Read Kissi Vana Kɔlkaloo 7 Bible Online

Vana Kɔlkaloo 7 - Kissi bible

Vana Kɔlkaloo 7

¹«Diola kɛndɛlan nɔu co fisa a cuɛima cun kɛndɛan suinɔnndo, paale piɔ́mnden le co fisa a paale vialannden.

²O co fisa mì vana kɔɛ o cɛi biisio co-o nin, a kɔlan o cɛi ɲɛdiaa kafoo co nin-ndo nin. Kani piɔ́mndo co mɛɛlula vanaciee oo vanaciee ni, vanndacieaa yoomaa kpow a bɛnda ma yiyan a ken.

³Mɔnɛi co fisa a mamɔɔ. Kani i tosa mì vana yii hɔlla, kɛ ken co fisa le kɔllo ni.

⁴Nɛɛ vannda co o sangaa nin-nda, lon vanaa kɔlkalua cal ni. Kɛ nɛɛ kɔlkɛndɔɔ co-a, lon vana komal diɔmaa sondo vesɛiya ni.

⁵O co fisa mì vana yaŋ nilan o sila vana kɔlkaloo, a nilan yaŋɔɔ o condun diɔmaa sondo vesɛiya.

⁶Mamɔɔ diɔm sondo vesɛiyo co mɛɛ yɔmii pum piɔndi o kpɛɛnɛi bɛngu nuaa yɛ. Kon vɛlɛ bɛɛ, sanga fondoo fúú.

⁷Masalen tosaa kpoku-kpoku, nɔla mò mingi vana kɔlkaloo maa diɔm sondo vesɛi. Ɲɛm kean n tiwba mì n mangala vana kɔlkaloo kɔllo.

⁸Dɛnɔɔ siowvo hiow naŋɔɔ a ndu kandɔɔ, kɔl biuvanndo nɔu co fisa a kɔl yongaa nɔu.

⁹Keleŋa kɔllo tuulu le, kani vana diɔm sondo vesɛiyo nɛi kɔl itambu le.

¹⁰Dimi le aa: ‹Ko le yɛɛ palɛi paandu i va yɛ fisa a hee sisa?› Ɲuna vaa lende co ɲuna vana kɔlkalu le.

¹¹Kɔlkaloo co macoaa maa kɛ́ɔ. Kani ndu, vana-vana co paalen cɔu nɔla mò de ndu tɔnɔ.

¹²Nduyɛ, mɛɛ volion manda vana yɛ, lende koni kɔlkaloo manda vana ni. Kɔlkaloo cɔɔlu yoomu vana nɔ ndu-a bɛndi.

¹³Tofa vɔ ɲɛm Hala toosiaa-on. Nɛ̀ɛ́ nɔla yɛ mò siɛndi n co n tundanndon-ndo?

¹⁴Telen dɛnɛ kɛndɔɔ, náŋ kɔl! Telen dɛnɛ palaa, kééla kɔllo. Kani Hala soli dɛnɛ kɛndɔɔ a dɛnɛ palaa ni. Lelan, vanacieo tiwba mo sina siɔdii ndɔɔ le.

¹⁵O telen bingi ya co yoomu-o bɛngu, í bii bila maa vana sandaa nɔla mò vi a dɛnɛ sandaa ndɔɔ, mì vana yɔŋ vɔɔndo lo yoomu a kɔlvesɛi ndɔɔ.

¹⁶Híw i sandu le, híw vɛlɛ kɔlkaloo nɔ le, yɔŋii nɔm pila tɛɛmbuun.

¹⁷Híw kɔlvesɛiyo nɔ le, híw vɛlɛ diɔmnde nɔ le, yɔŋii n yala vu.

¹⁸O bɛnda ma bii silala tiɔnndan ndan. Kani vana nɔ pɛ siòòŋii Hala-e, o hiw ɲɛ-ɲɛ ba le.

¹⁹Kɔlkaloo tiwba mò ke vana kɔlkaloo kpaayaa, mò hiow masaa n'bungaa n'van tɔ́a co masalen tosaa o kobio ndu pilɛ nin-nda.

²⁰Vana sandaa co o lɛŋnden coo le, o tiwba mò tosa dɛnɛ kɛndɔɔ, o kondu haki loo.

²¹Yaŋnun sɔɔn vannda co dìmì-on kpow le, yɔŋii n tuei vana baala nɔmndo nɔm congòó.

²²Kani nɔm bɛɛ, a sinà maa a co caanda congòó lɔ́ɔ́-lɔ́ɔ̀.

²³Mí dɔaw sɔɔn mun kpow taasi. Mí yiyan le dɛnndan tosaa a kɔlkaloo, kɛ i tiwba le.

²⁴Mɛ̀ɛ́-mɛ̀ɛ́ vana nɔ kɔlkaloo, vana tiwba ɲɔɔn kpow sinaa le, kani n co sɛ́lɛ́, n yingila.

²⁵O kon, mí kindin le sinaa, mí yaasiaa, mí nuwviaa kɔlkaloo. Yáà yeema mì yáà sina le kɔlɔ dɛnndan la komal vana-o. Mí yáà sina vɛlɛ kɔlɔ vannda tosa kɔlvesɛiyo te kon te diɔmii sondo vesɛiye-o.

²⁶Mí ca maa vanalanɔ mal vanpiaandua-o hiow lollo a piɔ́mndo. Kaola ndɔɔ co maa leyaŋɔɔ, bala ndɔlan la co maa n'yɔlɔ. Vana hɛnan Hala-o hialun ndu. Kɛ vana lahakio ndu, malnɔnndo o malnun ndu o ba ni mò bii ndu.

²⁷Mí vana kɔlkaloo dimi aa: ‹I yaasiaa dɛnndan ndan la pilɛn-pilɛn ndan le sinaa kɔlɔ la co tosanndo-o.

²⁸I sanga lan yaasiaa, i seelun ɲɛ-ɲɛ le. Mí komal vana pilɛ kpé o vanpiaandua vàá pilɛ tɛɛn, óò nɔ kɔlkaloo-o. Kɛ o vanlaandua kpow tɛɛn yɛ, vana pilɛ bɛɛ i seelun te.

²⁹Mí ca ma Hala cɔw vanndacieea a sandaa, kɛ nda pila co ɲɔɔ kayakayaa ni.›»