Read Kissi Talelan 4 Bible Online

Talelan 4 - Kissi bible

Talelan 4

¹«Niaa poaa, la yaŋnun silala fuɲaa niaalan, la yaŋ nilan ɲɛkɛndɛi mì la sɔla dɛnɛ sinaa.

²Kani sinapɛngu kɛndɔɔ ya co niaa yɔngoo ni, la kɛ́ɛ̀ pɛɛku nuu le.

³Ya bɛɛ, poo ya yɔŋnun le fuɲa nuu ni. Po kaolaa a pole pilɛlen ya va kala nuu ikɛi ni.

⁴Fuɲa nuu va ya pɛɛkoo a ya dimullo aa: ‹Mandan sɔɔn nun o kɔl kpáŋ. Bii tɔŋnda nilan, o kon ma va yoomu.

⁵Sɔla kɔlkaloo a dɛnɛ sinaa. Pɔɛ́ɛ́nùn ndan te. Fáŋàn o sɔɔn co ya fulaa o sondo-on coo le.

⁶Màl kɔlkaloo nɔm hiɔlɔnndo le, o mandanin nɔm. Kaola ndu, o kandanin nɔm.

⁷Kandɔn kɔlkaloo co ho ni: kɔlkaloo sɔlaa, mà yɔngu ɲɛm nɔmndon kpow le dɛnɛ sinaa sɔlaa.

⁸Cɔ ndu maa ɲɛ sɔvɛ bɛndu, mò kuundiaa nɔm. Taa kafalan ndu pɛ, o siinguunin nɔm vana kùndàá a vana tɔ́ɔ́ bɛndoo.

⁹O vownin nɔm mɔsil lebɛɛo o lebol. O vanin le nɔm maa mɔsil lemasa.›»

¹⁰«Po nuu sei! Yaŋ-ndɔ nilan mà tuei sɔɔn nun. O kon a viawnin yoomu vɔsilan taw.

¹¹I pɛɛku nɔm nɛi kɔlkaloo, mí kɔa a nɔm o nɛila dɛnɛ sandaalan coo.

¹²Vá nin bɛɛ kɔlan, a kpekesiannin te, vá nin bɛɛ ɲaanɔnndo, a boŋnin te.

¹³Holnun pɛɛku n sɔla-o. Mál ndu mò hɛlun nɔm te, saa ndu kpíŋ, kani ndu co yoomu nɔmndo ni.

¹⁴Pílà pelei o kàŋ vanaa kɔlvesɛiya coo le, diam nɛi vanaa vɔɔnda le.

¹⁵Kpakpala nɛi ndaa, kei lecoo le. Faŋan lecoo, mà kɔɛnnun nɛɛ celen.

¹⁶Kani nda nda, taa tosa dɛnɛ vɔɔndo le, a hínì ma lɔl te. Taa yɔl vanacieo le, kpenndaa nda kpennda lahɔl ni.

¹⁷Kani a ɲɛdiaa kɔlvesɛiyo nda dɔawnun balo ni, mɔima delɔɔcoo-an nda kol ni.

¹⁸Maa ɲɛ-tengaa vavonndo nɛila vanaa sandaa la co ni. Ɲɛ-tengaa ndaa lo tengaa háá a paale kalalen.

¹⁹Kɛ maa maɲum nɛi vanaa kɔlvesɛiya co ni. À sinà ɲɛ nda keinin koondan mà del-lo le.

²⁰Po nuu sei! Yaŋ nilan ɲɛkɛndɛi o sɔɔn nun, yaŋnun ɲɛ ya co dimio-o.

²¹Sɔɔn nun kɔa nɔm levil te, manda mun o kɔl nɔmndo nin di-di.

²²Kani yoomoo n co le vanaa co mun cɛlɔɔ-a ni, kɛndia n co le dialun ndan kpow ni.

²³Manda kɔl nɔmndo hiovɔɔ ɲɛm tɔ̀un kpow coo, kani lon yoomu nɔmndo cɛn tum ni.

²⁴Cɛ̀l mì sondo nɔmndo dimi còòlan te, và sɔɔn vɔɔnndon solinndo o sondo le.

²⁵Tofa vannda hɔlla ciŋ, mà tofan laci sanaa.

²⁶Peelu nɛi n co keilan coo-o tɛlɛlɛ, mì fonda n co keiyo coo-o va o toosiaa ɲɛkɛndɛi.

²⁷Sei o ba kɛndɛ coo le, sei o ba mɛl coo le. Sɔɔnguu dɛnɛ vɔɔndo macɛlu le.»