Read Kissi Condii kɛndɛ-kɛndɛi 1 Bible Online

Condii kɛndɛ-kɛndɛi 1 - Kissi bible

Condii kɛndɛ-kɛndɛi 1

¹Condii hiow condon kpow naŋɔɔ-e, i hiow naŋɔɔ o condun Salomɔn-ndon nin-nde.

²«Màá kɔman ya ma sɔsa ya sondoo! Kani kaola nɔmndo hiow ya biyɔɔ a mɔiyan.

³Lasikɔlɔma nɔmndan ma naŋ bɔɔ cun. Maa cuɛima cun kɛndɛma tiw cunndo kpow-van, diola nɔmndan la co ni. Lelan, cuaambɔa laandua kaola nɔm ni.

⁴Nan ya nɔm kɔɔli mì n ɲaanun. Masa nuu, luei ya o cɛi nɔm lɔlaa nin, mì n kɔ mì n dɔwnun ɲaale naa ŋiɔn. N lisanin piilianndaan hiovɔɔ mɔiyan coo. A toɲa, cuavaa laandua kaola nɔmnda nɔ dí le nɔm kaolaa.

⁵Cuaambɔa laandua Yerusalɛm sei, o tiŋi ya co ni, kɛ i naŋ taw. I co o tiŋi ŋɛlɛngi-ŋɛlɛngi maa cɛila-kolala-toandaalan Kedar, i naŋ maa cɛila pɔmbɔla Salomɔn-ndan.

⁶La tófà yáw ni tiŋio le, paalen le piimiaa ya ni. Mɛɛ yemaa nia tuulu kɔl a ya, má siinguu ya vana mandaa lanakɔ n'rɛsɛnndo, nakɔ n'rɛsɛn ni ya pilaa niko, i manda lɛ kon te[1].

⁷Éé nɔm kɔl nuu kaola hoo-o! Cɔm ya nɛɛ n co lakɔ saa nɔmnda yɔɔ diólan-nda, ma cɔm ya nɛɛ n co lakɔ nda yambɔɔ pɛngio a paale kalalen-nda, yɔŋii ya kɔ va laasianndo o cɔlua caaŋaa nɔmnda ikɛi.»

⁸«Òó nɔm vanalanɔ hiow vanlaandua naŋɔɔ-o, diom foofola bɛngula saa, mà yɛɛ cuinaa téndéa nɔmnda diólan o kùùla vanaa mandaa n'cɔlua ikɛi.

⁹Òó nɔm caan ni laandoo, i tuu nɔm a soa laandua nan ɲɛla ɲaanannda Faraɔnnɔɔ lan-nda o pilɛ.

¹⁰Kelan lanion cɛl bɔɔ kuula nɔmndan, yɔɔvama powvan ma cɛl bɔɔ bolola nɔmndan.

¹¹N co nɔm yɔɔva n'sianio tosal mì n mɛli yɔɔvama volin humbuan lenin mapilɛn-pilɛn.

¹²Tuma masaa va ɲɛdiaa ndɔɔ dioo-o, mí lasikɔlɔ nuu va cun ndɔɔ solio.

¹³Vana ya kaola hoo taw-vo co ya o mɛɛyan tɛɛn maa siani cuɛima cun kɛndɛ.

¹⁴O co maa kpɔ̀nyɔ̀ kɔmnde yɔm henee o nakɔla n'rɛsɛnndan Ɛin-Kedi[2] nin.

¹⁵A naŋ bɔɔ hɔlla, nɔm caan ni laandoo, a naŋ bɔɔ mbɔ̀! Hɔlta nɔmndan la naŋ bɔɔ maa n'poonpoon.

¹⁶A naŋ bɔɔ hɔlla, nɔm caan ni piaandoo, mbɔ̀ a naŋ bɔɔ! Maa bil puiyaa kpele naa hinia co ni.

¹⁷A pɛngɛn yɔm sɛɛdre naa n tosa kpóŋmá cɛi naa ni, a pɛngɛn yɔm siprɛs naa n toosiaa cɛi naa lenin ni.»