Read Kissi Talelan 28 Bible Online

Talelan 28 - Kissi bible

Talelan 28

¹Vana dɛnɛ vɔɔndo nɔlà mò sungu kiltan hali mì vana ve ndu tovɔɔ le. Kɛ vana sandaa ndu laalan ndu pila maa yàlà téndé.

²Te vannda luɛi pɛ seesiɛi o lɛŋnden nin, simlacia kui. Kɛ masaa nɔ pɛ kɔlkaloo, mò nɔ dɛnɛ sinaa, ɲɛ-ɲɛ kɔɛ o kɛndɛ.

³Masa bala fondo co vanaa nɔ se le-a dɛnndan tosallo kpoku-kpoku-o co ko kpen a piɔɔ lakongi bɛndu sia mò tɛɛmbuu tɔlɔɔlan, mì baloo cuu-o.

⁴Vanaa bii tɔŋndo le-a heelu vanaa kɔlvesɛiya ni, kɛ vanaa bii tɔŋndo-a, cɔlɔbaa nda cɔlɔba vanaa kɔlvesɛiya ni.

⁵Vanaa vɔɔnda bii ɲɛ-ɲɛ bila o dɛnɛ sandaa nin te, kɛ vanaa co Mɛlɛka nuwviaa-a nda bii ndu bila kpow.

⁶Vana bala fondo co kelaa o dɛnɛ sandaa nin-ndo co fisa a vana bolofaa co kela tuunduanndo-o.

⁷Hɔ́ɔ́ bii silalan-ndo co hɔ́ɔ́ taasio ni, kɛ vanndo holnun pɛ vanaa laasiannda, o tuisi fuɲa ndɔ siɛmbulan.

⁸Vanndo va pɛ kueelan malɔɔ le tɔnɔ bɛndoo sɔlaa, haliko mo siŋnun vana bolofaa, mɛɛ le vana tosal vanaa bala fondoa kɛndɛi-yo ndu co bolofaa cuungiaa lende ni.

⁹Te vanndo kinda pɛ nilan haliko o tuɛi tɔŋndo le, piɛile ndɔlen le siŋnun ɲɛ vɔɔn bɛndoo.

¹⁰Vana tosa pɛ mì vanaa sandaa kɔɛ o nɛi vɔɔndo coo, ndu delnin o soon ndu pila tow-vo nin. Kɛ dɛnɛ kɛndɔɔ co le vanaa co kela sandaa-a.

¹¹Vana bolofaa yiyan maa o kendu kɔl, kɛ vana bala fondo sina dɛnɛ-o nɔla mò soli ndu kɔlɔ.

¹²Vanaa sandaa nɔla pɛ dɛnɛ, dɛnɛ lebɛɛ bɛndoo pila co kon ni. Kɛ masalen le del pɛ vanaa kɔlvesɛiya o ba, vana-vana sɔndan.

¹³Vana co tɛɛmbuula ndɔlan vionɔɔ-o, tìw dɛnɛ ba le, kɛ vana sɔlɔlan pɛ tɛɛmbuula ndɔlan mò mal tan, ndu sɔla ɲííye tuinɔnndo.

¹⁴Dɛnɛ kɛndɔɔ co le vana siòònde co lɔ́ɔ́-lɔ́ɔ̀ le dɛnɛ vɔɔndo tosaa-o. Kɛ vana kindi pɛ nilan, o delnin o dɛnɛ palaa nin.

¹⁵Simlacinɔ kɔlvesɛi co masalen tosaa vanaa bala fondoa coo-o co ko maa yàlá co kuuliaa-o, maa kɔ́lɔ́vúlu co nin le ɲɛ kpuva-o.

¹⁶Simlacinɔ sinà dɛnɛ loo vángalà delɔɔcoo ni. Kɛ vana ɲɛm lakafan nɛinun pɛ, ndu viow yoomu.

¹⁷Vana dii vanacieo-vo lonin kiltan háá mò kɔɛ o sɛi ndɔ ndu pila-o. Vana-vana bɛnda mò simi ndu le.

¹⁸Vana kela pɛ o sandei nin ndu sɔla cindaa. Kɛ vana co kelaa o nɛila tuunduanndan tan tiɔn coo-o ndu, te o del baa le, o del baa pilɔɔ.

¹⁹Vana váá pɛ yondo ndɔɔ, o sɔla balootaw. Kɛ vana vow pɛ balan o baabaa nin, o pim bala fondolan.

²⁰Vana lo o lediom coo-o ndu sɔlanin duaa. Kɛ vana co lawvo le bolofaa keleŋaa sɔlaa-o, dɛnɛ palaa toalnin ndu coo le ken.

²¹O niŋ le hiyanndo handɔɔ vannda tɛɛn te. Vannda co kafala lan tosaa le tɔnɔla bingi-bingilan sɔlaa.

²²Vana yeemɛi bɛndoo yeema mò keleŋa bolofaa sɔla, o sínà bɛɛ maa kuɛi co hunɔɔ ndu tolɔɔ coo le.

²³Vana cɔm pɛ vanndo sɔvun ndɔn, o mɛɛlu nɔm yii luɛyɔɔ hiovɔɔ vana sangala ndu-o coo.

²⁴Vanndo ciimbuu pɛ fuɲa ndɔ a kala ndɔ mó dimi aa ken co sɔɛi vɔɔn te, mɛɛ caaŋoo vana del vannda coo-o o co ni.

²⁵Vana ɲɛ pe lehɔl too nɔ sɛɛngianndan ni. Kɛ vana tiindan pɛ Mɛlɛka, ndu sɔlanin bolofaa.

²⁶Vana tiindan pɛ yiyannda ndɔla ndu pila lan, mɛɛ diɔm sondo vesɛiyo co kon ni. Kɛ vana kela pɛ a kɔlkaloo, o hɛli-hɛlin kpundɛla bɔɔ-bɔɔ.

²⁷Vana ke pɛ vanaa bala fondoa, ɲɛ-ɲɛ ve ndu lepɛŋ te. Kɛ vana kɛɛ pɛ le nda tofaa, dangalan taw la co le ndu ni.

²⁸Vanaa kɔlvesɛiya sɔla pɛ masalen, vana-vana sɔndan. Kɛ a hiow pɛ, vanaa sandaa koma kui taw.