Read Kissi Talelan 16 Bible Online

Talelan 16 - Kissi bible

Talelan 16

¹Vanndacieea nɔ tuulan, kɛ Mɛlɛka nɔ sɔɛi mɛɛlɛi o ba ni.

²Vanacieo yiyan lɔ́ɔ́-lɔ́ɔ̀ maa kela ndɔɔ dendu, kɛ vana yaasiaa kɔltan-ndo co Mɛlɛka ni.

³Cɔm Mɛlɛka kpekula nɔmndan, mì tuula nɔmndan la peelun.

⁴Mɛlɛka toosiaa ɲɛ-ɲɛ fee a kɔlɔ. Hali vanaa kɔlvesɛiya, o toosiaa nda le paale dɛnɛ palaalen.

⁵Vanaa yongaa nɛinun Mɛlɛka. O nɛi oo nɛi coo a kɛɛnin sangaa sɔla le kela ndaa le.

⁶Vana nɔla biondɔnndo toosiaa a vanakɛndɛyɛi a á sakpoyɛi. A siòòŋii Mɛlɛka-e vana nɔla dɛnɛ vɔɔndo kpakpalaa.

⁷Mɛlɛka hini pɛ kɔl a kela vanndo, o tosa bɛndaa muungu vana kon tɛɛn hali nda yaamɔaa ndɔa.

⁸Sɔlaa tùúlen o sandei nin co fisa, a bolofaa bɛndoo sɔlaa o kafalan nin.

⁹Mì vanacieo tuu le ipum tosaa, kɛ Mɛlɛka tosa ni mò tiwba tuu kon peeloo.

¹⁰Kpaaya ihalayaa co o cɔcɔn masaa coo, lelan sondo ndɔɔ pɔw o yaman kiolɔɔ nin te.

¹¹Le Mɛlɛka ɲɛla tuvaala n'ɲɛla sandaalan la co ni, ndu toosiaa ɲɛla vana tuu ɲɔɔn-ndan ni.

¹²Dɛnnda vanaa kɔlvesɛiya la nɛinun masaa. Kani o dɛnɛ sandaa tosaa nin masale ndalen le sìm ni yili.

¹³Masaa ca vanaa dimul ndu sɔɔn o sandei nin-nda ɲia. Vanaa dimì toɲaa-a o yeema ni.

¹⁴Kiilanɔ piɔ́mndo kɔltuw masaa co ni, kɛ vana kɔlkaloo ndu tiwba mò ɲulul ndu kɔllo.

¹⁵Hɔlaa masaa va pɛ tɛ́fɛ̀lɛ̀kɛ̀lɛ̀ɛ̀, mɛɛ dɛnɛ kɛndɔɔ co o nɛi. Ɲiacɔ ndɔɔ co ko maa piɔɔ sialte tase.

¹⁶Kɔlkaloo sɔlaa co fisa a sianion cuungiaa, dɛnɔɔ sinaa hiow va ɲɛ sɔvɛ polon a volion nɔu.

¹⁷Vanaa sandaa kpakpala dɛnɛ vɔɔndo o kelaa nin ni. Vana dɔw pɛ kela ndɔ ndu pila-o taasi o kanda yoomu ndɔɔ.

¹⁸Kuundianndo hun a dɛnɛ palaa ni, yongaa cuu vana tambei ni.

¹⁹Calle o tuisinndo nin o kunda vanaa bala fondoa tɛɛn co fisa, a bolofaa cɔwvo piɔvanndo niaa vanaa yongaa.

²⁰Vana caa pɛ tuuvo o dɛnɔɔ, o biinun nɔm bila o ba[3]. Vana tiindan pɛ Mɛlɛka, ndu sɔla dɛnɛ kɛndɔɔ.

²¹Vana nɔ yiyan kɔlkaloo-o co vana taasio ni. Mɛɛ sɔɛi hɛnan vana o tueyɔɔ yɛ, lende koni i cɔɔlu vana sinapɛngoo ni.

²²Soon cindaa taasio co le vanaa nɔ ndu-a ni. Diɔmaa sondo vesɛiya yɛ, diɔmii ndɛi nda pila-e saangiaa nda ni.

²³Kɔl vana taasio cɛɛŋa sondo ndɔɔ ni, lelan sinapɛngoo cucun o sɔɔn ndɔn nin ni.

²⁴Maa vaa malɛ sɔɔn kɛndɔn co ni, n yeela o bololan nin, n co maa kooma singiaa le paalan.

²⁵Vanndo ce maa kela ndɔɔ sandu, kɛ nduyɛ o mɛɛlulan, mì kela ndɔ kon yɛɛ ndu ciee-piɔ́m.

²⁶Yeemɛi diaa ɲɛdiaa viam vana vallo tosaa ni, kani yiaan ma co vana ŋɔvɔɔ.

²⁷Vana fondoo tuu sɔɔn vɔɔnndon ni, sɔɔn fula ndu o sondo-on co maa yinnde biyaa.

²⁸Vana kɔl vɔɔndo mɛli sɔngɔlan ni, vana sɔɔn pɔmbɔɔ pesi canyan ni.

²⁹Vana kɔl vɔɔndo hìŋ caanda hɔlla ni, mò yɛɛ nda o nɛi vɔɔndo coo.

³⁰Vanndo kinda pɛ hɔltan mò yii cɔcɔn le dɛnɛ vɔɔndo tuuvo, mɛɛ o cii nin ndu tosa.

³¹Mɔsil lebɛɛo yulunnde co ni, o dɛnɛ sandaa tosaa vana sɔla ndu ni.

³²Vana biuvanndo co fisa a kuubanɔ cɔwvo. Vana kpuwvian ndu pila-o co fisa a vana bii kobio kpulukuu a cɔwvo-o.

³³Vana mal bɛɛ siondei le dɛnɔɔ pum sinaa, Mɛlɛka nɔ diomnde mɛɛlaalen ni.