Read Kissi Talelan 25 Bible Online

Talelan 25 - Kissi bible

Talelan 25

¹Talela Salomɔn-ndan lapum la co vɛlɛ lan ni. Vanaa va baalaa, Esekia, masaa Yuda o ba bɛngu-a mɔɔsiaa lan ni.

²Le tùú Hala vian dɛnndan lapum-ndo o sɔlà biiloo ni. Le tùú masaa yaasiaa dɛnndan-ndo o sɔlà biiloo ni.

³N nɔla mì sina mɛɛ halataalaa co levil-lɛ le, n nɔla vɛlɛ mì n sina mɛɛ lɛŋnden le yingila yɛ le. Yiyannda co masaa o kɔl-tan bɛɛ, n sinà lan te.

⁴Faaŋiaa nɔ́ɔ́ co o volin humbon-ndo, mì vana cáà mun baalaa-o toosiaa ɲɛ sɔvɛɔ pum a mun.

⁵Vana faŋa pɛ vanaa kɔlvesɛiya masaa ikɛi, o tosa masalen o sandei nin, masale ndɔlen le sim yili.

⁶Nɔm pila sangalan masaa o hɔl te, cal o fonda vanaa bɛndua le.

⁷Kani o co fisa mà dimul nɔm aa: «Hel lecoo nanu», a nɔm tuisio le vana bɛndo heeloo.

⁸Keleŋa sɔɛi n ce-e dimi o cɛi kialaa n'yamaa nin te, kani te yaamɔɔ nɔmndo hun sɔla nɔm pɛ di, vɛ̀ɛ́ n tosa yɛnin o kon kɔɔli?

⁹Te sɛɛngianndo luɛi nɔm pɛ tɛɛn niaa vanndo, sɛɛngian kon n toosiaa ni, kɛ cɔɔmuu sɔɛi vana celen dimul nɔm niaa ndu kpé-e le,

¹⁰yɔŋii o tuei sɔɛi ken, mò yeow nɔm. Nɔm yɛ, a nɔla lɛnin sɔɔn vɔɔŋun n dimi mun-ndon vɔɔsuu le.

¹¹Maa ɲɛ nda toosiaa a sianion má kɛɛmiaa ndu a volin humbon-ndo sɔɛi dimin a telen bɛnda-o-e co ni.

¹²Maa kelɛi n'siani diandaa a yɔlɔn n'sianin diandaa kanalan vana kɔlkaloo co le vana tuɛi sɔɛi-yo ni.

¹³Mɛɛ piɔɔ sia a telen hangullo-o yɔngu vana hoeyii ɲuluei yɛ, lende kiilanɔ caa kiilalen tɛɛnguuo-o mingi vana ndɔ bɛndu vem ndu-o yoomuan ni.

¹⁴Vana dimì le vanndo ɲɔɔ keo kɛ o yɔngu ndu loo co ko maa piɔɔ hel mò yɔngu hoeiye kɛ o se loo.

¹⁵Vana biwnun pɛ taw, a nɔla mà sɔla simlacinɔɔ kɔllo. Vana caa pɛ sɔɛi dimi, a nɔla ma cii kpɔkɔsila bɔɔ-bɔɔ.

¹⁶Taa saalun pɛ lɛan, a dio man tùúlen, yɔŋii n hiw man dioo ma kuisi man.

¹⁷Hiwba kɔlan o caan nɔm ndo le, yɔŋii o sanga a nɔm ma kuisin ndu.

¹⁸Vana tɛndal caanda seile lakafalen-ndo co ko maa kpélénkpélén, maa mɔɛi cɔw, te kon te maa kɔɛi siɛmbiaa.

¹⁹Vana huì vannda-o tiindanndo o paale dɛnɛ palaalen coo, kon co ko maa ɲɛdiaa dioo a ciŋii lɛɛluannde, te kon te maa tiindanndo o pelii yomɛiye coo.

²⁰Vana co o mɔnɛi nin-ndo condun ɲaalon solullo, kon co ko maa domaa solinndo lekɔɔ a telen hoeyii miisisio, te kon te mɔima vaalɛiyan vanndo vowvo o pawvo.

²¹Te yiaan ma nɛi pɛ yaamɔɔ nɔmndo, ke ndu ɲɛdiaa, te kolɔɔ bii ndu pɛ, ke ndu mò kol.

²²Kani dɛngultan biyaalan n co ndu dengelaa o lebol lende ni. O kon Mɛlɛka dɔawnin nɔm vɔ̀ngɔ̀.

²³Mɛɛ hoeyii fula a luaŋ-ndo-e hun a piɔɔ yɛ, lende yondala caabiyɛilan[9] la hun a kɔlta tambɛilan ni.

²⁴O co fisa mì vana vannun o sɔngilen nin o cɛiyo sɛmtɛ, a calle cɛi pilɔɔ nin niaa vanalanɔ lasɔngɔɔ.

²⁵Mɛɛ mɛmma ɲuluan ma naŋ le bolola vesɛilan yɛ, lende Yoongu kɛndɛ fula levil-lo nàŋ o tueyɔɔ ni.

²⁶Vana sandaa vana kɔlvesɛiyo hiŋ hɔlla-o co ko maa soon mandaa mamɛn, te kon te soon kólaa linda mɛmma ndɔan ma co malindɛiyan-ndo.

²⁷O niŋ mì vana hiw lɛan dio le. O niŋ vɛlɛ mì vana hiw bɛɛlen nuwviaa le.

²⁸Vana tiw kɔl ndɔɔ ba loo co ko maa kobi kpaki ndɔɔ komba mò lonnun fondo fúú-o.