Read Kissi Talelan 21 Bible Online

Talelan 21 - Kissi bible

Talelan 21

¹Mɛɛ peo co yɛ kɔl masaa co Mɛlɛka o ba ni, nɛɛ o yeema-a lon o mingi ndu ni.

²Vanacieo yiyan lɔ́ɔ́-lɔ́ɔ̀ maa kela ndɔɔ naŋ ni, kɛ vana yaasiaa kɔltan-ndo co Mɛlɛka ni.

³Kela sandaa a dɛnɛ toɲaa tosaa hiow Mɛlɛka hɛnan a ndu sálàlan solullo.

⁴Tofa heelanndo a kɔl yongaa sólì haki vanaa kɔlvesɛiya ceen ni.

⁵Tuula vana dialun fulaa la tosa ni mì ɲɔɔn vannun ndu o ba taw. Kɛ vana hiw pɛ lawvo o dɛnɔɔ pɛŋnden le luɛi nɔm.

⁶Bolofaa vana sɔlà a còòlan-ndo, maa kumnde o co le vanaa co piɔ́mndo nuwviaa-a ni. O viw vana o ba le.

⁷Kɔlvesɛi vanaa kɔlvesɛiya dɔw nda yɛɛvɛ, kani a cɛl le dɛnɛ sandaa tosaa le.

⁸Kela vana yɔŋ vɔɔndo co bɔɔ kandafi-kandafi, kɛ sakpo kela vanaa sandaa ndu connun ni.

⁹O co fisa mì vana vannun o sɔngilen nin o cɛiyo sɛmtɛ, a calle cɛi pilɔɔ nin niaa vanalanɔ lasɔngɔɔ.

¹⁰Vana kɔlvesɛiyo ndu, dɛnɛ vɔɔndo o yéémà tosaa ni, hali caan ndɔ o mɛi ndu lon te.

¹¹Vana tuisi pɛ vana yongaa sangaa coo le yonga ndɔɔ, vana bii dɛnɛ bila loo sɔla taasio. Vana pɛɛku pɛ vana kɔlkaloo ɲɛ, o sɔla sinapɛngoo.

¹²Vana sandaa co ɲɛ co tosanndo o vana kɔlvesɛiyo lo cɛinin-ndo mɛɛndanndo. O keleŋa vanaa kɔlvesɛiya ɲindɔɔ o dɛnɛ palaa nin.

¹³Vana kindal pɛ vana bala fondo co koŋullo-o nilan, vana kon bɛɛ sɔlanin muli tuma o veelunin le malaa sɔlaa-o le.

¹⁴Vana ke pɛ vana tuulu kɔllo-o ɲɛ pum sɔ́ɔ́-sɔ́ɔ́, o ɲulul kɔl. A sɔɔ pɛ ɲɛ pum ndu o yifɔ, a ɲumi ndu yinnden o kɔl.

¹⁵Ɲɔɔ hɛ́nàn vana sandaa le ɲɛ tɔŋndo dimi-o tosaa ni, kɛ siòònde bíì vanaa yɔŋ vɔɔnda le kon tosaa ni.

¹⁶Vanndo mal pɛ nɛi taasio, mɛɛ ndu keleŋanin lakɔ ciee-piɔ́m mò kɔ va lon nda vanaa co lɛ le-a latulu.

¹⁷Vanndo nɔ pɛ yeeman taw, pɛŋnden le co mial ndɔ ni. Vanndo kaola pɛ mɔiyan a pululen, ndu siŋnùn vana bolofaa le.

¹⁸Vanaa kɔlvesɛiya a vanaa hui vannda-a sɔlanin sangaa o fonda vanaa sandaa a vanaa kela kɛndɛa.

¹⁹O co fisa mì vana calnun o lɛŋnde veselɛilen nin, a calle a vanalanɔ landilandio, o yeema sɔngɔlan-ndo.

²⁰Bolofaa sɔvɛɔ a ɲɛm kɛndɔn co taw o vana kɔlkaloo lo cɛinin. Kɛ diɔm sondo vesɛiyo ndu, laasiaa o laasiaa ɲɛm ndɔn ni.

²¹Vana kindìn le dɛnɛ sandaa a dɛnɛ sakpoo tosaa-o viaw yoomu ni. Vannda tosalnin vana kon dɛnɛ sandaa, mà ke ndu bɛɛlen.

²²Vana kɔlkaloo nɔlà mò kɔ del kobi kuubaa cɔvaa mayoomua co kandaa-o coo, mò koomba kpaki kobi kon ndóò tiindan-ndo.

²³Vanndo bii pɛ sondo ndɔɔ a diɛɛmule ndɔlen, o kpakpala sangala bɔɔ-bɔɔ.

²⁴Vana kuundian pɛɛsa caanda-o, diola ndɔlan aa «Yongaa». A yonga ndɔ bɛndu-bɛndoo o tosa dɛnndan ni.

²⁵Yeeman bɛndun vana siɛlɛiyo n yaa ndu ciee-piɔ́m ni, kani o cɛl le baalaa tosaa le.

²⁶Niinoo kpɛŋ o co ɲɛm ɲɔɔn hɔlten fulaa. Kɛ vana sandaa ndu, yɔngoo tuŋ o yɔngu ni, o kuunan lecoo le.

²⁷Ɲɛ vɔɔn bɛndoo pila sálà vanaa kɔlvesɛiya co ni, kɛ taama-taama, a soli ndu pɛ a yiyan nɔɔlɛiyo.

²⁸Sei lacòòvaa dɔawnunnin yɛɛvɛ, kɛ vana-vana yaŋnun pɛ, ndu nɔnin dío le sɔɛi.

²⁹Yiiyo vana kɔlvesɛiyo yii hɔlla ni. Kɛ vana sandaa ndu laalan kela ndɔɔ.

³⁰Kɔlkalu co le, dɛnɛ sinaa co le, taasi co le, o sim Mɛlɛka o hɔllo.

³¹Vana nɔlà mì vana toosiaa soa ɲɛkɛndɛi le paale cɔwlen, kɛ Mɛlɛka tosa ni mì vana nɔla yaamɔɔa o cɔwvo.