Read Kissi Talelan 29 Bible Online

Talelan 29 - Kissi bible

Talelan 29

¹Vanndo kindi pɛ nilan, mò kɛɛ le sɔvun nda cɔm ndu-on yɛlɛmaa, o tambu o lepilɔɔ, toosiaa kɛ́-kɛ̀ ve lɛ le ndu le.

²Vanaa sandaa kui pɛ, lɛŋnden le dɔwnun ɲaale. Vana kɔlvesɛiyo sul pɛ masaa, lɛŋnden le cɛɛŋun.

³Vanndo kaola pɛ kɔlkaloo, o nɛŋi fuɲa ndɔ kɔllo, kɛ vana del pɛ vanlaandua suundɛiya kɔɔli, ndu laasiaa kɛ́ ndɔɔ.

⁴Masaa handu pɛ kɔllo o dɛnɛ sandaa coo, o kui ɲɛm kɛndɔn o lɛŋnde ndɔlen nin, kɛ o hiw pɛ muloo heeloo, o dɔw lɛŋnden yɛɛvɛ.

⁵Vanndo hiw pɛ caan ndɔ sangalaa, mɛɛ o hendul ndu yaŋɔɔlen[10].

⁶Tɛɛmbuula vanaa tosaa dɛnnda vɔɔnda la co yaŋɔɔla ndalan ni. Kɛ vanaa sandaa nda co kponyoo viovɔɔ a kɔlkɛndɔɔ.

⁷Vana sandaa sinà ɲɛ vana bɛnda le vanaa bala fondoa tosallo-o, kɛ vana kɔlvesɛiyo ndu, ken co kpeku ndɔ le.

⁸Vanaa simul masalen-nda hun a vɔkɔ-vɔkɔɔ o kobio nin ni, kɛ vanaa kɔlkalua ɲumi kɔltuw vannda ni.

⁹Te vana kɔlkaloo kɔɛ pɛ kɔɔsɔɔ nda diɔm sondo vesɛiyo, diɔm kon tambu bɛɛ kɔl, te kon te o mam bɛɛ, o sɔlanin pɛngi o sɔɛi ken nin te.

¹⁰Vanaa diuvaa n'vannda yeema vanaa co kela sandaa-a le. Kɛ vanaa co kan kela toɲaa-a vanaa sandaa holnun ni.

¹¹Diɔm sondo vesɛiyo tambu pɛ kɔl, o solin kɔltambɛi kon o hɔl. Kɛ vana kɔlkaloo ndu, vana sina ndu o hɔl te.

¹²Simlacinɔɔ yaŋ pɛ nilan o sɔɔn lacòòvan, vanaa bɛndua co ndu o ba bɛngu-a kpow a siŋnun vanaa tosaa dɛnnda vɔɔnda.

¹³Vana bala fondoo a vana del vannda coo-o, nda ŋiɔn kpede a nɔ ɲɔɔ pum diom pilɛ: Mɛlɛka ke nda hɔltan le cɔu ni.

¹⁴Masaa kelu pɛ yamɛi vanaa bala fondoa o sandei nin, masale ndɔlen le viow le fɛɛn a fɛɛn.

¹⁵Sionnde silaalen a kanalanndan la yɔngù hɔ́ɔ̀ kɔlkaloo ni. Kɛ hɔ́ɔ́ co o malnanndo a ba ndɔ-o tuisì kala ndɔ siɛmbulan ni.

¹⁶Vanaa kɔlvesɛiya kui pɛ, dɛnnda vɔɔnndan la kui. Kɛ vanaa sandaa canin delɔɔ vanaa kɔlvesɛiya.

¹⁷Bandìla hɔ́ɔ́ nɔmndo le ndu silaa, o kon ma hun va nila ɲulu, mò nɛŋi nɔm kɔl.

¹⁸Te vana co lɛ levundu cɔ le, vannda tosa dɛnndan mɛɛ nda yeema yɛ. Kɛ dɛnɛ kɛndɔɔ co le vana co tɔŋndo biyɔɔ-o.

¹⁹O co a sondo le vana sila cɛɔ le, kani o bii bɛɛ bila, o tosa lende le.

²⁰A ce nin vana soaa o yiyan too? O co fisa mì vana tiindan diɔm sondo vesɛiyo, yɔŋii vana tiindan vana vaa lende.

²¹Vana hiw pɛ buɛiyo kɛngaa kandɔɔ o cuaambɔyɛi nin, o mɛɛlulan, buɛi vaa lende kendu tundɔɔ.

²²Vana kɔltuwvo nɔ sɛɛngianndan ni, vana yala kɔllo fulaa-o tɛɛmbuu vannda kɔllo taw ni.

²³Yongaa hun a siɛmbulan ni, kɛ kɔl tuisianndo tosà mì sɔla biiloo.

²⁴Vanndo cɛlan pɛ nda vuiyo, ndu pila tuisin dɛnɛ vɔɔndo coo. Mò tuei mɛnaa, kɛ mò kɛɛ le vuiyo cɔɔmuuo.

²⁵Vana yɔŋ pɛ siòònde a vanndacieea mɛɛ yaŋɔɔlen le co ndu laci. Kɛ vana tiindan pɛ Mɛlɛka, ndu sɔla kandaa.

²⁶Vanaa bɔɔ-bɔɔ co candɔɔla simlacia ndaa nuwviaa, kɛ Mɛlɛka kialu yamɛi kela vana-vana ni.

²⁷Vanaa sendu le-a nɛinun vanaa sandaa, mì kela vanaa sandaa bɛɛ nɛinun kela vanaa sendu le-a.