Read Kissi Talelan 23 Bible Online

Talelan 23 - Kissi bible

Talelan 23

¹La co pɛ ɲɛdiaa dioo niaa vana bɛndoo, a mandan a ɲɛ co nɔm o hɔl-lo.

²Te vana lepuloo n co ni, mɛɛ dio tùúlen dɛ!

³Puulùn ɲɛdiaa ndɔ kɛndɔɔ le, o nɛí vana dɛnɛ kondu le.

⁴Saangian kiltan bolofaa kɔɔli le, faŋa yiyan nɔmndo lecoo few.

⁵Ɲɛ-sɔlaa, vana del ndu dɔ́ɔ́ pɛ hɔlten o lonnun pɛ́, o vil bɔɔlan, o kɔɛnnun coocoo polon maa kovɛ.

⁶Dia ɲɛdiaa vana tofà vannda tofa vɔɔndo-o le, ɲɛdiaa ndɔ kɛndɔɔ bíì nɔm iyeema le.

⁷Kani mɛɛ yiyannda ndɔla vɔɔnndan la co yɛ o co ni. O dimulnin nɔm aa: «Dio ma kol», kɛ kɔl ndɔɔ connun polon a nɔm.

⁸A kuisinin ɲɛ n de-o, o kon, sɔɔn kɛndɛn n dimi-on solinin nɔm kpeku le.

⁹Soaa o diɔm sondo vesɛiyo lo le, kani o lueinin sɔɔn nɔmun kɔlkalon yii le.

¹⁰Fáŋà powta nda handu sindɛ o pɛɛngulan-ndan ma dɔɔnial vííyo lɛŋnde ndɔlen te.

¹¹Kani vana soaa le nda-o nɔ kpaayaa, o ciŋilannin nɔm le nda.

¹²Kumbi kɔl nɔmndo le pɛɛkoo sɔlaa, kumbi nila nɔmndan o sɔɔn yɔngu sinapɛngoo-on.

¹³Vo le hɔ́ɔ́ nɔmndo saangiaa le ndu mingio o nɛi le, bandìla ndu bɛɛ a sionnden o vinin te.

¹⁴A bandìla ndu pɛ a sionnden, a ciindiaa yoomu ndɔɔ, a faŋa ndu o nɛi ciee-piɔ́m-ndo coo.

¹⁵Po nuu sei! Taa sɔla pɛ kɔlkaloo o kɔl nɔmndo nin, ya bɛɛ kɔl nuu dɔawnunnin ɲaale.

¹⁶Te sondo nɔmndo va pɛ sɔɔn sandan dimio, i viawnin kponyoo a kɔlkɛndɔɔ o kɔl nuu nin di.

¹⁷Páŋalà vanaa lahakia le, kɛ nɔ siòòŋii Mɛlɛka-e lɔ́ɔ́-lɔ́ɔ̀.

¹⁸O kon a sɔlanin siɔdii laci kɛndɔɔ, nduyɛ tiindan nɔmndo helunnin nɔm te.

¹⁹Nɔm po nuu sei! Yaŋ ya nilan ma kendu kɔl, mì kela nɔmndo va sakpo.

²⁰Del vanaa pum mɔiyan-nda a vanaa hiw vision dioo-a kɔɔli le,

²¹Kani bala fondolan la toal vana kolaa mamɔiyo a vana mahiloo coo ni. Le tùú nda vanin kɔɔyɔlɔɔ-o, volɔɔla yuululan koni la vanin nda o ba le cuɛinɔnndo ni.

²²Yaŋ fuɲa nɔm nilan, ndu velun nɔm ni. Kialun kala nɔm yii le, hali o yuuva bɛɛ.

²³Kindin ma va vana toɲaa, ma nɔ kɔlkaloo, sinapɛngoo a dɛnɛ sinaa. Ɲɛla lan vɔngul o kɛ́-kɛ̀ le.

²⁴O ɲaaloo nin tuŋ fuɲa velu hɔ́ɔ́ sandaa-o co ni. Vana velu pɛ hɔ́ɔ́ kɔlkaloo, ndu vannun o kɔlkɛndɔɔ nin.

²⁵Màá fuɲa nɔm nda kala nɔm a dɔwnun ɲaale! Màá kala velu nɔm-ndo viow kponyoo!

²⁶Po nuu sei! Yɔngu ya kɔl nɔmndo, mì ɲɔɔ hɛnan nɔm le kelala nilan mɛɛndanndo.

²⁷Sina pɛngu maa soon yingilɛiyo vanalanɔ suundɛiyo co ni. Soon yingolon tongu loo lanɔ pilaa co ni.

²⁸Mɛɛ vanaa del vannda coo-a cumul nuaa yɛ koni vanalanɔ vaa lende bɛɛ cal mɛngɛlaa ni. Vanpiaandua nda faŋá kɔltan laandaa ndaa coo-a co nin sɛ́lɛ́.

²⁹Nɛ̀ɛ́ cal-lɛ mà dimi aa: «Kpòkóó, i kɔndu dɛnɛ fɔ́!»? Nɛ̀ɛ́ nɔ yɛ sɛɛngiannda lafi-lafilan? Nɛ̀ɛ̀ seilan la cúú yɛ kɔɔli le? Nɛ̀ɛ́ nda lɔaa yɛ o fondo fúúo coo? Nɛ̀ɛ́ nɔ yɛ hɔltan ladiuvaa vaŋ?

³⁰Vana cal man kolɔɔ o yala faŋan too, ó sanga a man bingulanndo le.

³¹Tofà mɔiyan le mɛɛ ma naŋ o tofaa mì ma va hiiyo solio o taalaa nin yɛ le. Ma caa hiovɔɔ vana o labolo,

³²kɛ o mɛɛlulan, maa kɛw ma kial vana ni, mì ma heelan vana maa lólò hɔ̀ɔ̀lɔ́.

³³O kon, hɔlta la saan vunduma súú-súù ka cɔu, sondo nɔmndo saan sɔɔn dimio laasi-laasi.

³⁴A cennun dɔ́ɔ́ maa o mɛmma ihɛllan coo n co ihini ni, maa vana co ihini o dɛ̀ndɔ̀ɔ́ tullo nɛɛ feke-feke-o.

³⁵A saan dimio aa: «A lɔɔ ya, kɛ o nɛi ya te! A kpuva ya, kɛ i sinan bɛɛ le! I keleŋa vɔ cɔnɔn mì ɲuna vɛlɛ le macelen.»