Read Kissi Talelan 2 Bible Online

Talelan 2 - Kissi bible

Talelan 2

¹«Po nuu sei! Taa bii pɛ sɔɔn ya co nɔm pɛɛkoo-on, taa loonun pɛ tɔŋnda nilan,

²taa yaŋ pɛ kɔlkaloo nilan ɲɛkɛndɛi, mà landu kɔllo o dɛnɛ sinaa coo,

³taa veelu pɛ kɔlkaloo, mà heelu diomndo le dɛnɛ sinaa veeloo,

⁴taa nuwviaa ndu pɛ mɛɛ vana nuwviaa volion yɛ, taa nuwviaa ndu pɛ tɛɛ-tɛɛ mɛɛ vana nuwviaa bolofaa yɛ,

⁵mɛɛ a biinin siòòŋii Mɛlɛka-e bila, mà sɔla sinapɛngoo le Hala sinaa.

⁶Kani Mɛlɛka yɔngu kɔlkaloo ni. Ndu o sondo sinapɛngoo a dɛnɛ sinaa fula ni.

⁷Ndu malaa co o mandaa o ba le vanaa co sakpo-a ni. Ndu co kɔ̀ɔ̀ cɔwvo le vanaa co kelaa o sandei nin-nda ni.

⁸O co nɛila dɛnɛ toɲalan kandaa, o co nɛi vanaa lo o diomnden coo a ndu-a kandaa.

⁹A tosa pɛ lende, mɛɛ a biinin nɛi dɛnɛ sandaa bila válán, nɛi dɛnɛ toɲaa a nɛi isakpoyaa bɛɛ. A biinin nɛila dɛnɛ kɛndɛlan kpede bila.

¹⁰Lɔ́ɔ́ kɔlkaloo hunnin o kɔl nɔmndo nin-ndo, lɔ́ɔ́ sinapɛngoo yɔngunin nɔm ɲaaloo-o,

¹¹yiyan kɛndɔɔ kandanin nɔm yɔŋii n pɔw, mì sinapɛngoo manda nɔm

¹²mò faŋa nɔm o nɛi dɛnɛ vɔɔndo coo. O kandanin nɔm ma kpakpala sɔɔn vɔɔŋun

¹³vanaa mal nɛi dɛnɛ sandaa ma va kelaa o nɛila maɲumndan coo-a.

¹⁴Vanaa kan nda co ɲaaloo dɔwnɔnndo o dɛnɛ vɔɔndo tosaa nin, à co a kɔlkɛndɔɔ o dɛnnda kɔlvesɛilan tosaa nin.

¹⁵Kela vanaa kan kpede co o laasiɛiyo, dɛnnda ndalan la co latuunduɛilan.

¹⁶Lende n tosanin ni ma kpakpala sɔɔn yeelɛin vanalanɔ co laa nɔm too, mial nɔ kon sondo yeelaa-o.

¹⁷Vanalanɔ kon pɛɛn, o kɛɛ pɔnɔ ndɔ ifelengiyaa-o, o pɔɛɛnun kpema Hala ndɔɔ-o.

¹⁸Kani cɛi vanalanɔ kon co kɔlan a sɔɔnguuo o piɔ́mndo sondoo, o vanvílɛ́iya lo nɛila ndɔlan la yaa vana ni.

¹⁹Vana-vana kɔɛ pɛ lon, ndu muungu lɛ le, ndu seelun ndɛ nɛila yaa vana o yoomoo nin-ndan te.

²⁰O kon, nɔm po nuu, a kelanin o nɛila vanaa tosaa dɛnɛ kɛndɛa coo, mà manda nɛila vanaa sandaa.

²¹Kani vanaa sandaa nda vanin icali o lɛŋnden nin, vanaa lo o lediom coo-a lonin lenin.

²²Kɛ vanaa kɔlvesɛiya nda kialunnin má faŋan lenin, vanaa lo o lediom coo le-a bɛɛ a sungunnin lenin.»