Read Kissi Vana Kɔlkaloo 5 Bible Online

Vana Kɔlkaloo 5 - Kissi bible

Vana Kɔlkaloo 5

¹«Kélèŋà sondoo kumbi le sɔɛi le. Sɔla yiyan kɛ́-kɛ̀ o kɔl ma yala dimi Hala o hɔl te. Kani Hala co o halataala, nɔm a co o lɛŋnden coo nanu. Lelan, soo tùúlen.

²Vana hiw pɛ buulanndan, a sɔl lɔma vɔɔnndan. Lende koni, vana hiw pɛ sɔɛi, a dimi sɔɔn idiɔmndon.

³Taa baa pɛ yoolen o Mɛlɛka lo, yangaa le len timbio le, kani Mɛlɛka yeema dɛnɛ idiɔmndo le. Lelan peelu ciɛ́i n cua-e.

⁴O co fisa mà kɛɛ le ciɛ́i cuaa, a ndi cuaa ma kɛɛ le ndi peeloo.

⁵Cɛl mì sondo nɔmndo mal nɔm o pɔwlan nin te. Dímùl vana co kiilalen o Cɛi-Hala-o nin-ndo le aa: ‹Pɔwlan ya pɔw o ciɛ́i cuaa ni.› Vɛ̀ɛ̀ ma tɛɛmbuu Mɛlɛka kɔl, mò laasiaa baalala nɔmndan kpow?

⁶Diɔmun fondon co o lɔma sɔlaama bɛndu-bɛnduan nin. O tobola bɛndu-bɛndoo nin bɛɛ sɔɔn fondon co. Lelan, nɔ́ siòòŋii Mɛlɛka-e.

⁷Taa ce pɛ ma va vana bala fondoo delɔɔ coo o kobio nin, mì sandii lepɛŋnde va, hali ma downun kɔndɔfili le dɛnnda lan te. Kani simlacinɔɔ co o ba vana hiow ndu-o bɛngu, vanaa ŋiɔŋaa kan bɛɛ a co o ba vana hiow nda fondaa-o bɛngu.

⁸Le vanndacieea kpow tɔnɔ lelɛŋndo co ni. Masaa bɛɛ, yondoo tɔnɔ ndɔɔ fula ni.

⁹Vana-vana kaola pɛ volion, n pe ndu lehɔl te. Vana-vana kaola pɛ bolofaa, o tiw ndu le. Sanga fondoo fúú co vɛlɛ kon ni.

¹⁰Bolofaa kui pɛ, vanaa diaa ndu-a bɛɛ kui. Tɔnɔ yɛɛ vana ɲɔɔ nɔ yɛ niko o kon, te o co le ndu tofaa a lahɔl daama le?

¹¹Vana co baalaa-o hinin pɛ, o lɔlnun fɛɛ. O sɔla tùúlen, o sɔla taw le dioo, o co kpeku ndɔle. Kɛ vana nɔ bolofaa taw-vo nɔla lɔan te.

¹²Sanga bɛndu-bɛndu ya ce o lɛŋnden coo-o co ni, mì vana bolofaa manda ɲɛ-sɔlaa le dɛnɛ palaa ndɔɔ,

¹³te kon te, mò tɛɛmbuu bolofaa ndɔɔ o sɔɛi fondoei pum nin, mì hɔ́ɔ́ o velu-o koma lonnun bala fondo.

¹⁴Mɛɛ vanacieo fula kɔɔle fondo kala ndɔ o dembe yɛ, lende koni o faŋannin vɛlɛ kɔɔle fondo o ceendo ho coo ni. A sanga bɛndu o sanga-o kpow, o kuenin a ɲɛ-ɲɛ o ba le.

¹⁵Dɛnɛ palaa bɛndu-bɛndoo co vɛlɛ kon ni, le muungoo mɛɛ o hin yɛ kpafii. Ɔ́ɔ̀ niko ɲɛ o mei o sanga bɛndu o sanga kon-ndo nin-ndo?

¹⁶Lende o co palɛi ndɔɛi kpow ciiyo o ɲumndan nin ni. Dɛnnda palaalan, sangalan a kɔl tambɛiyo taw co ndu coo ni.

¹⁷O ya dɔw taasi-o co hoo ni, o naŋ mì vanacieo va dioo a kolɔɔ, mò dɔwnun ɲaale a sanga bɛndu o co o paalen bɛngu-o, ó palɛi Mɛlɛka kilu ndu le yoomoo-e bɛngu pɛɛn. Ó ndɔɔ co kon ni.

¹⁸Handɔɔ o kon coo, vana-vana Hala ke pɛ bolofaa a ɲɛ-sɔlaa taw, ndu dɔwnun ɲaale o baala ndɔɔ nin. Ó ndɔɔ co kon ni.

¹⁹Nduyɛ, te ɲɛ bɔɔ hun ve lɛ ndu o ba le, o bɛnda mò yiyan a palɛi o va yoomu-e o kɔɔ, telen Hala va ndu mulullo mó va a kɔlkɛndɔɔ-o pɛɛn.»