ni.

²⁰Vanndo kela pɛ a vana kɔlkaloo, ndu bɛɛ kendu kɔl. Kɛ vanndo kela pɛ a diɔm sondo vesɛiyo vana kon kɔndu dɛnɛ.

²¹Dɛnɛ palaa co vana yɔŋ vɔɔndo kɔɔli, kɛ vana sandaa ndu, dɛnɛ kɛndɔɔ co sala ndɔɔ ni.

²²Vana tosaa dɛnɛ kɛndɔɔ mèl cuavaa ndɔa imamaa kɛ́ ndɔɔ. Vana lahakio yɛ, le vana sandaa kɛ́ ndɔɔ co ni.

²³Vana bala fondoo vàá pɛ ciɛi o sɔla baloo taw. Kɛ vana sendu loo ndu, yoomuma ndɔan ma co hiɔlɔnndo mapɔm-pɔmbɔ.

²⁴Vana kɛɛ pɛ le hɔ́ɔ́ ndɔɔ sionnden holɔɔ, mɛɛ o yeema ndu le. Kɛ vana yeema hɔ́ɔ́ ndɔɔ-o, o kiisan le ndu bandìlaa le.

²⁵Vana sandaa de pɛ o pim ca. Kɛ dembe vana kɔlvesɛiyo ndu co caŋndo a yiaan tuŋ.