Read Kissi Vana Kɔlkaloo 9 Bible Online

Vana Kɔlkaloo 9 - Kissi bible

Vana Kɔlkaloo 9

¹«O kon, mí keela kɔllo o dɛnndan ndan kpow coo, mí ca maa vanaa sandaa, vanaa kɔlkalua a dɛnnda nda co tosaa lan kpow, Mɛlɛka o ba nda co ni. Vana-vana co bila biyɔɔ maa kaolaa, te kon te nɛyɔnndo co ndu cumndo le. Vana-vana co siɔdii laci ndɔɔ yiyan coo le.

²Lende koni o co le vannda kpow ni. Ɲɛ pilɔɔ co vana sandaa a vana yɔŋ vɔɔndo komal ni, vana dendu-o a vana dindu loo, vana soli sálàá-o a vana co sálà soli loo. Hiyan co vana kɛndɔɔ a vana yɔŋ vɔɔndo tɛɛn te, vana cua ciɛ́ɔn o Hala lo-o a vana cue n'ciɛ́ɛ́ loo bɛɛ lende koni.

³Dɛnɛ vɔɔn komal vannda kpow o paalen bɛngu-o co hoo ni: ɲɛ pilɔɔ kpé komal vanndacieea ni. Yɔŋ vɔɔndo a diɔmii sondo vesɛiye koni nda co tosaa telen nda co yoomu-o ni, o kon kɔɔli, a vinnun.

⁴Vana co vɔ yoomu-o tiwba mò tiindan. Tun co yoomoo-o fisa a yàlà vílɛ́iyo.

⁵Vanaa co yoomu-a a sina maa a co hunɔɔ vu, kɛ vanaa vi-a nda sina lɛ ɲɛ-ɲɛ le, a co lɛ ɲɛ-ɲɛ tueyɔɔ le, vannda pɔɛɛnun nin bɛɛ a nda o kɔɔ.

⁶Kaola ndaa, nɛyɔn ndaa a paŋala ndaa kpow tambu. A tosa lɛnin dɛnnda co hiovɔɔ o paalen bɛngu nanu lan te.

⁷Lelan, dɔwnun balo mà dɔwnun ɲaale, mà kol mɔima nɔmndan a kɔlkɛndɔɔ. Kani Hala cii nin dɛnnda nɔmndan cɛlɔɔ.

⁸Vá ɲɛ cuɛiyan kɛndɔɔ vownɔnndo lɔ́ɔ́-lɔ́ɔ̀, pɔɛɛnun le cuɛima cun kɛndɛan suunɔnndo o lebol te.

⁹O palɛi bingii Hala ke nɔm o paalen bɛngu-e nin kpow, dɔwnun ɲaale a laa nɔm n kaola-o. Kani yoomu vanacieo bendu le. O Hala ke nɔm-ndo co kon ni, o n sɔla o sanga nɔmndo nin o paalen bɛngu-o.

¹⁰Ɲɛ-ɲɛ ba nɔmndo nɔla pɛ tosaa, tosa ndu a yoomuma nɔmndan kpow. Bau nɛɛ n kɔanin ciee-piɔ́m-nda, vana tiwba ɲɛ-ɲɛ tosa lon te, vana tiwba yiyanndo lon te, kɔlkalu co lon te, dɛnɛ sinaa co lon te.

¹¹Mí dɔaw vɛlɛ dɛnndan lapum taasi o paalen bɛngu. O kiltan nin bɛɛ, vanaa hiow keleɲaa-a hiw laci lelan te. O cɔwvo nin bɛɛ, o co kuubaa le a yam cɔwvo kangalan te. Vanaa hiow kɔlkaloo-a sɔla baloo le kɔlkalu ndaa le, vanaa dɛnɛ sinaa sɔla bolofaa le dɛnɛ sinaa ndaa le, vanaa kɔlkalu bɛndu-a sɔla bɛɛlen le kɔlkalu nda bɛndoo le. Nda kpow, dɛnnda kɛndɛlan a dɛnnda vɔɔnndan la komal nda ni.

¹²Handɔɔ o kon coo, vana-vana sina ɲɛ komalnin ndu-o le. Mɛɛ suwva haw o yalaa nin nuaa yɛ, mɛɛ yowva haw o yala n'yowvo nuaa yɛ, lende koni dɛnɛ palaa voolu vanndacieea o lepilɔɔ ni.

¹³Mí ca vɛlɛ dɛnɛ pum o paalen bɛngu, mó bii ya kɔllo ɲɛkɛndɛi a kɔlkaloo o kɔɔ.

¹⁴Kobi pɔmbɔɔ pum va ni, vanaa bɔɔ ve lenin te. Mí masa kpaayaa pum kɔ del ndu coo a cɔwvo, mó balu yaŋɔɔla cɔwlan handɔɔ lon sɔ́.

¹⁵Vanndo pum va o kobi kon nin, vana kɔlkaloo a vana bala fondoo o va ni. Ndóò tiwba mì ndóò ciindiaa kobi kalaa a kɔlkalu ndɔɔ, kɛ vana-vana yiyan a ndu o kɔɔ le.

¹⁶O kon, mí yiyan maa kɔlkaloo fisa a kpaayaa. Kɛ te vana kɔlkaloo co pɛ vana bala fondoo, vannda ci ndu ɲɛ le, a yeŋnun bɛɛ sɔɛi ndɔɛi le.

¹⁷Nduyɛ, vana kɔlkalu co sɔɛi fɛ́ɛ́-fɛ́ɛ́-o nilan yaŋɔɔ co fisa a yoondiaala diɔmaa sondo vesɛiya yaŋnɔnndo.

¹⁸Kɔlkaloo co fisa a ɲɛm cɔwvon. Vana nɔ taasi loo tiwba mò tɛɛmbuu ɲɔɔn taw.»