Read Kissi Condii kɛndɛ-kɛndɛi 3 Bible Online

Condii kɛndɛ-kɛndɛi 3 - Kissi bible

Condii kɛndɛ-kɛndɛi 3

¹«Tuma ya va ihini icɔllo o kpele nuu coo-o, mí nuwviaa vanapɔnɔ kɔl nuu kaola hoo taw-vo, mí nuwviaa ndu, kɛ i seelun ndu le.

²Lelan, i cannin mì kela nuwviaa o kobio nin, mì kela o lɔ́ɔ́lan nin a o nɛilan coo, i nuwviaanin vanapɔnɔ kɔl nuu kaola-o. I co ndu nuwviaa taw, kɛ i co ndu saalɔn te.

³Mí bɔŋan a kpalilaa cumulaa balu cumullo icɔl e kobio mɛɛndanndo-a, mí ɲuna nda aa: ‹La cil-la nihau vanapɔnɔ kɔl nuu kaola-o?›

⁴Mɛɛ ya hiow nda dɔ́ɔ́ ɲɛ-pɔmbɔ, mí komal ndu. O kon, mí bii ndu, i mel lɛ ndu le, háá mí kɔa a ndu o kala nuu lo cɛinin, mí luei ndu o cɛi lɔlaa kala velu ya-o nin.

⁵Niaa felengia laandua Yerusalɛm sei! O diola púwvɛa connun o ba ndaa coo-a, i co niaa ndi dimul kpéŋ-kpéŋ, la tíndì kaolaa le. La kpeeŋiaa ndu le háá fɔ mì ndu pila yeema!

⁶Nɛ̀ɛ́-nɛ̀ co yɛ ho fulaa o lɛŋnde veselɛilen nin mò va heeloo nanu maa tindile ikum? Ó suunun hoo cuɛima cun kɛndɛan, mò cucun ansan a ɲɛm cun kɛndɛn vanaa toosiaa cuɛima cun kɛndɛa coo-o pɛɛn.

⁷Mbòòma Salomɔn-ndo[4] co hunɔɔ ho ni. Langbaa kalla belaŋɔmpum a balu mbòòma kalaa ni, kuubaa cɔvaa bɛndua Israɛl kposon!

⁸Nda kpow, vana-vana co a mɔɛi cɔwve o ba. Nda kpede, vana-vana caa cɔwvo, vana-vana nɔ mɔɛi cɔwve o caŋ, le vóólun-vóólunn cɔw tosan icɔl-lo.

⁹Masaa Salomɔn tosa kpɛŋɔɔ o mbòòma ndɔɔ nin a pɛngɛn yɔmnde Liban.

¹⁰O toosiaa sungbuma ndɔan a volin humbon, mó bɛɛndiaa nɛɛ sɛɛŋaa kɔɔ-a a sianion, mó toosiaa nɛɛ calaa a kola siaŋa kɛndɛ-kɛndɔɔ. Felengia laandua Yerusalɛm sɔɔluu ndu a kaolaa ni.

¹¹Felengia laandua Yerusalɛm, la fula! La fula mì la tofa masaa Salomɔn. La tofa vɔ ndu a mɔsil yilaa lanɔɔ o lebol, ò kala ndɔ vow ndu telen o va nɔu yiiyo-o-o, o paale o va o kɔlkɛndɛ bɛndoo nin-nden pɛɛn.»