Read Kissi Vana Kɔlkaloo 11 Bible Online

Vana Kɔlkaloo 11 - Kissi bible

Vana Kɔlkaloo 11

¹«Vuu ɲɛdiaa nɔmndo o mɛnndan coo, kani palɛi bɔɔ-bɔɔ i hiow pɛ, a co ndu saalɔn.

²Yɔngu bolofaa nɔmndo vanaa ŋɔmmɛw kpengei pilɛ, ma yɔngu vanaa ŋɔmaa kpengei pilɛi. Kani a sinà dɛnɛ palaa toalnin o lɛŋnden coo-o le.

³Yumbuyumboo pɛ̀ pɛ a mɛnndan, piɔɔ tol o lɛŋnden coo. Nɛɛ-nɛɛ yɔmndo del pɛ, o va a ba too, o va a ba luaŋ-ndo, fonda o del coo-o, lon o lo ihini ni.

⁴Vana-vana lo pɛ hoeiye tofaa, mɛɛ ndu veenin iciɛɛ le. Vana-vana lo pɛ piɔɔ helaa tofaa, mɛɛ ndu kuwnin te.

⁵A sínà nɛɛ hoeyii yoomuɛi fula-a le, a sínà vɛlɛ mɛɛ vanacieo cɔawnùn kala ndɔ o dembe yɛ le. Lende vɛlɛ koni, vana tiwba baala Hala cɔw ɲɔɔn kpow-vo tosa-o bilaa biyɔɔ le,

⁶Le sɛ dɔ́ɔ́ pɛ, a saŋ yɛyii nɔmnde, háá icɔllo kɛ́sì ba nɔmndo pɛngio le. Kani a sinà n naŋnin te, ko ba pilɛ ni, ko kpow yɛ ni. Ko mun kpow yɛ ni, a sina le.

⁷Ɲɛ-tengaa yeela, o naŋ mì hɔltan la ce paalen.

⁸Te vanndo tosa pɛ yoomu vɔsilan taw, o bɛnda mò dɔwnun ɲaale o vɔsila lan kpow bɛngu. Kɛ o loonun maa palɛi dɛnɛ palɛi vanin sɛ́lɛ́. Dɛnnda toal vana coo lan kpow, sanga fondoo fúú.

⁹Nɔm langbanɔ felengoo, dɔwnun ɲaale telen n co vɔ felengi-o. Naŋ kɔl o felengiyɛi nɔmnde nin. Kela o nɛila kɔl nɔmndo yeema lan coo, tosa dɛnnda n co cɔw lan kpow. Kɛ sinà pɛɛngu maa Hala kialunin dɛnnda nɔmndan kpow iyama.

¹⁰Lelan, faŋan dɛnɛ palaa o kɔl, má faŋan dɛnnda vɔɔnndan o n'dial. Kani sanga fondoo fúú felengiyɛi a dialun fulan ifelengiyan co ni.»