Read Kissi Vana Kɔlkaloo 8 Bible Online

Vana Kɔlkaloo 8 - Kissi bible

Vana Kɔlkaloo 8

¹«A toɲa, vana-vana nɔ kɔlkalu kon te, kɔlkalu o tiwba mò cɔm ɲɛ co hunɔɔ yɔŋnɔn-ndo-o. Nduyɛ, hɔlla kɔlkaloo teengiaa vana ni, mò faŋa vana suumaa o hɔl.

²Te masaa soo pɛ, mò dimi isɔɔ le tosa, vana bɛnda mi vana bii sɔɛi ndɔɛi. Naa n cua ciɛ́ɔn Hala o hɔl le ndu diomndo biyɔɔ ni.

³Lelan, n bɛnda mì n keleŋa kpaaya ndɔ lesmasaa kɛɛ le. N bɛnda mì hiow laci a ɲɛ hɛnan ndu loo tosaa le. Kani masaa ndu ɲɛ hɛnan ndu-o o tósà ni.

⁴Sɔɛi masaa co sɔɛi vana sɛ́ɛ́ngiàà le, vana-vana tiwba mò ɲuna ndu le aa: ‹Yɛɛ n co yɛ tosaa ho?›

⁵Vana-vana bii pɛ tɔŋndo, ndu sɔla isɔɔ oo isɔɔ le. Kɛ vana kɔlkaloo sina maa dɛnndan kpow la kialunnin iyama o telen la bɛnda le yamɛi kiolɔndo-o.

⁶Nduyɛ, paale pum, dɛnndan kpow la kialunin iyama, kani yɔŋ vɔɔn vanndacieea kui bɔɔ.

⁷Vana-vana sinà siɔdii lacio le, vana-vana sinà vɛlɛ telen kon yɔŋnunnin-ndo le.

⁸Vana-vana tiwba yoomu ndɔɔ mandaa le, vana-vana vɛlɛ tiwba mò mingi palɛi piɔ́m ndɔɔ a makɔɔ le. Te cɔwvo del pɛ, vana-vana tiwba mò ɲaanun te. Kɔlvesɛiyo nɔla mo ciindiaa vana co kɔlvesɛiyo tosaa-o le.

⁹Mí ca kon kpow, mí dɔaw ɲɛ co tosanndo o paalen bɛngu-o kpow taasi ɲɛkɛndɛi. Vanacieo co vanacieo dɛnɔɔ kindilaa coo, mó va ndu mɔnɛi lueiyo.

¹⁰Mí ca vannda biisila vanaa yɔŋ vɔɔnda tosaa, vanaa yɔŋ vɔɔŋaa kan yɛ, a va kɔlan o Cɛi-Hala-o nin, mí vannda pɔɛɛnun o kobio yerusalɛm nin mɛɛ vanaa kan ndáà kela yɛ. Kon vɛlɛ bɛɛ sanga fondoo fúú.

¹¹A ve vanaa yɔŋ vɔɔnda keleŋa sanga tuisi coo le, lelan tuula vɔɔnndan la va nda piɔw o kɔltan nin ni.

¹²Vana lahakio nɔla mò tosa dɛnɛ vɔɔndo háá bɛmbɔɔ kɛmɛ, mò viownun yoomu taw. Nuaa ndáà dimi ni aa: ‹Vanaa co Hala bɛɛlen keo-va a vanin o dɛnɛ kɛndɔɔ nin, kani a sinà kpaaya ndɔ lemasaa.

¹³Vanaa co yɔŋ vɔɔndo tosaa-a sɔlanin sangaa. A vunin mà hiow maa levundu. A lonnunnin n'felengi, mà vi, kani a sinà kpaaya lemasa Hala-o le.›

¹⁴Nduyɛ, dɛnɛ celen co vɛlɛ o lɛŋnden coo, sanga fondoo fúú o co ni. Vanaa pum a co kela sandaa, kɛ a co sangaa sɔlaa maa vanaa yɔŋ vɔɔnda. Vanaa pum yɛ, nda co yɔŋ vɔɔndo tosaa, kɛ o co dɛnɛ kɛndɔɔ sɔlaa maa vanaa co kela sandaa-a. Mí dimi maa kon bɛɛ, sanga fondoo fúú.

¹⁵Ya ya, i co icondu le ɲaale co ya o kɔl-lo. Kani dɛnɛ kɛndɛ co le vannda o paalen bɛngu-o co hoo ni: dioo, kolɔɔ a ɲaaloo dɔwnɔnndo. O kon à de ceendo tɔnɔ. Hoo nda bɛnda le tosaa ni, telen nda co vallo o palɛi Hala ke nda le yoomoo o ceendo coo-e bɛngu-o pɛɛn.

¹⁶Mí kei o nɛi oo nɛi coo le sinaa mɛɛ vana looku mà sɔla kɔlkaloo yɛ. Mí dɔaw dɛnnda vannda co tosaa o lɛŋnden coo lan taasi ɲɛkɛndɛi. Mí ca maa hali vana niinu tofaa, mà lɔl lahɔl, a tiwba ma sina mɛɛ Hala tosa ɲɛm co o ceendo coo-on kpow yɛ le. Vanndacieea co sangaa le kon sinaa, kɛ a co nɔla le. Nduyɛ, hali vana kɔlkaloo dimi bɛɛ aa o sina, o tiwba mò bii ken bila le few.»