Read Kissi Talelan 26 Bible Online

Talelan 26 - Kissi bible

Talelan 26

¹Bɛɛle vana ke diɔmndo len le co ko maa piɔɔ mɛmma n'kpungba toal o vɔɔle kaka-kalalen nin-ndo, mɛɛ piɔɔ vana ve kɔl too hun a telen koavaa nuaa yɛ.

²Mɛɛ nɛ́ɛ̀nɛ́ɛ̀a, te kon te lɛɛfɛnnda balu coocoo nuaa a cel te yɛ, lende danga dɔwnun o fondo fúúo coo-o co ni, o bii vana-vana le.

³Le sow sionnden le co ni, le sofɛlɔɔ kalafoo co ni, mì yɔm bingio ndu va le diɔm sondo vesɛiyo kɔɔ lɔɔ.

⁴Múlùl diɔm sondo vesɛiyo mɛɛ diɔmii ndɔɛi co yɛ le, yɔŋii nɔm pila bɛɛ viol ndu.

⁵Múlúl diɔm sondo vesɛiyo mɛɛ diɔmii ndɔɛi co yɛ, yɔŋii o yiyan maa ndu bɛɛ kendu kɔl.

⁶Vana yɔngu pɛ diɔm sondo vesɛiyo yoongoo le kɔlan hivio, mɛɛ vana kon ndu tosa dɛnɔɔ mɛɛ vana pila kilin n'pelu, mò kol dɛnɛ kɔlvesɛiyo.

⁷Mɛɛ pelun vilɛin vana bɛvɛiyo co n soli ndu kpeku le yɛ, lende tale diɔmndo dimì-o co ni.

⁸Diɔmndo sangalaa co ko maa powvo yiiyo o fáàndaa.

⁹Diɔm sondo vesɛiyo taloo dimio, kon co ko kpen a vana mɔiyan ma co o hɔl-lo yɔm n'yɔɔ cuaa mò sim le sɔngɔɔ.

¹⁰Vana cuà diɔmndo te kon te vana kelanndo o baalaa nin-ndo, ndu co ko kpen a vana pala caanda-o.

¹¹Mɛɛ tunndo kuisi mò muungu mò de ɲɛ o kuisi-o yɛ, lende diɔm sondo vesɛiyo muungu diɔmii ndɔɛi tosaa ni.

¹²A ce nin vana cennun ndu pila vana kɔlkaloo-o? O co fisa ma tiindan diɔm sondo vesɛiyo a vana vaa lende kɔllo kɛsio coo.

¹³Vana siɛlɛiyo cɛn pɛ o dimi aa: «Yàlàá co o nɛi, visi biyaa co o nɛi kɔllo déŋ.»

¹⁴Mɛɛ dioo ɲuumbun o boondun ndɔn coo yɛ, lende vana siɛlɛiyo mulumulun o ndu lo kpele ni.

¹⁵Mì vana siɛlɛiyo vow baa o hɛngɛi ɲɛdiaa nin, kɛ hali le kɔndɔɔ mò mɛɛnun, i va ndu o ba ikala.

¹⁶Vana siɛlɛiyo ca ko aa ndu hiow kɔlkaloo a vanaa kɔlkalua caa sɔɔn mulio-a a ŋɔmmɛw.

¹⁷Sondoo vowvo o sɔɛi n sina lei nin co ko kpen a tun co hiownɔnndo-o nilan biyɔɔ.

¹⁸Mɛɛ vana seemɛi vii kilin leyinndon, kɔɔn te kon te bálta dii vana lan ndu pila balɔɔ-o co nuaa yɛ,

¹⁹lende vana hui caanda, mò muungu mó dimi aa: «Mamɔɔlan ya i va ni»-o co ni.

²⁰Te yɔm ve lɛ o yin te yinnden le ɲum. Te vana sɔɔn pɔmbɔ co lɛ le, sɛɛngianndan la cuu.

²¹Suɛɛnde yɔngu dɛngultan ni, mì yɔmnde tosa mì yinnden le bii. Lende koni vana kpɛlɛkpɛlɔɔ hun a sɛɛngianndan ni.

²²Maa ɲɛdiaa kɛndɛ yeelɛi vannda congoo co ni, o kɔllo nin di congulan la tiiya vana ni.

²³Sɔɔn kɛndɔn vanndo dimullo kɛ ma nɔ nɛyɔn ndɔɔ o kɔl, kon co ko kpen a bɔ́wvo yikpaa o volin humbun dindu lon.

²⁴Vana pɛɛsa vannda-o, sɔɔn kɛndɔn tuŋ o dimul nda ni. Kɛ o kɔl ndɔɔ nin ɲɛ celen pɔ́ co lon ni.

²⁵Vana vaa lende soo bɛɛ sɔɔn kɛndɔn, laalan ndu le. Kani kɔl ndɔɔ co o piaa cá a sɔɔn vɔɔnndon.

²⁶Nduyɛ mɛ̀ɛ́-mɛ̀ɛ́ o caa nɛyɔn ndɔɔ vionɔɔ, paale vanin mì vannda kpow a ce kɔlvesɛi ndɔɔ.

²⁷Vana tow pɛ soondo, ndu pila del lenin. Vana pimbul pɛ powvo, pow kalaa kei vana pimbul ndu-o coo.

²⁸Vana lacòòvaa pɛɛsà bɔɔ vanaa o co yɔullo a còòla lan-nda. Nduyɛ vanndo hiw pɛ vanndo sangalaa, o mal nɔm.