Read Kissi Talelan 14 Bible Online

Talelan 14 - Kissi bible

Talelan 14

¹Vanalanɔ kɔlkaloo tangulu cɛi ndɔɔ ni, kɛ vanalanɔ diɔmndo ndu, ndu pila puusiaa ndu a laba ni.

²Vana kela pɛ o sandei nin ndu ke Mɛlɛka bɛɛlen, kɛ vana kela pɛ o laasianndo nin mɛɛ ndu luei Mɛlɛka yii le.

³O sɔɔn diɔm sondo vesɛiyo nin yonga ndɔɔ vul ni. Kɛ sɔɔn vana kɔlkaloo sɔaa-on kándà ndu ni.

⁴Nɛɛ navaa vàá co le, ɲɛ-ɲɛ ve o konda le. Cɔlua mayoomua lueilul vana tɔnɔɔ taw ni.

⁵Sei toɲaa dimi lacòòvaa le, kɛ sei lacòòvaa ndu còòlan kínɛí o dimi ni.

⁶Vana yongaa kindin bɛɛ le kɔlkaloo sɔlaa, o tiwba le. Kɛ vana taasio ndu nɛi dɛnɛ sina le.

⁷Holnun diɔm sondo vesɛiyo le, kani sɔɔn fula ndu o sondo-on kenin nɔm kɔlkalu le.

⁸Vana taasio dɔaw kela ndɔɔ taasi ni, kani o kendu kɔl. Kɛ diɔmnde laasiaa diɔmaa sondo vesɛiya ni.

⁹Diɔmaa sondo vesɛiya ci maa tɛɛmbuula ndalan toosiaa la co sɔɛi sɔvɛ le. Kɛ yiyan kɛndɔɔ co vanaa sandaa tɛɛn ni.

¹⁰Mɔnɛi co vanndo o kɔl-le, ndu pilɛ kpé sina ndi ni. Ndu pilɛ kpé sina vɛlɛ kɔlkɛndɛ co ndu o kɔl-lo ni, vana celen nɔla dɛnnda lan sinanndo maa ndu pila le.

¹¹Yungu vanaa kɔlvesɛiya tambunin, kɛ polale vanaa sandaa le puinin tɛí-tɛí.

¹²Vanndo pum ce maa kela ndɔɔ sandu, kɛ nduyɛ o mɛɛlulan mì kela ndɔ kon yɛɛ ndu ciee-piɔ́m.

¹³Mamɔɔ n'ciŋndo nɔla mò kumbu dɛnɛ palaa co o kɔllo nin-ndo. O mɛɛlulan, ɲaale kon siŋnun mɔnɛi.

¹⁴Vana laasianndo dianin kɔmnde kela ndɔɔ, vana kɛndɔɔ ndu, dɛnɛ ndɔɔ vanin fisa ni.

¹⁵Vana bii dɛnɛ bila loo laalan a sɔɔn nda dimul ndu-on kpow, kɛ vana taasio ndu, o mɛɛndian fɔlɔn malan o kɛsi pelei.

¹⁶Vana kɔlkaloo nɔ siòòŋii dɛnɛ vɔɔndo, lelan o kpakpala ndu ni. Kɛ diɔm sondo vesɛiyo ndu nɛi bollen vow o dɛnɛ nin te, kani o laalan a ndu pila.

¹⁷Vana keleŋà kɔllo o tuulu-o tósà dɛnnda idiɔmndan ni. Vana hui caanda-o ndu, nɛinɔnndo o nɛinùn vannda ni.

¹⁸Vanaa bii dɛnɛ bila le-a, diɔmnde co kɛ́ ndaa ni. Kɛ sinapɛngoo co mɔsil lemasaa le vanaa kɔlkalua ni.

¹⁹Vanaa vɔɔnda tuisinnin vanaa kɛndɛa o labɛngunin, mì vanaa kela vɔɔnda kɔ lɔɔ dio vanaa sandaa.

²⁰Vana bala fondoo, hali caaŋaa ndɔa, mà pɛɛsa ndu. Kɛ vana bolofaa ndu nɔ canyan sɛ́lɛ́.

²¹Vana pɛɛsa pɛ caanda o tosa hakio, kɛ dɛnɛ co le vana kon, vana nɔ ɲííye a vanaa bala fondoa-o.

²²Mì vanaa nɔ yiyannda vɔɔnndan-nda pɔw nɛiyo, kɛ vanaa nɔ yiyannda kɛndɛlan-nda nɔ sakpoyɛi ni, nda lo o lediom coo ni.

²³Baala-baala nɔ tɔnɔ ndɔ. Tombola fondoo ndu o pɛŋnden nin o luei vana ni.

²⁴Bolofaa co vɔ̀ngɔ̀la vanaa kɔlkalua ni, kɛ diɔm sondo vesɛiyo ndu, diɔmnde o koaw ni.

²⁵Sei toɲaa nɔla mò ciindiaa yoomula vannda, kɛ vana lacòòvaa pala caanda ni.

²⁶Vana nɔ pɛ siòòŋii Mɛlɛka-e ndu vannùn nila ɲulu, kani o kandà cuavaa ndɔa.

²⁷Siòòŋii Mɛlɛka-e nɔu co soon cindaa ni, kon tosa ni mì vana kpakpala yaŋɔɔla piɔ́mndan.

²⁸Lɛŋnden le nɔ pɛ vanndacieea sɛ́lɛ́, masa co lecoo-o sɔla bɛɛlen. Kɛ te lɛŋnden le nɔ vanndacieaa bɔɔ le, simlaci le co o ba bɛngu-o del.

²⁹Vana yàlà kɔl tuulu o dɛnɔɔ loo co vana tasio ni, kɛ vana keleŋa kɔl tuulu-o tosà diɔmnde.

³⁰Yiyan kɔlɲuloo yɔngu diallon kɛndia ni. Kɛ yeemɛi paŋalɛi co maa nàá siɔŋi vana paalan-ndo.

³¹Vana tosal pɛ vana bala fondoo dɛnndan kpoku-kpoku, mɛɛ a tɛɛndan Vana cɔw ndu-o. Kɛ vana ce pɛ vana bala fondoo ɲia, o ke Vana cɔw ndu-o bɛɛlen.

³²Dɛnɛ vɔɔn vana kɔlvesɛiyo tosa-o tɛɛmbuu ndu ni, kɛ vana sandaa ndu nɔ kɔlkɛsiaa hali o piɔ́mndo hɔl-ndɔ.

³³Kɔlkaloo co vanaa sinaa dɛnɛa o kɔl, kɛ vɛ̀ɛ̀ vana saalun pá ndu diɔmaa sondo vesɛiya tɛɛn?

³⁴Dɛnɛ sandaa tosaa hivi lɛŋnden laci ni, kɛ kafalan la tuisì vanaa co o lɛŋnden nin-nda siɛmbulan ni.

³⁵Masaa ca vana baala kɛndɔɔ ɲia, kɛ kɔltuw ndɔɔ toal vana baala soli vana lasiɛmbu loo coo.