Read Kissi Talelan 19 Bible Online

Talelan 19 - Kissi bible

Talelan 19

¹Vana bala fondo co kelaa o dɛnɛ sandaa nin-ndo co fisa a diɔm sondo vesɛi dimi còòlan-ndo.

²Te vana nɔ taasi le dɛnɔɔ keleŋaa tosaa niŋ te, kani vana hiw pɛ lawvo a dɛnɔɔ a bendun.

³Vanacieo tosa pɛ diɔmnde mì dɛnɛ hɛlun ndu, o mululun Mɛlɛka a kɔltuwvo.

⁴Bolofaa canyan taw o cɔɔlu vana ni. Kɛ vana bala fondoo, caan ndɔ pilɛ o nɔu-o kpakpala ndu.

⁵Sei lacòòvaa lonin lende mò kɛɛ sangaa sɔla le. Vana dimia lacòòvaa bɛɛ helunnin sanga kelun le ndu-o le.

⁶Vannda taw a lisà vanaa bolofaa ni le mò ce nda ɲia. Vana-vana ko co caaŋoo vana ke vannda ɲɔɔn-ndo.

⁷Vana bala fondoo ndu, hali bɛndaa ndɔa, te kon te pɔmbɔa ndɔa mò nɛinun nda. Caaŋaa ndɔa bɛɛ mà faaŋian ndu. O yeema bɛɛ le sɔɛi o nda lo, o ci lɛ nda le.

⁸Vana nuwviaa pɛ dɛnɛ sinaa mɛɛ ndu pila kaolan. Vana holnun pɛ sinapɛngoo ndu sɔla dɛnɛ kɛndɔɔ.

⁹Sei lacòòvaa lonin lende mò kɛɛ sangaa sɔla le. Vana dimia lacòòvaa tambunin.

¹⁰O nìŋ mì diɔmndo va o ɲɛm kɛndɔn nin te, o co vɔ bɛɛ le cɛɔ handɔɔ simlacia bollen te.

¹¹Vana nɔ taasio-o biwnùn taw. Ɲɛ o kennùn le tosaa-o co tɛɛmbuu nda tɛɛmbuu a ndu-o hakio malɔɔ ni.

¹²Maa pɛɛliaa yàlà téndé kɔltuw masaa co ni, kɛ maa mɔ́m toal o billo coo-o ɲiacɔ ndɔɔ co ni.

¹³Hɔ́ɔ́ diɔm sondo vesɛiyo kpundɔɔ o co le fuɲa ndɔ ni. Sɛɛngiannda vanalanɔɔ la co maa kookole mɛnndan ma cuu nin te len.

¹⁴Vana tiwba mà loo cɛiyo a ɲɛm kɛndɔn kɛ́ɔ fulaa fuɲaa-mamaa o ba. Kɛ lanɔ taasio ndu, Mɛlɛka ke vana ndu ni.

¹⁵Dialun vílɛ́in bɛndon lɔ́ngùlɔn siɛlɛiyo tuisi vana coo ni. Vana soli yɛ kpeku loo, yima cuu ndu kuee le.

¹⁶Vana bii pɛ tɔŋndan o manda yoomu ndɔɔ, kɛ vana dow kela ndɔɔ taasi le, o sɔla piɔ́mndo.

¹⁷Vana ke pɛ vana bala fondoo ɲɛ, mɛɛ Mɛlɛka o dɔnda ni. Nduyɛ Mɛlɛka salanin dɔndɔ kon.

¹⁸Míngí po nɔmndo o nɛi lɔ́ɔ́ telenndo hiw-vɔ loo, kɛ hiw kɔllo tuulu ma yeema piɔ́m ndɔɔ le.

¹⁹Vana hiw kɔllo tuwvo-o bɛnda mò luɛi bɔnɔ[6], te o co kon te o yɛla.

²⁰Tuei silaa mà cɛl pɛɛkoo, o kon a sɔla kɔlkaloo.

²¹Tuulan taw la co vanacieo o kɔl ni, kɛ hɛnan Mɛlɛka-o tosan ni.

²²Ɲɛ vana yeema vanacieo o ba-o co lou o diomnden coo ni. Vana bala fondoo co fisa a vana lacòòvaa.

²³Vana nɔ pɛ siòòŋii Mɛlɛka-e ndu vannun yoomu. O pim pɛ o hinin, dɛnɛ palaa komal ndu le.

²⁴Mì vana siɛlɛiyo vow baa o hɛngɛi ɲɛdiaa nin, kɛ hali le kɔndɔɔ mò mɛɛnun, o tosa le.

²⁵Soŋ vana yongaa, o kon mì vana bii dɛnɛ bila loo sɔla taasio. Kanalan vana kendu kɔl-lo, o kon mò bii ɲɛ n co ndu cɔm-ndo bila.

²⁶Vana tɛɛmbuu pɛ bolofaa fuɲa ndɔ-o, mò tow kala ndɔ, mɛɛ hɔ́ɔ́ laasianndo co kon ni, ó divì vana hɔlla-o.

²⁷Po nuu, taa ve lɛ silaa tueyɔɔ le, mɛɛ a sinà lɛnin dɛnɛ le.

²⁸Sei kindu kɔl too mam dɛnɛ sandaa ni. Vanaa kɔlvesɛiya yeema dɛnɛ vɔɔndo tosaa o sɔɔn ndan nin ni.

²⁹Le vanaa yongaa vɔngulun nda pila le dɛnɛ palaa sɔlaa ni. Diɔmndo yɛ, ndu pila tosà ma hol ndu baa.