Read Kissi Vana Kɔlkaloo 10 Bible Online

Vana Kɔlkaloo 10 - Kissi bible

Vana Kɔlkaloo 10

¹«Pengia vílɛ́iya del pɛ o cuɛima cun kɛndɛan nin, a yɔngu man cun vɔɔndo, ma tumulu. Lende koni, ɲɛ-pɔmbɔ bɛɛ diɔmnde del o kɔlkaloo coo ni, i tɛɛmbuu ndu.

²Yiyan vana kɔlkaloo kɔɛ pɛ o ba kɛndɔɔ coo, yiyan diɔm sondo vesɛiyo ndu sɔndan o ba mɛllo coo.

³Hali o nɛi diɔm sondo vesɛiyo va kɔlan ni, mɛɛ o nɔ kɔl nin te yɛ, o cɔm vannda maa o pe lebol te.

⁴Te vana nɔm bɛndoo tambu pɛ kɔl a nɔm, faŋan o fonda nɔm baalaa le. Kani meiyo mala vana le biondɔnnda bɔɔ-bɔɔ kpakpalaa.

⁵Mí ca dɛnɛ vɔɔndo pum o paalen bɛngu: simlacinɔɔ tiwba mò pɔw,

⁶mò ke diɔmaa sondo vesɛiya simlacilen o fondala bɛndulan, mì vanaa sɔvɛa[1] lo o fondala pɔmbɔlan.

⁷I ce cɛa kɔlan o soa coo, mí vanaa bɛndua nda va kɔlan a n'pelu maa n'cɛ.

⁸Vana-vana tow pɛ soondo, ndu pila del lenin. Vana buli pɛ tɛɛngei o kpakio, kɛwvo tiwba mò lɔva ndu.

⁹Vanndo va pɛ powtan kalaa, o tiwba mò bolin. Vanndo va pɛ yɔmndo tɛndaa, o tiwba mò yɔŋulun.

¹⁰Te cuei bumbula pɛ, mì vana cɛɛŋa ndi le, mɛɛ fɔ yoomuan taw le vallo a ndi. Kɛ taasio tosa ni mì vana tiwba.

¹¹Te kɛwvo lɔva pɛ vana kpɔ́lɔ̀ɔ́ lɔ́ɔ́ pá o soli koovan, ɔ́ɔ̀ niko tɔnɔ kooma o co soli-an?

¹²Vana kɔlkaloo soo pɛ, sɔɔn mun hɛnan vannda. Kɛ diɔm sondo vesɛiyo ndu kumbi dɔ́ɔ́ pɛ sondoo, vannda yaa ndu.

¹³Kani o kandu pɛ sɔɛi o dimi sɔɔn idiɔmndon, o va vɛlɛ pɛ siowvo o dimi sɔɔn fondo-fondon.

¹⁴Vana seemɛiyo sanga a sɔɛi le. Vanacieo sina ɲɛ co hunɔɔ tosan-ndo le. Nɛ̀ɛ́ dimul lɛnin ndu ɲɛ koma yɔŋnɔn ndu kɔɔli-o?

¹⁵Sangaa pila diɔmndo sanga o baala ndɔɔ nin ni, kɛ o sɔla tɔnɔ bɔɔ le. O sina bɛɛ nɛi vana kei le kɔlan ciee-o le.

¹⁶Dɛnɛ palaa co le lɛŋnde masaa co cuaambɔɔ len, lɛŋnde simlacia ndɔa toal ɲɛdiaa kɔɔli idii púŋ-nden pɛɛn.

¹⁷Dɛnɛ kɛndɔɔ co le lɛŋnde len, lɛŋnde masa ndɔɔ velun o polale vanaa kùndàá nin-nden. Lɛŋnde len pɛɛn, le simlacia ndɔa dia ɲɛdiaa a telen bɛnda-o len. Le yoomuan sɔlaa nda dia ni, kɛ o co le mamɔi pum te.

¹⁸Vana siɛlɛiyo ndu, yomndo yindɔ cɛi ndɔɔ yom ndu coo ni. Lullo cɛiyo lul vana idiaa coo ni.

¹⁹Le ɲaaloo dɔwnɔnndo vana tuisi kafo ɲɛdiaa ni, mɔiyan ma nɛŋi vana kɔllo ni, volion tosa ni mì vana sɔla ɲɔɔn kpow.

²⁰Hali nɔm o kɔl, congu masaa le, dɔaw vana ɲɛ-sɔlaa danga o nɔm ndo cɛinin te, yɔŋii yow co kelaa coocoo-o kɔ hivul ndu sɔɔn mun, mí ɲɛ nɔ kumbanndan-ndo kɔ tɛɛngul ndu sɔɔn n dimi-on.»