Read Kissi Talelan 31 Bible Online

Talelan 31 - Kissi bible

Talelan 31

¹Silala masaa Lemuɛl sɔla kala ndɔ o ba lan la co lan ni:

²«Po nuu sei! Yaŋ nilan. Nɔm po ni ya velu-o, nɔm kɔl nuu co coo-o.

³Tɛ̀ɛ̀mbuu yoomuma nɔmndan a vanlaandua le. Del vanlaandua mal masaa-a kɔɔli le.

⁴Lemuɛl, mɔiyan ma co ɲɛ kɛndɛ le masaa le. Masa co vana kolaa mamɔi le, simlacinɔ bɛnda a man te,

⁵yɔŋii mɔiyan bii nda mà pɔɛɛnun tɔŋndan. O kon, mà tuŋ vanaa bala fondoa dí ndaa.

⁶La yɔngù vana co vuo-o mɔima nɛyan, mì la ke vana co o mɔnɛi nin-ndo mɔiyan.

⁷Kani à kol pɛ, à pɔɛɛnun mɔnɛi ndɛi a sanga kɔl ndaa.

⁸Kɛ nɔm, a bɛnda ma soo le vanaa nɔ sondo le-a, ma sim le vanaa nda co kpalɔɔ-a.

⁹Soo le nda, tosa nda masalen coo a sandei. Soo le vanaa bala fondoa a le vanaa ikɔɔa.»

¹⁰«Nɛ̀ɛ́ saalun yɛnin vanalanɔ sɔvɛɔ? Ndu co fisa a yɔɔva báà kalaa.

¹¹Pɔnɔ ndɔ laalan ndu, o tɛɛmbuu ɲɛm pɔnɔ ndɔ-on te.

¹²O ceen ndɔɔ nin kpow, dɛnɛ kɛndɔɔ o tosàl ndu ni, o tosal ndu dɛnɛ vɔɔn te.

¹³O kindikindin pɛ o sɔla kola keesoo a kola yiiŋii cɔlua. O tosà baalaa ɲɛkɛndɛi a bala ndɔlan.

¹⁴Levil polon o fula a balo ndɔɔ ni, maa dɛ̀ndɛ̀la mamɛnnda leyula.

¹⁵Ɲɔɔ và vɔ mɔmìì mò cɛn, mò yaw ɲɛdiaa le yungu ndɔɔ, mò piɔw buɛyaa ndɔa laandua baalala ndalan.

¹⁶O keela pɛ kɔllo, o pendu lɛŋnden a volin o sɔlà o baala ndɔɔ nin-ndon, o soli nakɔɔ.

¹⁷Diallon pila o fula o vallo nin ni, o cel lɔ́ɔ́-lɔ́ɔ̀ mò kɛɛ va ɲɛ pum tosaa le.

¹⁸O co sinaa maa o co malaa sɔlaa o kpekula ndɔlan nin, ɲɛ-tengaa yala ɲum o ndu lo cɛinin icɔl te.

¹⁹Bala ndɔlan la sanga a vomullo le, suon ndɔn mel ɲɛla cuɛinanndan lɔu le.

²⁰O timbì ba ndɔɔ le vanaa ikɔɔa malaa, mò siɛndi baa le vanaa bala fondoa ɲɛ ke.

²¹Siòòŋii bii ndu a hoeiye le yungu ndɔɔ le, kani o ndu lo cɛinin kpede, vana-vana nɔ volɔɔla ihoeilan.

²²O co kolala bɛndulan toosiaa, kola keese fɛtufɛtu nɔ yinɔɔ siaŋa vólotótoo-o o cuɛinun ni.

²³Vana vannda ke bɛɛlen taw-vo pɔnɔ ndɔ co ni. O co kɔlan o fonda dimiaa n'sɔɔ nda kaasoŋaa kɔlkalua kobia.

²⁴Vanalanɔ kon toosiaa pɛ volɔɔla cuɛinanndan, o pisi. O toosiaa yáwve, o pisi yulaa co hiovɔɔ-a o ba.

²⁵Kpaaya ivanacieeya ndɔɔ a hɔ́ɔ́yɛi co ndu lekɔɔ maa volɔɔla cuɛinan. O yiyan pɛ a siɔdii lacio, o mam.

²⁶A kɔlkaloo pila o soaa ni, o caa bɔɔ silalan yɔngoo.

²⁷O nɔ hɔlten o ɲɛ-ɲɛ co tosanndo o ndu lo cɛinin coo. O cɛl le calle mò kafala balan te.

²⁸Cuavaa ndɔa cɛn pɛ a candu ndu, pɔnɔ ndɔ bɛɛ cɛn pɛ o sangala ndu aa:

²⁹‹Vanlaandua bɔɔ-bɔɔ a fula diallon. Kɛ nɔm, a hiow nda kpede.›

³⁰Dialun kɛndɔn hui vana, naŋɔɔ a hɔllo lo le. Kɛ vanalanɔ tuisin pɛ Mɛlɛka o labɛngunin, ndu sɔla candɔɔ.

³¹O bɛnda mò sɔla vɔ̀ngɔ̀lan le yɔŋ ndɔɔ, mì kobio kpow candu ndu le baala ndɔ kɛndɔɔ nɛɛ nda dimi sɔɔn-nda.»