Read Kissi Talelan 18 Bible Online

Talelan 18 - Kissi bible

Talelan 18

¹Vana yeema tɔnɔ ndɔ ndu pilaa daama-o holnun caanda le, vana tuu pɛ le ndu malaa o tuulu kɔl.

²O co o dɛnɔɔ bilaa biyɔɔ nin te diɔm sondo vesɛiyo dɔawnun ɲaale le, kɛ o yiyannda ndɔla idiɔmndan pɛngɛlaa ni.

³Kɔlvesɛiyo hun a vannda pɛɛsaa ni, dɛnɛ yongaa hun a siɛmbulan ni.

⁴Sɔɔn vanacieo n yingila maa mɛmma ihɛl, kɛ nɛɛ kɔlkaloo co tum-nda ndu co maa pee pɔmbɔ co hiovɔɔ-o.

⁵Dɛnɛ vɔɔndo o co le vana kɔlvesɛiyo simndan kɔɔli o kɔɔsɔɔ nin ni, mì vana tuŋ vana tɛɛmbuu isɔɔ loo dí ndɔɔ.

⁶Vana pe lebol too soo pɛ o kelu sɔngɔɔ, sondo ndɔɔ tosà ni mà hol ndu baa.

⁷Sɔɔn diɔmndo solìn o sondo-on kondu ndu dɛnɛ ni, cɔcɔn ndɔn co yaŋɔɔle o biinùn-nden ni.

⁸Maa ɲɛdiaa yeelɛi sɔɔn nda hɛɛnduu vannda coo-on co ni, o diallon nin di n tiiya vana ni.

⁹Vana co baala ndɔɔ saalan too, nda vana co ndu tɛɛmbuuo-o, yungu pilɔɔ nda co ni.

¹⁰Kpakio diola Mɛlɛka lan la co ni, lenin vana sandaa viannun ni mò sɔla kandaa.

¹¹Maa kobi co o kungaa a kpakio-o ɲɛ-sɔlaa vana bolofaa co ni, maa kpaki kanda vana-o o ca ndu ni.

¹²Yongaa pɛ̀ pɛ vanacieo o kɔl, mɛɛ delɔɔ ndɔɔ tiiya. Kɛ tuisinndo hun a heeloo sɔlaa ni.

¹³Te vanndo yeŋnun fɔlɔn te, mò yɔngu mulio, o dimi diɔmndon, siɛmbulan la bii ndu.

¹⁴Vana co a nàá-o nɔ pɛ yiyan kɛndɔɔ, o sɔla yoomuan. Kɛ te kɔl ndɔɔ co pɛ o sangaa nin, nɛ̀ɛ́ mingi yɛnin yoomuan ndu o n'dial?

¹⁵Vanndo keela pɛ kɔllo, o sɔla sinapɛngoo. Sɔɔn pɛɛku vana-on vana kɔlkaloo yeemà tueyɔɔ ni.

¹⁶Ɲɛ-kea kumbi diola bɔɔ-bɔɔ, ndu yaa vana o vanaa kùndàá lo ni.

¹⁷Vana ca ko aa vana bii seiyo tase-o nɔ di ni, kɛ fɔ mì vana nda sɛɛngian-ndo hun kɔɔsa, mò sɛɛngiaa ndu.

¹⁸Siondei malɔɔ cii sɛɛngianndan ni, ndi kialu yamɛi hali vanaa kpaayaa tɛɛn ni.

¹⁹Puapilɛ nɔm n tɛɛmbuu a ndu-o hiow kalu sɔɔnguuo ikɛi, a kobi co o kpakio nin-ndo biyɔɔ a cɔwvo[5]. Maa sɔkɔma nda kinda diola cɛi lemasaa-an sɛɛngianndan la kinda kɔllo ni.

²⁰Vanacieo nɔla mò dɔwnun balo a sɔɔn fulà ndu o sondo-on, ɲɛ o dimi-o pimi ndu ni.

²¹Sɔɔn sondon nɔla mì n ciindiaa vana, te kon te mì n dii vana. Lelan vana yeema pɛ sɔɛi, fɔ mò cɛl kɔmnde sɔɛi ken.

²²Vanndo sɔla pɛ lanɔɔ, o sɔla dɛnɛ kɛndɔɔ, kɛndɛi Mɛlɛka tosal ndu-e co ken ni.

²³A tɛɛlɔnndo vana bala fondoo soaa ni, kɛ vana bolofaa ndu, a kpaayaa o mulì ni.

²⁴Vanndo nɔ pɛ canyan sɛ́lɛ́, canyan mun tiwba mì n tuisi dɛnɛ palaa ndu coo. Kɛ caan kpeekpeiyo pum hiow lo lediom coo a bɛndoo, te kon te pɔmbɔɔ.