Read Kissi Talelan 15 Bible Online

Talelan 15 - Kissi bible

Talelan 15

¹Muli kɛndɔɔ ɲulul vana kɔllo ni, kɛ sɔɛi dimi vɔɔndo yɔngu vana kɔllo tuwvo ni.

²Vana kɔlkaloo va pɛ sɔɛi, yeemɛi bii vana le pɛɛkoo sɔlaa ni. Kɛ sondola diɔmaa sondo vesɛiya lan, diɔmndon la pɛɛliaa ni.

³Hɔlta Mɛlɛka lan la co nɛɛ-nɛɛ ka, la co vanaa vɔɔnda a vanaa kɛndɛa mɛɛndanndo.

⁴Sɔɔn luei vannda yoomuan-ndon co maa yɔm cindàà. Kɛ diomnde vɔɔnnden nden, kɔllo le tɛɛmbuu vana ni.

⁵Hɔ́ɔ́ pe lebol too luei silala fuɲa ndɔlan yii le, kɛ vana cɛl silalan-ndo, vana taasio co kon ni.

⁶Bolofaa pila và o vana sandaa lo cɛinin ni. Kɛ ɲɛ-sɔlaa vana kɔlvesɛiyo tuísì dɛnɛ palaa ndu coo ni.

⁷Sinapɛngoo fula vanaa kɔlkalua o sondo ni, kɛ kɔlta diɔmaa sondo vesɛiya la simul te.

⁸Sálàla vanaa kɔlvesɛiya la nɛinún bɔɔ Mɛlɛka, kɛ ò cɛ̀l piɛile vanaa sandaa.

⁹Kela vana kɔlvesɛiyo nɛinún Mɛlɛka, kɛ o kaola vana co dɛnɛ sandaa kiltan kɔɔli-o.

¹⁰Vana mal pɛ nɛi kɛndɔɔ o sɔla sangaa le ken. Vana cɛl kanalanndan te, ndu sɔla piɔ́mndo.

¹¹Hali ɲɛ co tosanndo ciee-piɔ́m di-o, Mɛlɛka sina, ko nin te yiyannda vanndacieea.

¹²Vana yongaa cɛl mì vana kanalan ndu le, lelan o holnun vanaa kɔlkalua le.

¹³Kɔllo co pɛ a ɲaaloo hɔlla naŋ o tofaa, kɛ te kɔllo co pɛ o sangaa nin yiyan kɛndɛ ve vana le.

¹⁴Kɔl taasio nuwviaa sinapɛngoo ni, kɛ sondo diɔmndo ndu, diɔmnde o dia ni.

¹⁵Vana bala fondoo ndu, palɛi kpow ivɔɔnde i co a ndu ni. Kɛ vana connun o dɛnɛ kɛndɔɔ nin-ndo ndu, lɔ́ɔ́-lɔ́ɔ̀ maa kafo ɲɔɔ va ndu o hɔl ni.

¹⁶O co fisa mì vana nɔ tùúlen mà nɔ siòòŋii Mɛlɛka-e, a bolofaa bɛndoo nɔu kɛ ma va o buulanndan nin.

¹⁷Lam lapeo dioo nɛɛ kaolaa co-a co fisa a visin yeelɛiyon dioo nɛɛ nɛyɔnndo co-a.

¹⁸Vana kɔltuwvo tiŋ sɛɛngianndan ni, kɛ vana biuvanndo ɲumi sɔngɔlan ni.

¹⁹Maa bɔ̀ɔ̀ n'yɔɔ nɛi vanaa siɛlɛiya co ni, kɛ pemale vanaa sandaa co ko maa nɛi siaa vakpa.

²⁰Hɔ́ɔ́ kɔlkaloo nɛŋì fuɲa ndɔ kɔl ni, kɛ diɔmndo lueì kala ndɔ yii le.

²¹Diɔmndon nɛŋì vana pe lebol too kɔl ni, kɛ vana kendu kɔl-lo, sanaa o kɔa nɛi ndɔɔ kɔɔli ni.

²²Tuulan la tambù te vannda yɔngan yiyanndan lecoo le. Kɛ vanaa silaa kui pɛ, tuulan la peelun.

²³Vanndo yala pɛ sɔɛi caa muli o dɔwnun ɲaale. Sɔɛi naŋ dimio o telen bɛnda-o.

²⁴Nɛi yoomoo co-o heelu vana taasion coo ni, haliko mo kpakpala nɛi tol ciee-piɔ́m-ndo, o co lebɛngu-o.

²⁵Mì Mɛlɛka puusiaa cɛi vana kuundianndo, kɛ mò kanda pɛɛngula yondola vanalanɔ pɔnɔ ndɔ vi-o lan.

²⁶Tuula vɔɔnndan la nɛinun Mɛlɛka, kɛ sɔɔn sondon kɛndɔn co n'diandaa ni.

²⁷Vanndo nɔ hɔlte ɲɛ-sɔlaa lakafaa, o tuisi dɛnɛ palaa yungu ndɔɔ coo. Kɛ vana ɲɛ-sɔlaa luɛyɔɔninndo nɛinun pɛ, ndu viow yoomu.

²⁸Vana sandaa yiyan fɔlɔn malan o muli, kɛ vana kɔlvesɛiyo ndu keleŋaa o keleŋa sɔɔn congan cucɔɔ ni.

²⁹Mɛlɛka co vanaa kɔlvesɛiya levil, kɛ o tuɛi piɛile vanaa sandaa.

³⁰Tofa kɛndɔɔ nɛŋi vanndo kɔl ni, yoongu kɛndɔɔ tueyɔɔ yɔngu diallon kpow yoomuan ni.

³¹Vanndo yaŋ pɛ nilan o kanalanndan a ceendo o kɔɔ, o sɔla fonda ndɔɔ vanaa kɔlkalua tɛɛn.

³²Vanndo kɛɛ pɛ le pɛɛkoo tueyɔɔ, ndu pɛɛsan ndu pila. Kɛ vana cɛl pɛ kanalanndan, ndu sɔla taasio.

³³Vanndo nɔ pɛ siòòŋii Mɛlɛka-e, ndu sɔla kɔlkaloo. Tuisinndo hun a biiloo sɔlaa ni.