Read Kissi Vana Kɔlkaloo 4 Bible Online

Vana Kɔlkaloo 4 - Kissi bible

Vana Kɔlkaloo 4

¹«Mí dɔaw dɛnnda lakafala co o lɛŋnden coo lan kpow taasi, mí ca vanaa nda co saangiaa-a a mɛmɛan o lahɔl. Vana co le nda ɲɔɔlu le, à co nda tiindaa a kpaayaa, vana bɛɛ ve le nda ɲɔɔlu le.

²I ce maa vanaa vinnun nin-nda hiow va o kɔlɲuloo nin a vanaa co vɔ yoomu-a.

³Kɛ vana vilun-ndɔ loo hiow vɛlɛ va fisa a vanaa ŋiɔŋa kan. Kani ndu ci vɔ kafala vannda co tosaa o paalen bɛngu lan te.

⁴Mí dɔaw vɛlɛ taasi maa o co fondo le vannda co sangaa le, a yeema ma hiow caanda. Sanga fondoo fúú co vɛlɛ kon ni, ɲɛ fondoo kiltan kɔɔli pɛɛn.

⁵Lende i co ni, diɔmndo co lo balan kafalaa háá mò vi a yiaan.

⁶Ɲɛ-pɔmbɔ nɔu o ba o kɔlɲuloo nin co fisa a balan peiyo cá kɛ ma va o sangaa nin. Kani kon kpow ɲɛ fondoo kiltan kɔɔli co kon ni.

⁷I saalun vɛlɛ dɛnɛ i diɔmndo pum o paalen bɛngu:

⁸ndu co a vana co ndu pilɛ kpé-o o kɔɔ ni. O nɔ po le, o nɔ bɛndu le, o nɔ pɔmbɔ le. Kɛ o pɛngi a baalaa le, o co yeemaa le bolofaa sɔlaa tuŋ. Nduyɛ, o co ɲunanndo aa: Le nɛ̀ɛ̀ ya co yɛ sanganndo ho mì va kɛɛ yeemɛi nii tosa? Sanga fondoo co vɛlɛ kon ni, ceendo vili vɔɔndo pɛɛn.

⁹Vanaa ŋiɔn vaa nɛɛ pilɛ co fisa a vaa vana pilɛ. Kani a yiinan pɛ nda ŋiɔn, a de baala ndaa tɔnɔ.

¹⁰Te vana pilɛ o nda tɛɛn del pɛ, vanndo pilɔɔ cua vana del-lo. Kɛ dɛnɛ palaa co le vana co ndu pilɛ-o. Kani te o del pɛ, o nɔnin vana malaa le cɔnɔnndo le.

¹¹Lende koni, te vanaa ŋiɔn a hini pɛ nɛɛ pilɛ, a tuuluan vundé-vundé, kɛ vana co ndu pilɛ-o tiwba mo tuulu le.

¹²Vanaa ŋiɔn a nɔla mà simul vana óò delnin vana pilɛ coo mì ndóò nɔla ndu-o. Yoole lɔnnun a kɛilan tan yáá len le yala siɔŋ te.

¹³Langbanɔ bala fondo nɔ kɔlkaloo-o co fisa a masa yuuvɛi diɔm cɛl le silalan biyɔɔ loo.

¹⁴Toɲaa co kon ni. Hali o va bɛɛ maa fulaa langbanɔ kon fula o kaasoo ni mó siŋnun masaa, te kon te aa violɔnndo o velun o bala fondolan nin ni, mó va kelaa piɛilen o masale ndɔlen nin.

¹⁵Mí ca vanaa yoomaa co kelaa o paalen bɛngu-a kpow simndan langbanɔ felengoo kɔɔli, ó va kon hunɔɔ muungu o fonda masaa-o pɛɛn.

¹⁶Vannda va ndu kɔɔli sɛ́lɔ́ɔ́ taw, ndáà cuu cɔm te. Kɛ lambi koma hunnin ndu kɔɔli-o yeemanin ndu le. Kon vɛlɛ bɛɛ, sanga fondoo fúú, ɲɛ fondoo kiltan kɔɔli co kon ni.»

¹⁷«Taa va pɛ luɛyɔɔ o Cɛi-Hala-o nin, a caa taw. Kɔ ma yaŋnun. Kon co fisa a kɔlan sálàlan solio maa diɔmaa sondo vesɛi. Kani diɔmaa sondo vesɛiya sínà maa dɛnɛ vɔɔndo le nda co kon tosaa le.»