Read Kissi Vana Kɔlkaloo 2 Bible Online

Vana Kɔlkaloo 2 - Kissi bible

Vana Kɔlkaloo 2

¹«Mí dimul kɔl nuu aa: ‹N tofa vɔ ɲɛ kɔlkɛndɛla ceendo ho la ke vana lan, mí mɛɛndan-ndɔ ɲɛ co dɛnɛ kɛndɔɔ nɔu-vo.› Kon vɛlɛ bɛɛ, sanga fondoo fúú!

²Mamɔɔ ho bɛɛ diɔmnde fúú o co ni. Yɛɛ ɲaaloo ndu ke yɛ vana?

³Mí kialun o kɔl le sondoo lueiyo o mɔiyan nin, haliko mi yáà vel vanaa laasiannda, kɛ mì yáà va kelaa a kɔlkaloo. Yáà yeema mì yáà sina ɲɛ vanndacieea ndáà bɛnda le tosaa o ceendo coo, o palɛi nda co yoomu-e kpow nin-ndo.

⁴I tosa baalala bɛndulan taw. I tengulun cɛilan mí tɔal rɛsɛnndon taw.

⁵I soli nakɔlan a fondala toalaala iyɔmndan, mí toal yɔmii koamɛi súúlan kpow lenin.

⁶I tow soonnda mandaa mamɛnndan le yɔmii tɔlnun sɛnɛi-ye pɔɔliaa.

⁷I pendu cɛa piaandua a cɛa laandua, mí sɔla vɛlɛ a celen o kan kɔɔli, cuavaa nda velu ya o bɛngu coo-a pɛɛn. Mí sɔla cɔlua bɛndua a cɔlua pɔmbɔa taw-taw hiovɔɔ vanaa va ya tase Yerusalɛm-nda coo.

⁸I cuungiaa volion a sianion, n fula masaa o ba-on a n fula o kobila va ya o ba bɛngu lan nin-ndon. Mí sɔla vanaa solia n'condua piaandua a à laandua. Mí yil laandua taw mɛɛ vanpiaandua yeema ken tosaa yɛ.

⁹Mí siŋnun vana bɛndoo hiovɔɔ vanaa kei ya tase Yerusalɛm-nda kpow coo. Nduyɛ, a kon kpede, kɔlkalu nuu va ya nin.

¹⁰Ɲɛ-ɲɛ hɔlta nilan láà yeema, i tuŋ ndan ɲɛm mun te. Dɛnɛ ɲaale co le, o ya kɛɛ tosa-o. Mí dɔawnun ɲaale o baalala nilan nin kpow. Tɔnɔ ya sɔla o baala kon nin-ndo yɔŋnun kon ni.

¹¹O kon, mí mɛɛndian baalala ya tosa lan kpow, a mɛɛ ya sanga o lan tosaa yɛ. Kon kpow, sanga fondoo fúú. Ɲɛ fondoo kiltan kɔɔli co kon ni. Tɔnɔ oo tɔnɔ co o paalen bɛngu le.

¹²O kon kɔɔli, mí mulin a ba kɔlkaloo. Yáà yeema mì yáà sina ɲɛ co kɔlkaloo-o, mì yáà sina vɛlɛ ɲɛ co diɔmnde a seemaa-o. O kon mí ɲunan aa: ‹Yɛɛ kpeekpei vana siŋnunnin masaa o fonda nuu-o koma tosa yɛnin, ó tosan-ndɔ loo?›

¹³Mí ca maa kɔlkaloo co fisa a diɔmnde, mɛɛ ɲɛ-tengaa co fisa a ɲumndan yɛ.

¹⁴Vana kɔlkaloo sina nɛɛ o co kɔlan-nda, diɔm sondo vesɛiyo yɛ, o ɲumndan nin o kɔa ni. Kɛ mí bii bila maa nda ŋiɔn kpow, ɲɛ pilɔɔ co nda cumndo ni.

¹⁵O kon mí yiyan aa te ɲɛ pilɔɔ co naa cum naa diɔm sondo vesɛiyo ni, le yɛɛ ya sɔla yɛ niko kɔlkaloo hiovɔɔ ndu coo? Kon vɛlɛ bɛɛ, sanga fondoo fúú.

¹⁶Kani vana va vana kɔlkalu, vana va diɔm sondo vesɛi, taa vi pɛ, mɛɛ palɛi hiaw faw, lende vannda kɔa a sɔɛi nɔmnde pɔɛɛnɔnndo ni. Mɛɛ diɔmndo vu yɛ, lende koni vana kɔlkaloo bɛɛ vu ni.

¹⁷O kon mí ceendo kusulan ya, kani baala co tosanndo o ceendo coo nanu-o niŋ te. Kon kpow sanga fondoo fúú, ɲɛ fondoo kiltan kɔɔli o co ni.

¹⁸Sanga kɛ́-kɛ̀ ya co o paalen bɛngu nanu, mó kusulan ya. Kani vana koma hunnin ya kɔɔlio ya melnin ɲɛm mun ni.

¹⁹I sina vana súú ndu vanin te, ko vana kɔlkalu ni, ko diɔm sondo vesɛi ni, i sina le. Nduyɛ, ndu koma nɔnin hɔlten o baala nuu coo ni, o ya tosa a kpaaya nuu, mí tosa ndu a kɔlkalu nuu kpow o paalen bɛngu-o pɛɛn. Kon vɛlɛ bɛɛ, sanga fondoo fúú.

²⁰O kon, mí diallon vu ya le sanga bɛndu ya sanga o paalen bɛngu-o.

²¹Kani mì vanndo cii baalaa tosa a kɔlkaloo, mò tosa ndu a dɛnɛ sinaa a á yiyan ndɔɔ kpow, kɛ mò mel vana celen ɲɛm ndɔn kpow, vana sanga bɛɛ le mun too. Sanga fondoo fúú co vɛlɛ kon ni. Co dɛnɛ sandaa le co kon te few.

²²Ɔ́ɔ̀ niko tɔnɔ vanacieo sɔla le sanga bɛndu o co o paalen bɛngu a somisominndo-o?

²³Buulanndan a yiyannda vɔɔnndan la co ndu palaa lɔ́ɔ́-lɔ́ɔ̀, o co pɛngi sɔla o kɔl ndɔɔ nin te. Hali icɔl, o pɛngi le. Kon vɛlɛ bɛɛ, sanga fondo fúú.

²⁴Ɲɛ co dɛnɛ kɛndɔɔ o ceen vanacieo nin daama-o co dioo, kolɔɔ a ɲaaloo dɔwnɔnndo o baala ndɔɔ nin ni. Kɛ kon vɛlɛ bɛɛ, mí ca maa Mɛlɛka o ba o fula ni.

²⁵Kani te o co mì Mɛlɛka cɛl te, ɔ́ɔ̀ vana tiwba mo de, mo dɔwnun ɲaale-o?

²⁶Vana hɛnan Hala-o, ndu Hala ke kɔlkaloo, dɛnɛ sinaa a kɔlkɛndɔɔ ni. Kɛ vana lahakio ndu, Hala pei ndu pɛ yiyanndo nin, o nuwviaa, o cuungiaa le vana hɛnan Hala-o yɔngoo. Kon vɛlɛ bɛɛ sanga fondoo fúú, ɲɛ fondoo kiltan kɔɔli pɛɛn.»